Tuto 9

Batanga ba Mulimu Ba Lukela ku Kena

Ki kabakalañi ha lu swanela kuli lu be ba ba kenile mwa linzila kaufela? (1)

Ku talusañi ku ba ya kenile kwa moya? (2)

ya kenile mwa muzamao? (3)

ya kenile mwa munahano? (4)

ya kenile kwa mubili? (5)

Ki mifuta ifi ya lipulelo ze si ka kena yeo lu swanela ku tokolomoha? (6)

1. Jehova Mulimu ki ya kenile mi ili ya twekile. U tokwa kuli balapeli ba hae ba zwelepili ba nze ba kenile—kwa moya, mwa muzamao, mwa munahano, ni kwa mubili. (1 Pitrosi 1:16) Ki nto ye tokwa buikatazo luli ku zwelapili mutu a nze a kenile mwa meto a Mulimu. Lu pila mwa lifasi le li si ka kena. Hape lu na ni ku lwanisana ni litengamo za luna tota za ku fosa. Kono ha lu lukeli ku tuhela.

2. Bukeni bwa kwa Moya: Haiba lu bata ku sebeleza Jehova, ha lu koni ku zwelapili mwa lituto kamba lizo lifi kamba lifi za bulapeli bwa buhata. Lu lukela ku zwa mwa bulapeli bwa buhata ni ku sa bu fa kemelo ka nzila ifi kamba ifi. (2 Makorinte 6:14-18; Sinulo 18:4) Ha se lu zibile niti ka za Mulimu, lu lukela ku tokomela kuli lu si ke lwa yembululwa ki batu ba ba luta buhata.—2 Joani 10, 11.

3. Bukeni bwa mwa Muzamao: Jehova u bata kuli balapeli ba hae ba zamaye sina Bakreste ba niti ka linako kaufela. (1 Pitrosi 2:12) U bona lika kaufela ze lu eza, nihaiba kwa mukunda. (Maheberu 4:13) Lu swanela ku pima muzamao o maswe wa tobali ni likezo ze ñwi ze si ka kena za lifasi le.—1 Makorinte 6:9-11.

4. Bukeni bwa mwa Munahano: Haiba lu taza minahano ya luna ka mihupulo ye kenile, ye si ka silafala, muzamao wa luna ni ona u ka ba o kenile. (Mafilipi 4:8) Kono haiba lu nahana fa lika ze si ka kena, seo si ka tisa likezo ze maswe. (Mateu 15:18-20) Lu swanela ku pima mifuta ya ku itabisa ye kona ku silafaza minahano ya luna. Lwa kona ku taza minahano ya luna ka mihupulo ye kenile ka ku ituta Linzwi la Mulimu.

5. Bukeni bwa kwa Mubili: Bakeñisa kuli ba yemela Mulimu, Bakreste ba swanela ku buluka mibili ni liapalo za bona li nze li kenile. Lu swanela ku tapa kwa mazoho hamulaho wa ku ya kwa mutabani, mi lu swanela ku tapa kwa mazoho lu si ka kalisa kale ku ca lico kamba ku li swala. Haiba ha mu na linzila hande za ku yumba ka zona ze maswe, ze maswe za kwa mutabani li swanelwa ku pumbekiwa. (Deuteronoma 23:12, 13) Ku ipuluka mutu a kenile kwa mubili ku hulisa buikangulo bo bunde. Ndu ya Mukreste i swanela ku ba ya makete ni ye kenile kwande ni mwahali. I swanela ku zwa mubano sina mutala o munde fa silalanda.

6. Lipulelo ze Kenile: Batanga ba Mulimu ba lukela ku bulela niti ka nako kaufela. Mahata ha ba na ku kena mwa Mubuso wa Mulimu. (Maefese 4:25; Sinulo 21:8) Bakreste ha ba itusisi mibulelelo ye maswe. Ha ba teelezi kamba ku kandeka lishea le li swabisa kamba makande a’ masila. Bakeñisa lipulelo za bona ze kenile, ba iponahaza ku shutana ni ba bañwi kwa mubeleko kamba kwa sikolo ni mwa silalanda.—Maefese 4:29, 31; 5:3.

[Maswaniso a fa likepe 18, 19]

 Batanga ba Mulimu ba lukela kuli ba be ba ba kenile mwa likalulo kaufela