Tuto 14

Ka Mo Ba Kopanyelizwe Lipaki za Jehova

Ki lili f’o Lipaki za Jehova ne ba bile ni makalelo a bona a mwa linako za cwale? (1)

Mikopano ya Lipaki za Jehova i zamaiswa cwañi? (2)

Lisinyehelo li lifelwa cwañi? (3)

Ki bomañi ba ba fa ketelelo mwa puteho ni puteho? (4)

Ki mikopano ifi ye mituna ye eziwa ka silimo ni silimo? (5)

Ki musebezi ufi o eziwa kwa sibaka sa bona se situna sa tamaiso ni mwa liofisi za mitai? (6)

1. Lipaki za Jehova ne ba bile ni makalelo a bona a mwa linako za cwale mwa ma-1870. Kwa makalelo, ne ba bizwa Bible Students (Baituti ba Bibele). Kono ka 1931 ne ba ikungezi libizo la mwa Mañolo la Lipaki za Jehova. (Isaya 43:10) Ku zwa kwa makalelo a manyinyani kopano i hulile ku fita fa ku ba Lipaki ba ba eza bolule-lule, ba ba patehile ku kutaza mwa linaha ze fitelela 230.

2. Buñata bwa liputeho za Lipaki za Jehova ba banga ni mikopano halalu ka viki ni viki. Mwa memiwa ku fumaneha ku ufi kamba ufi wa yona yeo. (Maheberu 10:24, 25) Bibele ki yona mutomo wa se si lutiwa. Mikopano i kwalulwa ni ku kwaliwa ka tapelo. Hape ‘lipina za moya’ ze buniti za opelwa fa mikopano ye miñata. (Maefese 5:18, 19) Ha ku na tifo ya ku fumaneha teñi, mi ha ku eziwi koleko.—Mateu 10:8.

3. Liputeho ze ñata li ezeza mikopano mwa Ndu ya Mubuso. Mandu ao hañata ki miyaho ye si ka ipitela ye yahilwe ki baitateli ba Lipaki. Ha mu na ku bona maswaniso, lifapano, kamba lika ze swana ni zeo kwa Ndu ya Mubuso. Lisinyehelo li lifelwa ka linubu za ka buitateli. Ku bao ba ba bata ku fa nubu, ku na ni kakwati ka ku beya teñi  linubu.—2 Makorinte 9:7.

4. Mwa puteho ye ñwi ni ye ñwi, ku na ni maeluda, kamba baokameli. Ba fa ketelelo mwa ku luta mwa puteho. (1 Timotea 3:1-7; 5:17) Ba tusiwa ki batanga ba bukombwa. (1 Timotea 3:8-10, 12, 13) Banna bao ha ba si ka pahamiswa fahalimu a ba bañwi kaufela mwa puteho. (2 Makorinte 1:24) Ha ba fiwi malumbatina a ipitezi. (Mateu 23:8-10) Ha ba tini ka mukwa o shutana ni wa ba bañwi. Hape ha ba lifiwi mwa musebezi wa bona. Maeluda ba talima za butokwi bwa kwa moya bwa puteho ka ku itatela. Ba kona ku fa ku omba-omba ni ketelelo mwa linako za butata.—Jakobo 5:14-16; 1 Pitrosi 5:2, 3.

5. Hape Lipaki za Jehova ba banga ni mikopano ye mituna kamba ya sikiliti ka silimo ni silimo. Ka linako zeo liputeho ze ñata li kopana hamoho kwa tukiso ye ipitezi ya taelo ya Bibele. Kolobezo ya balutiwa ba banca ki kalulo ya kamita ya tukiso ya mukopano ni mukopano o mutuna kamba wa sikiliti.—Mateu 3:13-17; 28:19, 20.

6. Sibaka se situna sa tamaiso mwa lifasi sa Lipaki za Jehova si mwa New York. Teñi k’o ku na ni Sitopa se si Busa, ili sikwata se si zamaisa sa maeluda ba ba na ni yeloseli ili ba ba okamela puteho ya mwa lifasi kamukana. Hape ku na ni liofisi za mitai ze fitelela 100 mwa lifasi kamukana. Ku zona libaka zeo, baitateli ba tusa ku hatisa ni ku lumela lihatiso za Bibele. Hape ku fiwa ketelelo ya ku tomahanya hande musebezi wa ku kutaza. Ki kabakalañi ha mu sa lukisi ku potela ofisi ya mutai ye li bukaufi ni mina ka ku fitisisa?