Tuto 7

Ku Sutelela ku Mulimu ka Tapelo

Ki kabakalañi ha ku li kwa butokwa ku lapela hañata? (1)

Lu swanela ku lapela ku mañi, mi ka mukwa ufi? (2, 3)

Ki litaba lifi ze swanelwa ku lapelelwa? (4)

Ki lili fo mu swanela ku lapelela? (5, 6)

Kana Mulimu wa teeleza kwa litapelo kaufela? (7)

1. Tapelo ki ku bulela ku Mulimu ka buikokobezo. Mu swanela ku lapela ku Mulimu hañata. Kacwalo mwa kona ku ikutwa ku utwana ni yena inge mo mu utwanela ni mulikani yo mutuna. Jehova ki yo mutuna ni ya m’ata hahulu, niteñi u teeleza kwa litapelo za luna! Kana mwa lapelanga ku Mulimu hañata?—Samu 65:2; 1 Matesalonika 5:17.

2. Tapelo ki kalulo ya bulapeli bwa luna. Kacwalo, lu swanela ku lapela ku Mulimu, Jehova, a nosi. Jesu ha n’a li fa lifasi-mubu, kamita n’a lapelanga ku Ndat’ahe,  isiñi ku ufi kamba ufi u sili. Lu swanela ku eza nto ye swana. (Mateu 4:10; 6:9) Nihakulicwalo, litapelo za luna kamukana li swanelwa ku bulelwa ka libizo la Jesu. Seo si bonisa kuli lwa kuteka mayemo a Jesu ni kuli lu na ni tumelo mwa sitabelo sa hae sa tiululo.—Joani 14:6; 1 Joani 2:1, 2.

3. Ha lu lapela lu swanela ku bulela ku Mulimu ku zwelela kwa pilu ya luna. Ha lu swaneli ku bulela litapelo za luna ka manzwi ao lu petile kamba ku li bala mwa buka ya litapelo. (Mateu 6:7, 8) Lwa kona ku lapela lu li mwa mayemo afi kamba afi a ka likute, ka nako ifi kamba ifi, ni mwa sibaka sifi kamba sifi. Mulimu wa kona ku utwa nihaiba litapelo za ka ku kuza ze bulelelwa mwa lipilu za luna. (1 Samuele 1:12, 13) Ki ko kunde ku ba mwa sibaka se si kuzize mo ku si na batu ba bañwi ili ku lapelela teñi litapelo za luna za ka butu.—Mareka 1:35.

4. Ki litaba mañi ze mu kona ku lapelela? Nto ifi kamba ifi ye kona ku ama silikani sa mina ni yena. (Mafilipi 4:6, 7) Tapelo ye li mutala i bonisa kuli lu swanela ku lapela ka za libizo ni mulelo wa Jehova. Hape lwa kona ku kupa ka za ku talelezwa kwa butokwi bwa luna bwa kwa mubili, kuli libi za luna li konwe ku swalelwa, ni tuso ya ku hanyeza miliko. (Mateu 6:9-13) Litapelo za luna ha li swaneli ku ba za buitati. Lu swanela ku lapelela fela lika ze lumelelana ni tato ya Mulimu.—1 Joani 5:14.

5. Ne mu kana mwa lapela ka nako kaufela yeo pilu ya mina i mi susueza ku itumela ku Mulimu kamba ku mu lumba. (1 Makolonika 29:10-13) Mu swanela ku lapela ha mu na ni butata mi tumelo ya mina i sweli ku likiwa. (Samu 55:22; 120:1) Ki ko ku swanela ku lapela pili mu si ka ca kale lico za mina. (Mateu 14:19) Jehova u lu mema ku lapela “ka nako ni nako.”—Maefese 6:18.

6. Sihulu lu tokwa ku lapela haiba lu ezize sibi se situna. Ka linako ze cwalo lu swanela ku kupa mukekecima ni swalelo ya Jehova. Haiba lu ipulela libi za luna ku yena ni ku eza mo lu konela kaufela kuli lu si ke lwa li kutela, Mulimu “wa lata ku swalela.”—Samu 86:5; Liproverbia 28:13.

7. Jehova u teeleza fela kwa litapelo za batu ba ba lukile. Kuli litapelo za mina li utwiwe ki Mulimu, mu lukela ku eza ka mo mu konela kaufela ku pila ka milao ya hae. (Liproverbia 15:29; 28:9) Mu swanela ku ba ni buikokobezo ha mu lapela. (Luka 18:9-14) Mu tokwa ku sebeleza ku se mu lapelela. Kacwalo mu ka fa bupaki bwa kuli mu na ni tumelo ni kuli luli mu lelile se mu bulela. Ki f’o fela Jehova a ka alaba litapelo za mina.—Maheberu 11:6.