Tuto 6

Mubuso wa Mulimu Ki Nto Mañi?

Mubuso wa Mulimu u fumaneha kai? (1)

Mulena wa ona ki mañi? (2)

Kana ku na ni ba bañwi ba ba busa hamoho ni Mulena y’o? Haiba ba teñi, ki ba bakai? (3)

Ki sifi se si bonisa kuli lu pila mwa mazazi a maungulelo? (4)

Ki sifi seo Mubuso wa Mulimu u ka ezeza mufuta wa mutu mwa nako ya kwapili? (5-7)

1. Ha n’a li fa lifasi-mubu, Jesu n’a lutile balateleli ba hae ku lapelela Mubuso wa Mulimu. Mubuso (kingdom, mwa Sikuwa)ki mulonga o etelelwa ki mulena. Mubuso wa Mulimu ki mulonga o ipitezi. U tomilwe kwa lihalimu mi u ka busa lifasi-mubu le. U ka kenisa, kamba ku twekisa, libizo la Mulimu. U ka tahisa kuli tato ya Mulimu i eziwe fa lifasi-mubu sina ka mo i ezezwa kwa lihalimu.—Mateu 6:9, 10.

2. Mulimu n’a sepisize kuli Jesu u ka ba Mulena wa Mubuso wa Hae. (Luka 1:30-33) Jesu ha n’a li fa lifasi-mubu, n’a bonisize kuli u ka ba Mubusi ya sishemo, wa katulo ye lukile, ni ya petehile. Ha n’a kutezi kwa lihalimu, n’a si ka y’o yoliswa ku ba Mulena wa Mubuso wa Mulimu onaf’o. (Maheberu 10:12, 13) Ka 1914, Jehova n’a file Jesu m’ata a tamaiso ao N’a mu sepisize. Haisali ku zwiwa f’o, Jesu u busize kwa lihalimu sina Mulena ya ketilwe wa Jehova.—Daniele 7:13, 14.

3. Jehova hape u ketile banna ni basali ba bañwi ba ba sepahala ku zwelela fa lifasi-mubu kuli ba ye kwa lihalimu. Ba ka busa ni Jesu sina malena, baatuli, ni baprisita kwa mufuta wa mutu. (Luka 22:28-30; Sinulo 5:9, 10) Jesu n’a bizize bona bao ba ba ka busa hamoho ni yena mwa Mubuso wa hae kuli ki “mutapinyana.” Ba fita fa palo ye eza 144,000.—Luka 12:32; Sinulo 14:1-3.

4. Jesu a man’o ba Mulena, a undumuna Satani ni mangeloi a hae a’ maswe kwa lihalimu ni ku ba nepela fa lifasi-mubu. Ki kabakaleo lika li bile ze maswe hahulu fa lifasi-mubu fa haisali ku zwiwa ka 1914. (Sinulo 12:9, 12) Lindwa, matala, matuku, ku tokwa mulao ko ku nze ku ekezeha—kaufel’a zona zeo ki kalulo ya ‘sisupo’ se si bonisa kuli Jesu u sweli wa busa ni kuli muinelo wo u mwa mazazi a ona a maungulelo.—Mateu 24:3, 7, 8, 12; Luka 21:10, 11; 2 Timotea 3:1-5.

5. Ona cwale-cwale fa, Jesu u ka atula batu, ili ku ba ketahanya sina mulisani ya keta lingu mwa lipuli. “Lingu” ki bao ba ba ka be ba iponahalize ku ba babusiwa ba hae ba ba sepahala. Ba ka fumana bupilo bo bu sa feli fa lifasi-mubu. “Lipuli” ki bao ba ba ka be ba hanile Mubuso wa Mulimu. (Mateu 25:31-34, 46) Mwa nako ya kwapili ye li bukaufi, Jesu u ka timeza batu kaufela ba ba swana sina lipuli. (2 Matesalonika 1:6-9) Haiba mu bata ku ba yo muñwi wa “lingu” za Jesu, mu lukela ku teeleza kwa lushango lwa Mubuso ni k’u nga muhato ku se mu ituta.—Mateu 24:14.

6. Cwale lifasi li aluhanyizwe ka linaha ze ñata. Ye ñwi ni ye ñwi i na ni mulonga wa yona. Zona linaha zeo hañata za itwanisa. Kono Mubuso wa Mulimu u ka yola milonga kamukana ya batu. U ka busa sina ona fela mulonga wa lifasi-mubu kamukana. (Daniele 2:44) F’o ha ku sa na ku ba ni lindwa, ku loba milao, ni mifilifili. Batu kaufela ba ka pila hamoho ka kozo ni swalisano.—Mika 4:3, 4.

7. Mwahal’a Puso ya Jesu ya Lilimo ze Sikiti, batu ba ba sepahala ba ka petahala, mi lifasi-mubu kamukana li ka ba paradaisi. Mafelelezo a lilimo ze sikiti ha ka t’o esha, Jesu u ka be a ezize lika kaufela zeo Mulimu n’a mu kupile ku eza. Kihona a ka kutisa Mubuso ku Ndat’ahe. (1 Makorinte 15:24) Ki kabakalañi ha mu sa talusezi balikani ni balatiwa ba mina ka za seo Mubuso wa Mulimu u ka si eza?

 [Siswaniso se si fa likepe 13]

Mwatas’a puso ya Jesu, ha ku sa na ku ba ni sitoyo kamba saluluti