Tuto 4

Diabulosi Ki Mañi?

Satani Diabulosi—u zwa kai? (1, 2)

Satani u yembulula cwañi batu? (3-7)

Ki kabakalañi ha mu swanela ku hanyeza Diabulosi? (7)

1. Linzwi la “diabulosi” li talusa mutu ya bulela lishano le li maswe-maswe ka za mutu yo muñwi. Linzwi la “Satani” li talusa sila kamba mulwanisi. Ao ki mabizo a’ filwe ku sila se situna sa Mulimu. Pili, n’a li lingeloi le li petehile le ne li li ni Mulimu kwa lihalimu. Nihakulicwalo, hamulaho a nahana ka za hae ka ku tula tikanyo mi a bata ku lapelwa ko ku swanelwa ku fiwa ku Mulimu.—Mateu 4:8-10.

2. Lingeloi leo, Satani, ne li bulezi ku Eva ka ku itusisa noha. Ka ku mu bulelela lishano, ne li tahisize kuli a si ke a utwa Mulimu. Kacwalo Satani n’a lwanisize se si bizwa “bulena” bwa Mulimu, kamba mayemo a ku ba Mwambakani ya Pahami. Satani n’a tahisize ku honona ka za haiba Mulimu u busa ka nzila ye swanela ili ye tusa babusiwa ba Hae ka ku fitisisa. Satani hape n’a tahisize ku honona ka za haiba mutu ufi kamba ufi n’a ka zwelapili ku sepahala ku Mulimu. Ka ku eza seo, Satani n’a itahiselize ku ba sila sa Mulimu. Ki lona libaka ha n’a fitile fa ku bizwa Satani Diabulosi.—Genese 3:1-5; Jobo 1:8-11; Sinulo 12:9.

3. Satani u lika ku kwasheka batu kuli ba mu lapele. (2 Makorinte 11:3, 14) Nzila ye ñwi yeo a yaulula batu ka yona ki ka bulapeli bwa buhata. Haiba bulapeli bu luta buhata ka za Mulimu, ka buniti fela bu yemela mulelo wa Satani. (Joani 8:44) Batu ba ba li lilama za bulapeli bwa buhata ne ba kana ba lumela ka buniti kuli ba lapela Mulimu wa niti. Kono luli ba sebeleza Satani. Ki yena “mulimu wa lifasi le.”—2 Makorinte 4:4.

4. Tumelo ya mioya ki nzila ye ñwi yeo Satani a tisa ka yona batu mwatas’a m’ata a hae. Ne ba kana ba kupa mioya kuli i ba sileleze, ku holofaza ba bañwi, ku talusa cimo za kwapili, kamba ku eza limakazo. Satani ki yena m’ata a’ maswe a’ tahisa likezo zeo kaufela. Kuli lu tabise Mulimu, lu lukela ku tokolomoha ka ku tala tumelo ya mioya.—Deuteronoma 18:10-12; Likezo 19:18, 19.

5. Satani hape u yaulula batu ka ku ikuhumuseza mushobo ni ku lapela likopano za bupolitiki ko ku tulile tikanyo. Ba bañwi ba nahana kuli sicaba kamba mushobo wa bona ki o munde ku fita ye miñwi. Kono seo haki sa niti. (Likezo 10:34, 35) Batu ba bañwi ba itinga fa likopano za bupolitiki kuli li tatulule butata bwa mutu. Ka ku eza cwalo, ba sweli ku hana Mubuso wa Mulimu. Ki ona fela tatululo kwa butata bwa luna.—Daniele 2:44.

6. Nzila ye ñwi yeo Satani a yaulula batu ka yona ki ka ku ba lika ka litakazo za sibi. Jehova u lu bulelela ku pima likezo za sibi kakuli wa ziba kuli li ka lu holofaza. (Magalata 6:7, 8) Batu ba bañwi ne ba kana ba bata kuli mu swalisane ni bona mwa likezo ze cwalo. Nihakulicwalo, mu hupule kuli ki Satani luli ya bata kuli mu eze lika zeo.—1 Makorinte 6:9, 10; 15:33.

7. Satani n’a kana a itusisa nyandiso kamba twaniso mwa ku mi tahiseza ku siya Jehova. Ba bañwi ba balatiwa ba mina ne ba kana ba nyema hahulu kabakala kuli mu sweli ku ituta Bibele. Ba banwi ne ba kana ba mi sheununa. Kono ki mañi ya mi file bupilo? Satani u bata ku mi sabisa ilikuli mu tuhele ku ituta ka za Jehova. Mu si ke mwa lumeleza Satani ku wina! (Mateu 10:34-39; 1 Pitrosi 5:8, 9) Ka ku hanyeza Diabulosi, mwa kona ku tabisa Jehova ni ku bonisa kuli mu yemela bulena bwa Hae.—Liproverbia 27:11.

 [Maswaniso a fa likepe 9]

Bulapeli bwa buhata, tumelo ya mioya, ni buitati bwa ka sicaba li yaulula batu

[Siswaniso se si fa likepe 9]

Mu hanyeze Satani ka ku zwelapili ku ituta ka za Jehova