Kana Batu Kaufela Babaipapata Kuba Bakreste ki Bakreste ba Niti?

KI BAKRESTE babakai baba liteñi mwa lifasi? Buka ya Atlas of Global Christianity ibulela kuli mwa silimo sa 2010, palo ya Bakreste mwa lifasi kaufela neibato eza 2.3 bilioni. Buka yeswana yeo hape ibulela kuli Bakreste bao balapela kwa likeleke zeshutana-shutana zefitelela 41,000, mi keleke ni keleke inani litumelo zayona ni milao yeama muzamao. Bakeñisa kuli batu babañata baipapata kuba Bakreste, lwautwisisa libaka batu babañwi, ibe kuli ki Bakreste kamba kutokwa, habalyanganiswa ni kuzwafiswa ki taba yeo. Bakana baipuza kuli: ‘Kana batu kaufela babaipapata kuba Bakreste ki Bakreste ba niti?’

Halunyakisiseñi mutala olatelela. Haiba mutama musipili wa kuya kwa naha yeñwi, hamuna kutaluseza feela mubeleki wa fa museto naha komusimuluha. Kono hape mukatokwa kumubonisa bupaki bobuñwi, inge cwalo pasipoti yamina. Ka nzila yeswana, Mukreste hatokwi feela kubulela kuli walumela ku Kreste. Ulukela kubonisa bupaki bobuñwi. Ki bupaki mañi bwakafa?

Linzwi la ‘Mukreste’ nelikalile kuitusiswa ibato ba hamulaho wa lilimo zelishumi kuzwa fashwela Jesu. Luka, caziba wa litaba za mwa miteñi ya Bibele, naañozi kuli: “Neli mwa Antioke mo balutiwa ka ketelelo yezwa ku Mulimu nebakalile kubizwa Bakreste.” (Likezo 11:26) Mulemuhe kuli batu bane babizizwe Bakreste neli balutiwa ba Kreste. Mutu ukona kuba cwañi mulutiwa wa Jesu Kreste? Buka ya The New International Dictionary of New Testament Theology, ibulela kuli: “Kuli mutu abe mulutiwa wa Kreste, uswanela kuitatela kulikanyisa Jesu mwa bupilo bwahae kaufela.” Kacwalo, Mukreste wa niti ki mutu yalatelela ka kutala lituto ni litaelo za Jesu, yena Musimululi wa Bukreste.

Kana kwakonahala kufumana batu babaeza cwalo mwahalaa batu babañata babaipapata kuba Bakreste kacenu? Ki lika mañi zanaabulezi Jesu kuli likazibahaza balutiwa bahae ba niti? Shangwe, munyakisise mo Bibele ialabela lipuzo zeo. Cwale lukanyakisisa litaba zeketalizoho kwa litaba zanaalutile Jesu zeka lutusa kuziba balutiwa bahae ba niti. Lukabona mo Bakreste ba mwa linako za baapositola nebaboniselize kuli nebalatelela zanaalutile Jesu. Mi lukalemuha batu babalatelela zanaalutile Jesu kacenu.