Mioya i teñi! Mwa liluko le li sa bonahali la kwa moya, ku na ni mioya ye minde ni ye maswe. Kana bao ki batu ba se ba pilile ni ku shwela fa lifasi-mubu?

Batili, hakucwalo. Muta mutu a shwa, h’a shimbulukeli kwa lifasi la kwa moya, sina ka mo ba hupulela ba bañwi. Lu ziba cwañi seo? Bakeñisa kuli Bibele i bulela cwalo. Bibele ki buka ya niti ye zwelela ku Mulimu a nosi wa niti, ili y’o libizo la hae ki Jehova. Jehova ki yena ya bupile batu ba fa lifasi; w’a ziba hande se si ezahala ku bona muta ba shwa.—Samu 83:18; 2 Timotea 3:16.

Bibele i talusa kuli Mulimu n’a bupile Adama, mutu wa pili, “ka liluli la lifasi.” (Genese 2:7) Mulimu a mu beya mwa Paradaisi, ili simu ya Edeni. Kambe Adama na bulukile mulao wa Jehova, n’a si ke a fita fa ku shwa; n’a kabe a zwezipili ku pila fa lifasi-mubu ni kacenu. Kono Adama ha n’a lobile mulao wa Mulimu ka mabomu, Mulimu n’a mu taluselize kuli: “U [ka kutela] mwa mubu wo u zwisizwe ku ona; kakuli u liluli, mi u ka kutela mwa liluli.”—Genese 3:19.

Seo si talusañi? Ki hona, Adama n’a li kai pili a si ka bupiwa ki Jehova ku zwelela mwa liluli? Ha ku na ni ko ku kana kwa n’a inzi. N’a si moya mwa lihalimu o ne u si ka pepiwa. N’a sa pili ko kuñwi. Kacwalo, Jehova ha n’a bulezi kuli Adama n’a ka “kutela mwa liluli,” na talusa kuli Adama n’a ka shwa. Na si ka shimbulukela kwa liluko la kwa moya. Fa  lifu, Adama a fita hape fa ku ba nto ye si na bupilo, nto ye si yo. Lifu ki ku s’a ba teñi kwa bupilo.

Kono ku cwañi ka za ba bañwi ba se ba shwile? Kana ni bona hape ha ba yo? Bibele ya alaba kuli:

• “Kaufela [batu ni lifolofolo] li ikela mwa sibaka si li siñwi; kaufela li ezizwe ka liluli, mi kaufela li fetuha liluli hape.”—Muekelesia 3:20.

• “Ba ba shwile ha ba na se ba ziba.”—Muekelesia 9:5.

• “Lilato la bona, ni lutimbo lwa bona, ni muna wa bona, zeo, li shwile.”—Muekelesia 9:6.

• “Mwa libita mo u ya, ha ku sa na musebezi, nihaili mulelo, kamba zibo, kamba butali.”—Muekelesia 9:10.

• “[Batu] ba kutela mwa liluli; Isali ka lizazi lona leo, milelo ya bona ya fela.”—Samu 146:4.

Kana mu fumana kuli ku tata ku amuhela mañolo ao? Haiba  ku cwalo, a mu nahane ka za se: Mwa mabasi a mañata, munna u fumana mali a ku utisa ka ona lubasi lwa hae. Muta a shwa, hañata lubasi lwa hae lu kena mwa butata. Fokuñwi musal’a hae ni banana mane ba fita fa ku tokwa mali a likani a ku leka sico. Mwendi lila za munna y’o ne li ka ba nyandisa. Cwale ha mu ipuze ili mina: ‘Haiba yena munna y’o wa pila mwa lifasi la kwa moya, ki kabakalañi h’a sa zwelipili ku bonela lubasi lwa hae? Ki kabakalañi h’a sa silelezi lubasi lwa hae kwa batu ba ba maswe?’ Ki ka libaka la kuli seo mañolo a si bulela si nepahezi. Yena munna y’o h’a na bupilo, h’a koni ku eza nto ni ye kana.—Samu 115:17.

Kana seo si talusa kuli ba ba shwile ni kamuta ha ba na ku pila hape? Batili, hakucwalo. Lu ka bulela ka za zuho hamulaho. Kono seo si talusa kuli batu ba ba shwile ha ba zibi se mu sweli ku eza. Ha ba koni ku mi bona, ku mi utwa, kamba ku bulela ku mina. Ha mu tokwi ku ba saba. Ha ba koni ku mi tusa, mi ha ba koni ku mi holofaza.—Muekelesia 9:4; Isaya 26:14.