NYAKISISO ye tezi ya litumelo za bulapeli bwa Lipaki za Jehova ha i si ka eziwa mwa bukanyana ye. Mwa sibaka sa seo, lu likile ku talusa likuka ze ñwi ze lumelwa ki Lipaki ni ku bonisa ka ku tala mifuta ya lisusuezo za mwa lubasi ze ama muituti wa mina haiba yo muñwi wa bashemi kamba bubeli bwa bona ki Lipaki.

Lipaki za Jehova ba koñomeka ka butuna kulo ya kwa moya ya bana ba bona. Mi ba ikutwa ku ba ni buikolwiso bwa kuli seo si ekeza kwa ku hula kwa bana ba bona mwa likalulo ze ñwi. Litumelo ze ba amuhela ni likuka ze ba latelela li tahisa kuli bupilo bwa bona bu be ni mulelo ni ku ba tusa ku talimana ni but’ata bwa ka zazi ni zazi. Ka ku ekeza, zona litumelo zeo ni likuka li swanela ku ba susueza ku lika ku ba baituti ba ba na ni cisehelo ni bayahi ba naha ba bande mwa bupilo bwa bona kaufela.

Lipaki ba lika ku bona lika ka mo li inezi tota mwa bupilo, kacwalo b’a nga tuto ka butuna. Kacwalo, ki lona libaka ha i li takazo ya bona ku sebelisana ni mina ka ku ya ka buikoneli bwa bona ka ku fitisisa. Ka ku ba Lipaki za Jehova, mwa malapa a bona ni mwa libaka za bona za ku lapelela teñi ku potoloha lifasi, ba ka zwelapili ku susueza bana ba bona ku peta kalulo ya bona mwa swalisano yeo ili ye kondisa lika.