Tuto 15

Ku Tusa Ba Bañwi ku Eza Tato ya Mulimu

Ki kabakalañi ha mu swanela ku bulelela ba bañwi ka za seo mu sweli ku ituta? (1)

Ki bomañi bao mu kona ku abana ni bona taba ye nde? (2)

Muzamao wa mina u kona ku ama cwañi ba ba bañwi? (2)

Ki lili fo mu kona ku kutaza hamoho ni puteho? (3)

1. Ku t’o fita cwale se mu itutile lika ze nde ze ñata ku zwelela mwa Bibele. Zibo yeo i swanela ku mi isa kwa ku tahisa butu bwa Sikreste. (Maefese 4:22-24) Zibo ye cwalo ya tokwahala hahulu kuli mu kone ku fumana bupilo bwa kamita. (Joani 17:3) Nihakulicwalo, ba bañwi hape ba tokwa ku utwa taba ye nde ilikuli ni bona ba kone ku piliswa. Bakreste ba niti kaufela ba lukela ku fa bupaki ku ba bañwi. Ki taelo ya Mulimu.—Maroma 10:10; 1 Makorinte 9:16; 1 Timotea 4:16.

2. Mwa kona ku kalisa ka ku abana ni ba ba li bukaufi ni mina lika ze nde ze mu sweli ku ituta. Mu li taluseze lubasi lwa mina, balikani, bao mu kena ni bona sikolo, ni bao mu beleka ni bona. Mu be ni sishemo ni pilu-telele ha mu nze mu eza cwalo. (2 Timotea 2:24, 25) Mu hupule kuli batu hañata ba talima kwa muzamao wa mutu ku fita mo ba teelezeza ku seo a si bulela. Kacwalo muzamao wa mina o munde ne u kana wa hohela ba bañwi kwa ku teeleza kwa lushango l’o mu ba bulelela.—Mateu 5:16; 1 Pitrosi 3:1, 2, 16.

3. Nako ha i nze i ya, ne mu kana mwa fita ku ze konisa za ku kalisa ku kutaza hamoho ni puteho ya Lipaki za Jehova ya fa sibaka. W’o ki muhato wa butokwa mwa zwelopili ya mina. (Mateu 24:14) Neikaba nto ye tabisa hakalo ha ne mu ka kona ku tusa mutu yo muñwi ku fita fa ku ba mutang’a Jehova ni ku fumana bupilo bwa kamita!—1 Matesalonika 2:19, 20.