Kono ki kabakalañi Satani ni badimona ba hae ha ba sebeza ka tata cwalo mwa ku puma batu? Kakuli ba bata kuli lu swalisane ni bona mwa bukwenuheli bwa bona. Ba bata kuli lu lapele bona. Ba bata kuli lu lumele litaba za bona za buhata ni ku eza lika za s’a lati Jehova. Buñata bwa zona likezo zeo li ama lizo ze ama ba ba shwile.

Lifu la mulatiwa wa mutu ki nto ye utwisa butuku kwa pilu, mi ki nto ye li ya ka taho ni ye lukile ku bonisa maswabi a’ cwalo. Hamulaho wa lifu la mulikan’a hae Lazaro, Jesu “a lila.”—Joani 11:35.

Ku na ni lizo ze ñata ze zamaelela ni lifu, mi zona zeo za fapahana-fapahana ka butuna ku potoloha lifasi kamukana. Ze ñata ha li lwanisani ni likuka za Bibele. Likezo ze ñwi, nihakulicwalo, li tomile fa muhupulo wa kuli ba ba shwile ba pila mi b’a kona ku bona batu ba ba pila. Ku yo tona kwa sibaka sa malilo busihu kaufela, ku lila ko ku si na buiswalo, ni mikiti ye mituna ya fa lifu kaufela zeo li tomile fa sabo ya ku saba ku s’a tabisa mioya ya ba ba shwile. Kono bakeñisa kuli ba ba shwile “ha ba na se ba ziba,” bao ba ba eza likezo za mufuta o cwalo ba zwisezapili buhata bwa Satani.—Muekelesia 9:5.

 Lizo ze ñwi ni mikiti li simuluha fa tumelo ya kuli ba ba shwile ba tokwa tuso ye zwelela ku ba ba pila mi ba ba shwile ba ka holofaza ba ba pila haiba ba s’a omba-ombiwi. Mwa manaha a mañwi ku eza mukiti ni litabelo li eziwa hamulaho wa mazazi a 40 kamba hamulaho wa silimo si li siñwi ku zwa fa lifu la mutu. Seo si taluswa kuli kuti si tusa mutu ya shwile mwa ku ‘silela’ kwa liluko la kwa moya. Kezo ye ñwi ye atile hahulu ki ku fa sico ni sa ku nwa ku ba ba shwile.

Zona lika zeo li fosahalile kakuli li zwisezapili litaba za buhata za Satani ka za ba ba shwile. Kana Jehova n’a ka lumeleza nto ifi kamba ifi y’e li lizo ze tomile fa lituto za badimona? Ku tokwa ni hanyinyani!—2 Makorinte 6:14-18.

Batanga ba Mulimu wa niti ha ba na kabelo ni ye kana mwa likezo ze yemela litaba za buhata za Satani. Ka ku fapahana, ka lilato ba eza ka tundamo mwa ku tusa ba ba pila ni ku ba omba-omba. Ba ziba kuli mutu a sa timela fela, ki Jehova fela ya kona ku tusa mutu y’o.—Jobo 14:14, 15.

Batu ba bañwi ba swalisana ni badimona ka nzila ye nongile kamba ka ku itusisa mutu wa mioya. Seo si bizwa tumelo ya balimu. Voodoo, buloi, mabibo, ku nuhelela za kwapili, ni ku buza ba ba shwile kaufela ki mifuta ya tumelo ya balimu.

Bibele i nyaza zona lika zeo, ka ku talusa kuli: “Ku si ke kwa fumanwa haenu . . . sinuhi se si nze si nuha, kamba wa mabibo, kamba muloi; Kamba wa liunduma, nihaiba ya buza balimu ni baloi, kamba ya pumbula mutu ku mu eza silumba, kamba ya buza ba ba shwile. Kakuli batu kaufela ba ba eza litaba zeo ki ba masila ku [Jehova, NW].”—Deuteronoma 18:10-12.

Ki kabakalañi Jehova h’a lu lemusa ka nzila ye tiile cwalo kuli lu pime likezo zeo?

Kuli lu be mwa buiketo, Jehova u lu lemusa ku pima mifuta kamukana ya tumelo ya balimu. Wa lata  ni ku babalela batu, mi w’a ziba kuli bao ba ba ikenya kwa badimona ba tamehile ku ipumana mwa butata.

Yo muñwi wa batu ba ba cwalo ne li Nilda, ya n’a sebeliswa mwa tumelo ya mioya kwa Brazil. Badimona ba tahisa kuli bupilo bwa hae bu be bwa manyando. U talusa kuli: “Mioya . . . ya t’o kena ku na, ku ni laelela sa ku eza. Ne ni kund’ana mwahal’a muinelo wa ku ba y’a pila ni ku ba ya welezi, mi ne ni na ni butata bwa mufuta wa ku pulumuka. Badimona ba ni nyandisa hahulu kuli mane booko bwa ka ne se bu amilwe. Na fita fa ku itusisa milyani ye lobaza ni ku kalisa ku nwa bucwala ni ku zuba ka ku swalelela. Seo ne si zwezipili mwahal’a lilimo.”

Nako ha ne inze i ya, ka tuso ya Jehova ni Lipaki za hae fa lifasi-mubu, Nilda a ikayutula kwa susuezo ya badimona mi cwale u pila bupilo bwa mbombolelwa, ili bo bu nde. U talusa kuli: “Ni susueza batu kaufela kuli ni kamuta, nihaiba ka nako i liñwi fela, kuli ba si ke ba ikenya mwa ku swalisana ni mioya [ye maswe].”