Tuto 10

Likezo Zeo Mulimu A Toile

Mu swanela ku ikutwa cwañi ka za lika zeo Mulimu a bulela kuli li maswe? (1)

Ki mifuta ifi ya muzamao wa tobali ye li ye fosahezi? (2)

Mukreste u swanela ku nga cwañi lishano? (3) likwinano za mali? (3) busholi? (3) mifilifili? (4) tumelo ya mioya? (5) bucakolwa? (6)

Mutu u kona ku ikayutula cwañi kwa likezo ze maswe? (7)

1. Batanga ba Mulimu ba lata ze nde. Kono hape ba lukela ku ituta ku toya ze maswe. (Samu 97:10) Seo si talusa ku pima likezo ze ñwi zeo Mulimu a toile. Ki lifi ze ñwi za zona likezo zeo?

2. Buhule: Tobali pili mutu a si ka kena kale mwa linyalo, bubuki, ku ba ni swalisano ya tobali ni folofolo, sindoye, ni kalombe kaufela ki libi ze tuna ku Mulimu. (Livitike 18:6; Maroma 1:26, 27; 1 Makorinte 6:9, 10) Haiba batu ba babeli ha ba si ka nyalana kono ba pila hamoho, ba swanela ku kauhana kamba hakusicwalo ba nyalane ka mulao.—Maheberu 13:4.

3. Lishano, Likwinano za mali, Busholi: Jehova Mulimu h’a koni ku puma. (Tite 1:2) Batu ba ba bata tumelezo ya hae ba lukela ku pima lishano. (Liproverbia 6:16-19; Makolose 3:9, 10) Mifuta kaufela ya likwinano za mali i tampakani ka mukwañuli. Kacwalo Bakreste ha ba abani mwa mifuta ifi kamba ifi ya likwinano za mali, ye cwale ka lotari, ku lakana ka lipizi, kamba likwinano za ka makalata. (Maefese 5:3-5) Hape Bakreste ha ba uzwi. Ha ba leki libyana ze ba ziba kuli ki ze uzwizwe kamba k’u nga lika ba si ka lumelezwa.—Exoda 20:15; Maefese 4:28.

4. Mabifi, Mifilifili: Bunyemi bo bu sa zamaiswi bu kona ku isa kwa likezo za mifilifili. (Genese 4:5-8) Mutu wa mifilifili h’a koni ku ba mulikan’a Mulimu. (Samu 11:5; Liproverbia 22:24, 25) Ku lombota kamba ku lifisa misuha ka za bumaswe b’o ba bañwi ne ba kana ba lu eza ku fosahezi.—Liproverbia 24:29; Maroma 12:17-21.

5. Liposo za ka Mabibo ni litumelo za Mioya: Batu ba bañwi ba kuta kwa m’ata a mioya mwa ku lika ku folisa makulanu. Ba bañwi ba poseza lila za bona liposo ili ku ba tahiseza ku kula kamba nihaiba ku ba bulaya. M’ata a’ tahisa zona likezo zeo kaufela ki a Satani. Kacwalo Bakreste ha ba lukeli ku ba ni kabelo mwa kalulo ifi kamba ifi ku zona. (Deuteronoma 18:9-13) Ku ba bukaufi ni Jehova ki yona silelezo ye nde ka ku fitisisa kwa liposo ze ne lu kana lwa posiwa ki ba bañwi.—Liproverbia 18:10.

6. Bucakolwa: Ha ku si ka fosahala ku nwa waine, bucwala, kamba mitoho ye miñwi ka bunyinyani. (Samu 104:15; 1 Timotea 5:23) Kono ku nwa hahulu ni bucakolwa li fosahezi mwa meto a Mulimu. (1 Makorinte 5:11-13; 1 Timotea 3:8) Ku nwa ko ku tulile tikanyo ku kona ku sinya buikangulo bwa mina ni ku shandaula lubasi lwa mina. Hape ku kona ku mi tiseza ku komiwa kapili ki miliko ye miñwi.—Liproverbia 23:20, 21, 29-35.

7. Batu ba ba eza lika zeo Mulimu a bulela kuli li maswe “ha ba na ku ca sanda sa mubuso wa Mulimu.” (Magalata 5:19-21) Haiba mu lata luli Mulimu mi mu bata ku mu tabisa, mwa kona ku ikayutula kwa likezo zeo. (1 Joani 5:3) Mu itute ku toya zeo Mulimu a bulela kuli li maswe. (Maroma 12:9) Mu swalisane ni batu ba ba na ni mikwa ya silumeli. (Liproverbia 13:20) Balikani ba ba li Bakreste ba ba hulile ne ba kana ba fumaneha ku ba simbule sa tuso. (Jakobo 5:14) Fahalimu a zeo kaufela, mu itinge fa tuso ya Mulimu ka tapelo.—Mafilipi 4:6, 7, 13.

 [Maswaniso a fa likepe 20, 21]

Mulimu u toile bucakolwa, busholi, likwinano za mali,

ni likezo za mifilifili