‘Mulatane Mwahalaa Mina’

“Nimifa mulao omunca, wa kuli mulatane; sina moni milatezi, mulatane cwalo ni mina. Batu kaufela bakaziba kuli mu balutiwa baka ka taba ye—haiba mulatana mwahalaa mina.”—JOANI 13:34, 35.

Taluso ya Manzwi A: Kreste naabulelezi balutiwa bahae kuli balatane sina mwanaa balatezi. Jesu naabonisize cwañi lilato ku bona? Naalata batu kaufela kusina taba kuli ka nako yeo batu babañwi nebabonisa saluluti kwa batu ba linaha lisili mi nebaketulula basali. (Joani 4:7-10) Lilato nelitahisize kuli Jesu aitombole nako yahae, maata ahae, ni lika zeñwi za ka butu kuli atuse babañwi. (Mareka 6:30-34) Kreste mane naabonisize lilato ka nzila yeñwi yeipitezi. Naabulezi kuli: “Ki na mulisana yomunde; mulisana yomunde uitoboha bupilo bwahae kabakala lingu.”—Joani 10:11.

Mone Baboniselize Lilato Bakreste ba Kwa Makalelo: Mwa linako za baapositola, Bakreste nebabizanga yomuñwi ni yomuñwi kuli “muzwale” kamba ‘kaizeli.’ (Filemoni 1, 2) Nebaamuhelanga batu ba macaba kaufela mwa puteho ya Sikreste kakuli nebalumela kuli “hakuna shutano mwahalaa Mujuda ni Mugerike, kakuli Mulena wa batu kaufela ki alimuñwi.” (Maroma 10:11, 12) Hamulaho wa Pentekota ya 33 C.E., balutiwa mwa Jerusalema ‘nebalekisize maluwo ni lika zabona ni kuabela masheleñi kwa batu kaufela, kulikana ni butokwi bwa yomuñwi ni yomuñwi.’ Ki kabakalañi hane baezize cwalo? Nebabata kuli batu bane basazo kolobezwa baine mwa Jerusalema ni kuli bazwelepili “kutiiseza mwa tuto ya baapositola.” (Likezo 2:41-45) Ki lika mañi zenee basusuelize kueza cwalo? Lilimo ze 200 lisika fita kale kuzwa fobashwela baapositola, caziba wa libata zakale yabizwa Tertullian naañozi manzwi anaabulezwi ki batu babañwi ka za Bakreste kuli: “Balatana mi baitukiselize kushwela babañwi.”

Ki bo Mañi Bababonisa Lilato Lelicwalo Kacenu? Buka ya The History of the Decline and Fall of the Roman Empire, ya mwa silimo sa 1837, ibulela kuli mwahalaa lilimo zeñata-ñata zefitile, batu babaipapata kuba Bakreste “baezize lika zeñata zesituhu kwa batu babañwi kufita batu babasi balumeli.” Lipatisiso zeneezizwe cwanoñu fa kwa America libonisa kuli batu babañata babaipapata kuba balumeli—mi buñata bwabona baipapata kuba Bakreste—banani saluluti sa mubala. Batu babalapela kwa keleke yeñwi mwa naha yeñwi hañata habaisangi pilu kwa batu babañwi babalapela kwa keleke yeswana yeo babapila mwa naha isili mi habatabelangi kubatusa habatokwa tuso.

Ka silimo sa 2004, sibaka sesibizwa Florida nesinatilwe ki liñuli zeene mwa likweli feela zepeli, mi nakonyana kuzwa fo, muina-situlo wa katengo ka Florida’s Emergency Operations naapotezi batu bane batusizwe ki katengo kao kuli abone haiba nebaitusisa hande lika zene bafilwe. Naabulezi kuli mwahalaa batu kaufela bane bafilwe lituso, ki Lipaki za Jehova feela bane baitusisize zona hande mi naatabela kubafa lika kaufela zene bakatokwa. Lilimonyana kwamulaho, ili ka silimo sa 1997, sikwata sa Lipaki za Jehova nebaizo tusa mizwale ni likaizeli babona ni batu babañwi bane bali mwa butokwi kwa naha ya Democratic Republic of Congo ka kubafa milyani, lico, ni liapalo. Lipaki babañwi ba kwa Europe nebafile nubu ya masheleñi amañata-ñata kuli ituse mwa musebezi wo.