MULUTI wa mwa Netherlands wa mihupulo ya butu Spinoza n’a ñozi kuli: “Se ni likile ku s’a seha likezo za batu, ku sa liliswa ki zona, kamba ku li toya, kono ku li utwisisa.” Ka ku ba baluti, mu talimana ni likulutendano la ku lika ku utwisisa mibonelo, mayemo a mw’a hulezi mutu, ni litumelo za baituti ba ba mwa pabalelo ya mina, ku kopanyeleza cwalo ni bao fa sikolo ba ba li bana ba Lipaki za Jehova. Ka linako ze ñwi, baituti ba ba cwalo ne ba kana b’a nga mayemo a’ bonahala ku ba a buikambuso bo bu sienyi fa litaba ze ñwi. Kono muta likezo ze cwalo li fita fa ku bonahala ka ku tala kuli li simuluha fa litumelo za muituti ili za bulapeli ni za muzamao, li swanelwa ki mamelelo ya mina. Yona bukanyana ye i simuluzwi ki Watch Tower Bible and Tract Society (kopano ye itusiswa ki Lipaki za Jehova mwa ku hatisa litaba) mi i lelezwi ku mi tusa kuli mu utwisise baituti ba Lipaki hande ni ku fita. Lu sepa kuli mu k’a nga nako ya ku i bala ka tokomelo.

Ku utwisisa litumelo za yo muñwi za bulapeli ha ku tokwi kuli mu li amuhele kamba ku li latelela, mi ku zibisa haki ku coweza mutu mwa bulapeli. Yona bukanyana ye ha i bati ku susumeza mibonelo ya bulapeli ya Lipaki fahalimw’a mina kamba fahalimw’a baituti ba mina. Takazo ya luna ka bunolo fela ki ku mi zibisa ka za likuka ni litumelo zeo baituti ba mina ba bañwi ba swelwi ku lutiwa ki bashemi ba bona ilikuli mu fumane ku ba ko ku bunolo hahulu ku utwisisa bana ba Lipaki hamohocwalo ni ku sebelisana ni bona. Ka mo ku inezi fela, seo banana ba lutiwa ni seo ba eza hañata ne li si ke za swalisana, kakuli mwanana yo muñwi ni yo muñwi u ituta ku hulisa lizwalo la hae tota.

Ka ku swana sina bashemi ba bañata, Lipaki za Jehova ba bata kuli bana ba bona ba fumane tuso ye nde ka ku fitisisa mwa ku ituta kwa bona. Kwa neku la seo, ba luta bana ba bona ku swalisana ni baluti ba bona. Kacwalo, bashemi ba ba li Lipaki ni bana ba bona b’a itebuha muta baluti ba b’a nga ka kutwisiso ni ka likute.

Lipaki za Jehova ki Bakreste ba ba zibahala lifasi kamukana. Nihakulicwalo, ka linako ze ñwi ba utwisiswa ka mafosisa. Sepo ya luna, kacwalo he, ki ya kuli yona bukanyana ye i ka mi tusa ku utwisisa bana ba Lipaki hande ni ku fita ili bao ba beilwe mwa pabalelo ya mina. Sihulu, lu sepa kuli mu ka bona libaka, mwa miinelo ye miñwi tota, ha ne ba kana ba fitisa tukelo ya bona ya k’u nga muhato ka nzila ye fapahana.