Bibele i talusa kuli Satani u “pumanga lifasi kamukana.” (Sinulo 12:9) Satani ni badimona ba hae ha ba lati kuli lu lumele Linzwi la Mulimu, Bibele. Ba lika ku ezisa batu kuli ba lumele kuli ba ba shwile b’a pila ko kuñwi mwa liluko la kwa moya. Ha lu boneñi ka mo ba ezeza seo.

Bulapeli bo buñata bu luta kuli mutu kaufela u na ni moyo o shimbulukela kwa liluko la kwa moya hamulaho wa lifu la mubili wa nama. Ba bulela kuli mubili w’a shwa kono moyo ha u shwi. Fahalimw’a seo, ba talusa kuli moyo ha u koni ku shwa, kuli kuti u pila ku ya ku ile.

Kono Linzwi la Mulimu ha li luti cwalo. Bibele i bonisa kuli moyo ki mutu, isiñi nto ye inzi mwahal’a mutu. Sina ka mutala, mwa ku talusa ka za ku bupiwa kwa Adama, Bibele i talusa kuli: “Muña Bupilo Mulimu a bupa mutu ka liluli la lifasi, mi a bululela mwa lingo za hae moya wa ku pila, mi mutu a ba moyo o pila.” (Genese 2:7) Kacwalo Adama n’a si ka fiwa moyo; yena n’a li moyo.

Lifolofolo ni zona hape li bizwa mioyo: “Mi Mulimu a zwelapili ku bulela kuli: ‘Lifasi-mubu ha li tahise mioyo ye pila ka ku ya ka  mifuta ya yona, lifolofolo ze utiwa ni lifolofolo ze zamaya ni za mwa naheñi za fa lifasi-mubu.’”—Genese 1:24, NW.

Bakeñisa kuli linzwi le li mwa Bibele la “moyo” li talusa mutu yena ka sibili, ha lu swaneli ku komoka ha lu fita fa ku ituta kuli mioyo ya kona ku shwa mi y’a shwa. Mañolo a bulela kuli:

• “[Moyo, “NW”] o eza sibi, ki ona o ka shwa.”—Ezekiele 18:4.

• “Mi Samisoni a bulela kuli: ‘Moyo wa ka ha u shwe ni Mafilisita.’”—Baatuli 16:30, NW.

• “Se si lumelelwa ka lizazi la Pumulo, ki ku eza hande kamba ku eza maswe? Ku pilisa mutu [moyo, “NW”] kamba ku mu bulaya?”—Mareka 3:4.

Haili ka za kuli mioyo ya kona ku timezwa, nihaiba ku bulaiwa ka lilumo, seo si bonisizwe kwa Joshua 10:37 (NW) kuli: “Ba fita fa ku u hapa ni ku u timisa ni mulen’a ona ni litolopo za ona ni moyo kamukana o ne u li teñi ku ona ka buhali bwa mukwale. . . . Kacwalo ba timeza moyo kamukana o ne u li teñi ku ona.” Kacwalo, moyo wa shwa.

Haiba mu bala Bibele ku zwa fa pampili ya pili ku yo fita ku ya mafelelezo, ni kamuta ha mu na  ku fumana pulelo ya kuli “moyo o sa shwi.” Moyo wa mutu haki moya. Tuto ya moyo o sa shwi haki tuto ya mwa Bibele. Ki tuto ya Satani ni badimona ba hae. Jehova u toile buhata kamukana bwa bulapeli.—Liproverbia 6:16-19; 1 Timotea 4:1, 2.

Nzila ye ñwi yeo Satani a puma batu ka yona ki ka ku itusisa batu ba tumelo ya mioya. Mutu wa tumelo ya mioya ki mutu ya kona ku amuhela litaba ku zwelela kwa lifasi tota la kwa moya. Batu ba bañata-ñata, ku kopanyeleza cwalo ni bona batu ka sibili ba tumelo ya mioya, ba lumela kuli zona litaba zeo li zwelela kwa mioya ya ba ba shwile. Kono sina ha se lu boni ku zwelela mwa Bibele, seo hasi konahali ku ba cwalo.—Muekelesia 9:5, 6, 10.

Zona litaba zeo, kacwalo he, li zwelela ku bomañi? Kwa badimona bona ka sibili! Badimona ba kona ku kelyeka mutu h’a nze a pila; b’a ziba ka mwa n’a bulelelanga, mwa n’a bonahalela, sa n’a ezize, ni sa n’a zibile. Kacwalo ku bunolo ku bona ku likanyisa batu ba ba shwile.—1 Samuele 28:3-19.

Nzila ye ñwi yeo ka yona Satani a zwisezapili lishano ka za ba ba shwile ki ka litaba za buhata. Litaba za mufuta o cwalo hañata li kwenula batu ka ku ba zwisa kwa niti ya Bibele.—2 Timotea 4:4.

 Mwa Africa ku na ni makande a mañata ka za batu ba ne ba bonwi inze ba pila hamulaho wa ku shwa kwa bona. Ka mo ku inezi fela, ku boniwa ko ku cwalo ne ku ezahezi kwa sibaka se si kwahule hahulu ni kwa pila mutu y’o. Kono ha mu ipuze ili mina kuli: ‘Kana ki nto ye utwahala kuli haiba mutu y’o n’a na ni m’ata a ku kuta ku zwa ku ba ba shwile, n’a ka kutela kwa sibaka se si kwahule hahulu ni lubasi lwa hae ni balikani ba hae?’

Hape, kana ne i si ke ya ba kuli mutu ya n’a bonwi n’a swana fela ni mutu ya n’a shwile? Sina ka mutala, likombwa ze peli za Sikreste ba ne ba kutaza mwa kalulo ye ñwi ya naha ba fita fa ku lemuha munn’a muhulu ya n’a nze a ba latelela ka lihora ze balwa. Ha ne ba mu buzize, ba lemuha kuli munna y’o n’a hupula kuli yo muñwi wa likombwa zeo ne li wahabo yena ya n’a timezi lilimo ze felile kwamulaho. Ka mo ku inezi fela, n’a fosize, kono n’a hanile ku lumela kuli n’a fosize. A mu nahane ka za likande leo munn’a muhulu y’o n’a taluselize balikani ba hae ni bomuyahwa ni yena hasamulaho!

Ku si na ku kakanya mwa ziba ka za lika ze sienyi ze se li bonwi ki batu, ku utwiwa, kamba ku loliwa. Lika za mufuta o cwalo ili  ze sienyi hahulu-hulu hañata li sabisa bao ba ba ipumani ku zona. Marein, ya n’a pila mwa Wiko wa Africa, kamita n’a utwanga linzwi la bokukw’a hae ba basali ba ne ba timezi inze ba mu biza ka nako ya busihu. Ka ku ba ni sabo ye tuna, Marein n’a huwanga, ni ku zusa fa buloko lubasi lwa hae kamukana. Kwa nalule-lule, a fita fa ku pulumuka.

Cwale, haiba ba ba shwile b’a pila luli, kana ki nto ye utwahala kuli ne ba ka sabisa cwalo balatiwa ba bona? Batili hakucwalo. Litaba za mufuta o cwalo ze holofaza li simuluha kwa badimona.

Kono ku cwañi ka za litaba ze bonahala kuli li na ni tuso ni ze omba-omba? Sina ka mutala, Gbassay, ya zwelela kwa Sierra Leone, n’a kula. N’a bile ni tolo ili ku yeo bondat’ahe ba ne ba timezi ne ba tile ku yena. Ba mu laelela kuli a ye kwa kota ye ñwi, ku yo koyola kwateñi litali, ku li kopanya ni mezi, ni ku nwa seo. N’a sa swaneli ku bulelela mutu ni yo mukana ka za teñi pili a si ka eza cwalo. N’a ezize cwalo mi a fita fa ku fola.

Musali yo muñwi na bulezi kuli munn’a hae n’a bonahezi ku yena busihu bo buñwi hamulaho wa ku timela kwa hae. A talusa kuli munn’a hae na bonahala ku ba yo munde hahulu ni kuli n’a apezi liapalo ze nde.

 Litaba za mufuta o cwalo ni lipono li bonahala ku ba ze nde ni ze tusa. Kana li zwelela ku Mulimu? Batili, hakucwalo. Jehova ki “Mulimu wa niti.” (Samu 31:5) Ni kamuta na si ke a lumela ku lu zizibaza kamba ku lu kwasheka. Ki badimona fela ba ba eza seo.

Kono kana ku na badimona ba bande? Batili. Nihaike kuli ne ba kana ba bonahala ku ba ni tuso ka linako ze ñwi, kaufel’a bona ki ba ba maswe. Diabulosi ha n’a bulezi ku Eva, n’a utwahala ku ba y’a silikani. (Genese 3:1) Kono ki sifi se ne si tile ku Eva hamulaho wa ku teeleza ku yena ni ku eza sa n’a bulezi Diabulosi? N’a shwile.

Mwa ziba kuli haki nto ye sienyi ku mutu ya maswe ku ba y’a silikani ku bao a bata ku kwasheka kamba ku puma. “Kalole ka nja ye luma,” ko na mo i taluseza pulelo ya mwa puo ya Sintu. Mi Linzwi la Mulimu li talusa kuli: “Satani ni yena u ifetula sibupeho sa lingeloi la liseli.”—2 Makorinte 11:14.

Mulimu h’a sa swalisana ni batu fa lifasi-mubu ka litolo, lipono, kamba manzwi a zwelela kwa lifasi la kwa moya. Wa ba etelela ni ku ba laelela ka Bibele, ili ye kona ku tahisa kuli mutu “a talifele luli misebezi kaufela ye minde.” —2 Timotea 3:17.

Kacwalo, Jehova h’a lu lemusa ka za tushambwe twa Diabulosi, u eza cwalo bakeñisa kuli wa lu lata. W’a ziba kuli badimona ki lila ze lubeta.