Ki Sikamañi Seo Lipaki za Jehova ba Si Lumela?

“Nihakubacwalo, lu swanezi ku utwa ku wena m’o hupulela; kakuli lwa ziba kuli tuto yeo ye keluhile i lwaniswa kai ni kai.” (Likezo 28:22) Ona baeteleli ba ba likwata za batu mwa mwanda wa lilimo za pili mwa Roma ne ba beile mutala o munde. Ne ba batile ku utwa ku zwelela fa simbule, isiñi ku zwelela kwa bahanyezi ba kwande ba nosi.

Ka ku swana, Lipaki za Jehova kacenu ki ba ba hanyezwa, mi ne i kaba foso ku libelela ku fumana niti ka za bona ku zwelela kwa limbule ze fosahalile. Kacwalo lu ba ba tabile ku mi taluseza ze ñwi za litumelo za luna ze tuna.

Bibele, Jesu Kreste, ni Mulimu

Lu lumela kuli “Mañolo kaufela a buyelezwi ki Mulimu mi a na ni tuso.” (2 Timotea 3:16) Mi nihaike ba bañwi ki ba ba pihile kuli ha lu Bakreste ba niti, se ka bunolo fela haki sa niti. Lu lumela ka ku tala tuto ya muapositola Paulusi ka za Jesu ye li: “Mi ku piliswa, ha ku yo ku yo muñwi; kakuli ha ku na Libizo li sili mwatas’a lihalimu, le ba filwe batu le lu ka piliswa ka lona.”—Likezo 4:12.

Nihakulicwalo, kakuli Jesu na bulezi kuli ki “Mwan’a Mulimu” ni kuli “Ndate na ni lumile,” Lipaki za Jehova ba lumela kuli Mulimu ki yo muhulu ku Jesu. (Joani 10:36; 6:57) Jesu yena ka sibili na bulezi kuli: “Ndate ki yo muhulu ku na.” (Joani 14:28; 8:28) Kacwalo ha lu  lumeli kuli ki ya likana ni Ndatahe, sina tuto ya Silalu mo i bulelela. Ka ku fapana, lu lumela kuli na bupilwe ki Mulimu ni kuli ki yo munyinyani ku Yena.—Makolose 1:15; 1 Makorinte 11:3.

Mwa puo ya Sikuwa, libizo la Mulimu ki Jehova. Bibele i bulela kuli: “Wena, u nosi wa libizo la JEHOVA ki wena muambakani-ya-pahami wa lifasi kaufela.” (Lisamu 83:18, King James Version) Ka ku lumelelana ni yona zibahazo ye, Jesu na kanatezi libizo la Mulimu, ka ku luta balateleli ba hae ku lapela kuli: “Ndat’a luna ya kwa lihalimu, Libizo la hao a li be le li kenile.” Mi yena ka sibili na lapezi ku Mulimu kuli: “Libizo la hao, ni li sinulezi batu b’o ni file mwa lifasi.”—Mateu 6:9; Joani 17:6.

Lipaki za Jehova ba lumela kuli ba swanela ku ba sina Jesu mwa ku zibahaza libizo la Mulimu ni milelo ya hae ku ba bañwi. Kacwalo lu i kungezi libizo la Lipaki za Jehova kakuli lu likanyisa Jesu, “Paki ya Sepahala.” (Sinulo 1:5; 3:14) Ka ku swanela Isaya 43:10 i bulela kwa batu bao ili bayemeli ba Mulimu kuli: “Ki mina lipaki za ka, ku bulela [Jehova], mina, ni mutanga ka ye ni ketile.’”

Mubuso wa Mulimu

Jesu na lutile balateleli ba hae ku lapela kuli: “Mubuso wa hao u tahe, “mi na ezize ona Mubuso wo ku ba toho ye tuna ya tuto ya hae. (Mateu 6:10; Luka 4:43) Lipaki za Jehova ba lumela kuli Mubuso wo ki mulonga luli o zwa kwa lihalimu, kuli u ka busa fa lifasi-mubu, mi ni kuli Jesu Kreste ki yena Mulena wa ona ya ketilwe ya sa bonahali. “Bulena bu ka beiwa fa liheta la hae,” ko na mo i bulelela Bibele. “Ku yanduluka kwa mulonga wa hae ni kozo ha li na ku ba ni mafelelezo.”—Isaya 9:6, 7, KJ.

Nihakulicwalo, Jesu Kreste ha na ku ba fela yena mulena a nosi wa mulonga wa Mulimu. U ka ba ni babusi ka yena ba bañata mwa lihalimu. “Haiba lu zwelapili ku  itiisa,” muapositola Paulusi na ñozi kuli, “lu ka busa hamoho sina malena.” (2 Timotea 2:12, NW) Bibele i bonisa kuli batu bao ba ba zusezwa kwa ku to busa hamoho ni Kreste mwa mahalimu ki ba ba ciñekela fela fa “144,000, ili ba ba liuluzwi mwa lifasi.”—Sinulo 14:1, 3.

Ka mo ku inezi fela, mulonga kaufela u na ni ba busiwa, mi Lipaki za Jehova ba lumela kuli bolule-lule hape ka ku ekeza kwa babusi ba mwa lihalimu ba ka fumana bupilo bwa ku ya ku ile. Kwa nalule-lule lifasi-mubu, le li fetuzwi lihae le li buheha, li ka tazwa ki bona ba busiwa ba ba ba swanela ba Mubuso wa Mulimu, ili ba ba ipeya kaufela kwa puso ya Kreste ni babusi ka yena. Kacwalo Lipaki za Jehova ki ba ba i kolwisizwe ka buniti kuli lifasi-mubu ha li na ku sinyiwa ni kamuta ni kuli sepiso ya Bibele i ka talelezwa ye li: “Ba ba na ni niti ba ka yola sanda sa naha, Ni ku yaha mwateñi ku ya ku ile.”—Lisamu 37:29; 104:5.

Kono Mubuso wa Mulimu u ka taha kamukwaufi? Ka ku ipeya ka ku itatela kwa batu kaufela kwa mulonga wa Mulimu? Ka ku fapahana, Bibele ka buniti i bonisa kuli ku taha kwa Mubuso ku ka tokwa Mulimu ku kena ka ku nonga mwa litaba za lifasi-mubu: “Mulimu wa mwa mahalimu u ka tahisa mubuso o si na ku sinyeha ku ya ku ile; . . . Mubuso wo, u ka ketula ni ku feza mibuso kaufela kono ona u ka ba teñi kamita ni ku ya ku ile.”—Daniele 2:44.

Mubuso wa Mulimu u ka taha lili? Ka ku toma fa bupolofita bwa Bibele bo bu sweli ku talelezwa cwale, Lipaki za Jehova ba lumela kuli u ka tuha u taha ona cwale-cwale fa. Lu mi mema ku nyaka bupolofita bo  buñwi bo bu sinula lisupo za “mazazi a maungulelo” a muinelo o maswe wo wa linto. Li ñozwi fa Mateu 24:3-14; Luka 21:7-13, 25-31; ni 2 Timotea 3:1-5.

Kakuli lu ‘lata Jehova Mulimu wa luna ka pilu ya luna kaufela, moya, munahano, ni mata, ni muyahwa ni luna sina mo lu itatela,’ ha lu ba ba kauhani ka sicaba, mubala, ni mupilelo. (Mareka 12:30, 31) Lu ba ba zibwa ka butuna ka lilato le li boniswa mwahal’a mizwale ba luna ba Sikreste ba ba fumanwa mwa macaba kamukana. (Joani 13:35; 1 Joani 3:10-12) Kacwalo lu buluka maino a luna a buikambuso kwa neku la litaba za mañañazwana za macaba ao. Lu lika ku ba sina balutiwa ba makalelo ba Jesu, ili bao na ize ka za bona: “Hasi ba lifasi, sina na ha ni si wa lifasi.” (Joani 17:16) Lu lumela kuli ku i kauhanya kwa lifasi ku talusa ku ikambusa kwa muzamao o maswe o atile hahulu kacenu, hamohocwalo ni buhata, busholi, buhule, buozwa, kalombe, ku itusiswa maswe kwa mali, ku lapela milimu, ni lika ze ñwi ze cwalo ze nyazizwe mwa Bibele.—1 Makorinte 6:9-11; Maefese 5:3-5; Likezo 15:28, 29.

Sepo ya kwa Pili

Lipaki za Jehova ba lumela kuli bupilo bwa luna bwa cwale mwa lifasi le haki sona fela seo bu li sona luli. Lu lumela kuli Jehova n’a lumile Kreste mwa lifasi ku to sulula mali a bupilo bwa hae sina tiululo ili kuli batu ba kone ku ba ni mayemo a lukile ni Mulimu ni ku amuhela bupilo bwa ku ya ku ile mwa muinelo o munca wa linto. Sina muapositolo wa Jesu na ize: “Cwale lu se lu beilwe ba ba lukile ka mali a hae.” (Maroma 5:9; Mateu 20:28) Lipaki za Jehova ki ba ba itebuha ka butungi ku Mulimu ni Mwan’a hae ka tiululo ye ye ezisa bupilo bwa kwapili ku ba bo bu konahala.

Lipaki za Jehova ba na ni sepo ye tezi mwa bupilo bwa kwapili, ili ye tomile fa zuho ya ku zusiwa kwa bafu mwatas’a Mubuso wa Mulimu. Lu lumela, sina ka mo i lutela Bibele, kuli muta mutu a shwa ku ba teñi kwa hae  luli kwa fela, kuli “isali ka lizazi lona leo, milelo ya hae ya fela.” (Lisamu 146:3, 4; Ezekiele 18:4; Muekelesia 9:5) Ee, bupilo bwa kwapili bwa ba ba shwile bu tomile fa kupuzo ya Mulimu ya batu bao ka nako ya zuho.—Joani 5:28, 29.

Nihakulicwalo, Lipazi za Jehova ki ba ba kozwi ka buniti kuli ba bañata ba ba pila cwale ba ka punyuha muta Mubuso wa Mulimu u ka tahisa mafelelezo kwa milonga kaufela ya cwale mi, sina Nuwe ni lubasi lwa hae ha ne ba punyuhile Munda, ba ka zwelapili ku pila ku ikola bupilo ku ya ku ile fa lifasi-mubu le li kenisizwe. (Mateu 24:36-39; 2 Pitrosi 3:5-7, 13) Kono lu lumela kuli punyuho itingile fa ku fita fa lika za tokwa Jehova, sina Bibele ha ibulela kuli: “Mi lifasi la fela, . . . kono ya eza tato ya Mulimu u ina ku ya ku ile.”—1 Joani 2:17; Lisamu 37:11; Sinulo 7:9, 13-15; 21:1-5.

Ka buniti, haki ko ku konahala ku kwahela litumelo za Lipaki za Jehova ona fa, kono lwa mi mema ku fumana litaba ze ekelizwe.

Konji haiba ku bonisizwe, mañolo kamukana a Bibele a zwa mwa Bibele ya Silozi.

[Manzwi a fa likepe 4]

Lu ba ba ngile libizo l’a Lipaki za Jehova Kalibaka l’a kuli lu likanyisa Jesu