Tuto 8

Bupilo bwa Lubasi Bo Bu Tabisa Mulimu

Mayemo a munna mwa lubasi ki afi? (1)

Munna u swanela ku sebelisana cwañi ni musal’a hae? (2)

Ndate u na ni buikalabelo mañi? (3)

Kalulo ya musali mwa lubasi ki ifi? (4)

Ki sifi seo Mulimu a tokwa kwa bashemi ni kwa bana? (5)

Mubonelo wa Bibele kwa kauhano ni kwa telekano ki ufi? (6, 7)

1. Bibele i bulela kuli munna ki yena toho ya lubasi lwa hae. (1 Makorinte 11:3) Munna u lukela ku ba ni musali a li muñwi fela. Ba swanela ku nyalana hande ka ku ya ka mulao.—1 Timotea 3:2; Tite 3:1.

2. Munna u swanela ku lata musal’a hae sina mw’a itatela. U swanela ku sebelisana ni yena ka nzila yeo Jesu a sebelisanela ka yona ni balateleli ba hae. (Maefese 5:25, 28, 29) Ni kamuta h’a swaneli ku nata musal’a hae kamba ku mu nyandisa ka nzila ifi kamba ifi. Ka ku fapahana, u swanela ku mu tompa ni ku mu kuteka.—Makolose 3:19; 1 Pitrosi 3:7.

3. Ndate u swanela ku sebeza ka t’ata kuli a babalele lubasi lwa hae. U lukela ku fumanela musali ni bana ba hae lico, liapalo, ni maino. Ndate hape u lukela ku fumanela lubasi lwa hae ze tokwahala za kwa moya. (1 Timotea 5:8) U fa ketelelo mwa ku tusa lubasi lwa hae ku ituta ka za Mulimu ni milelo ya Hae.—Deuteronoma 6:4-9; Maefese 6:4.

4. Musali u swanela ku ba mutusi yo munde ku munn’a hae. (Genese 2:18) U swanela ku tusa munn’a hae mwa ku luta ni ku twaeza bana ba bona. (Liproverbia 1:8) Jehova u tokwa kuli musali a babalele lubasi lwa hae ka lilato. (Liproverbia 31:10, 15, 26, 27; Tite 2:4, 5) U swanela ku kuteka hahulu munn’a hae.—Maefese 5:22, 23, 33.

5. Mulimu u tokwa kuli bana ba kuteke bashemi ba bona. (Maefese 6:1-3) U libelela bashemi ku luta ni ku sikulula bana ba bona. Bashemi ba tokwa ku ba ni bana ba bona ka nako ye ñwi ni ku ituta Bibele ni bona, ili ku taleleza butokwi bwa bona bwa kwa moya ni bwa mwa maikuto. (Deuteronoma 11:18, 19; Liproverbia 22:6, 15) Bashemi ni kamuta ha ba swaneli ku kalimela bana ba bona ka nzila ye buhali kamba ye situhu.—Makolose 3:21.

6. Bosinyalana ha ba na ni butata bwa ku sa utwana, ba swanela ku lika ku sebelisa kelezo ya Bibele. Bibele i lu susueza ku bonisa lilato ni ku swalela. (Makolose 3:12-14) Linzwi la Mulimu ha li susuezi ku kauhana sina yona nzila ya ku tatulula ka yona butata bo bunyinyani. Kono musali n’a kana a keta ku siya munn’a hae haiba (1) a hana ka muñañatoho ku fa lubasi lwa hae ze tokwahala, (2) ki wa mifilifili hahulu kuli buikangulo ni bupilo bwa musali bu ba mwa lubeta, kamba (3) twaniso ya munna ye tulile tikanyo i tahisa kuli ku be ko ku sa konahali ku musali ku lapela Jehova.—1 Makorinte 7:12, 13.

7. Bosinyalana ba lukela ku sepahala yo muñwi ku yo muñwi. Bubuki ki sibi ku Mulimu ni ku sinyalana ni mutu. (Maheberu 13:4) Liswalisano za tobali kwande a linyalo ki lona fela libaka la ka Mañolo le li tisa telekano yeo ku kena hape mwa linyalo ku lumelezwa hamulaho wa yona. (Mateu 19:6-9; Maroma 7:2, 3) Jehova u toile muinelo m’o batu ba lelekana ku si na libaka la mwa Mañolo mi ba kena mwa linyalo ni mutu u sili.—Malaki 2:14-16.

[Maswaniso a fa likepe 16, 17]

 Mulimu u tokwa bashemi ku luta bana ba bona ni ku ba sikulula

[Siswaniso se si fa likepe 17]

Ndate ya lilato u fumanela lubasi lwa hae za kwa mubili ni za

kwa moya