BAKEÑISA kuli b’a nga ka butuna musebezi wa bona wa tuto ya Bibele, ba bañwi ne ba kana ba nahana kuli ha ba na cisehelo mwa tuto ya silifasi. Kono seo haki sa niti. Kuli mutu a lute ba bañwi, muluti u lukela pili ku ituta, mi seo si tokwa tuto ni taelo ye swanela. Kacwalo fahalimw’a ku itusisa hande ku ituta kwa silifasi, Lipaki za Jehova ka lilimo ze ñata se  ba fumani tuso ku zwelela mwa litukiso za tuto ni likolo ze fitana-fitana ze zamaiswa ki Watch Tower Society. Zona zeo se li tusize Lipaki ni ba bañwi mwa ku fita fa ku kondoloka hande mwa munahano, muzamao, ni kwa moya.

Sina ka mutala, mwa linaha ze ñata Lipaki se ba talimani ni likulutendano le li ipitezi—ka mwa ku lutela batu ba se ba bile ni sibaka se sinyinyani fela kamba ba ne ba si na sibaka sa ku fumana ku lutiwa ko ku swanela mi kacwalo ha ba zibi ku bala ni ku ñola. Mwa ku taleleza bona butokwi b’o, Watch Tower Society se i tomile litukiso za ku luta batu ku bala ni ku ñola.

Mwa Nigeria, sina ka mutala, likolo za ku luta ku bala ni ku ñola se li zamaisizwe ki Lipaki za Jehova haisali ku zwiwa ka 1949. Kabakala likolo zeo, likiti-kiti za batu mwa Nigeria ba itutile ku bala. Patisiso ye ñwi ne i bonisize kuli ibat’o ba ku fitelela 90 pesenti ya Lipaki za Jehova mwa Nigeria ne ba kona ku bala ni ku ñola, ha ku bapanyiwa ni sipimo se si kwatas’a 50 pesenti mwahal’a nyangela kamukana ya mwa naha. Mwa Mexico, Lipaki za Jehova ba zamaisize litopa za ku bala ni ku ñola haisali ku zwiwa ka 1946. Mwa silimo si li siñwi feela, batu ba ba fitelela 6,500 ne ba lutilwe ku bala ni ku ñola. Mane ba ba fitelela 100,000 se ba tusizwe ku fita fa ku ziba ku bala ni ku ñola. Litopa za ku bala ni ku ñola se li lukisizwe hape ni mwa linaha ze ñwi ze ñata, ze cwale ka Bolivia, Cameroon, Nepal, ni Zambia. Lipaki za Jehova se ba hatisize likopi ze fitelela 7 milioni za broshuwa ya Mu Itute ku Bala ni ku Ñola mwa lipuo ze fitelela 100.

Litukiso ze cwalo za ku bala ni ku ñola hañata se li lemuhilwe ki makolo a tuto mwa manaha mo se li bile teñi. Mwa Mexico, sina ka mutala, sikombwa sa m’uso n’a ñozi kuli: “Na itumela kwa swalisano ya mina, mi kwa neku la m’uso ni fitisa ku mina buitumelo bo bu buniti ka za musebezi wa mina o munde ili o zwelapili mwa ku fa tuso kwa batu ka ku tisa liseli la zibo ku ba ba sa zibi ku bala ni ku ñola. . . . Ni mi lakaleza ku kondisa lika mwa musebezi wa mina wa tuto.”

Bakeñisa kuli Lipaki za Jehova b’a nga ka butuna hahulu musebezi wa bona wa tuto ye tomile fa Bibele, ba lika ku kondolokisa buikoneli bwa bona mwa ku talusa lituto za Bibele ku ba bañwi. Ka mutala, ku ye ñwi ni ye ñwi ya liputeho ze fitelela 119,000 mwa lifasi kamukana, baituti ba lutiwanga mikwa ya buc’aziba mwa ku bala ni ku bulela fapil’a nyangela. Nihaiba banana ka ku fitisisa, ba sa fita fela fa ku ziba ku bala, b’a kona ku iñolisa ni ku amuhela tuto yeo, ili ye fumaneha ku ba ya butokwa ku bona hape mwa miinelo  ye miñwi, ku kopanyeleza cwalo ni mwa sikolo sa bona sa silifasi. Baluti ba bañata se ba bulezi kuli baituti ba ba li Lipaki ba na ni tengamo ya ku kona ku ipulelela hande hahulu.

Ka ku ekeza, puteho ye ñwi ni ye ñwi ya Lipaki za Jehova i susuezwa kuli mwa Ndu ya yona ya Mubuso, kamba sibaka sa makopanelo, i be ni kalulo ya libuka ili ye na ni libuka za ku ituta ze tomile fa Bibele, lidikishinari, ni libuka ze ñwi za patisiso. Yona kalulo ya libuka yeo y’a fumaneha ku bao kaufela ba ba taha kwa mikopano ya kwa Ndu ya Mubuso. Ku bala kwa susuezwa ka butuna mwahal’a liputeho za bona, mi lubasi  lo luñwi ni lo luñwi ka ku swana lwa susuezwa ku ba ni kalulo ya libuka ya lubasi y’e na ni mifuta-futa ya lihatiso ze taleleza butokwi bwa banana ni ba bahulu.

Watch Tower Society hape i zamaisa likolo za ku luta balumiwa ibe banna kamba basali, hamohocwalo ni likolo mo ku lutiwa banna ba ba na ni buikalabelo bwa bukombwa mwa liputeho za fa silalanda. Zona likolo zeo ki bupaki bo bu ekezehile bwa kuli Lipaki za Jehova b’a nga tuto ka butuna hahulu.