Satani ni badimona ba hae ha ba na ku zwelapili ku puma mufuta wa mutu ka nako ye telele. Jehova u se a ba lunduzi kale kwa lihalimu. (Sinulo 12:9) Mwa nako ya kwapili ye li bukaufi, Mulimu hape u k’a nga muhato kwa neku la Satani ni badimona ba hae. Mwa pono ye ne i zwelela ku Mulimu, muapositola Joani n’a bulezi kuli: “Cwale na bona lingeloi le li tuluka kwa lihalimu, li sweli sinotolo sa mukoti, ni liwenge le lituna mwa lizoho la lona. La swala drakoni, noha ya kale, ye li Diabulosi ni Satani; mi la mu tama ka liwenge, myaha ye 1,000; Mi la mu kunupela mwa mukoti; la u kiya, mi la u tiisa ka liswayo; kuli a tuhele ku puma macaba, mane ku fite myaha ye 1,000.” (Sinulo 20:1-3) Hamulaho, Diabulosi ni badimona ba hae ba ka timezwa ku ya ku ile.—Sinulo 20:10.

Batu ba ba maswe fa lifasi-mubu ni bona hape ba ka timezwa.—Samu 37:9, 10; Luka 13:5.

Satani ni badimona ba hae ha se ba zwisizwe, Jehova u ka tisa limbuyoti ze ñata kwa mufuta wa mutu. Mu ka hupula kuli ba ba shwile ha ba na bupilo, ha ba yo. Jesu n’a swaniselize lifu sina buloko—buloko bo butuna bo bu si na litolo. (Joani 11:11-14) N’a ezize cwalo kakuli n’a zibile kuli ku ka ba ni nako yeo bao ba ba inzi mwa buloko bwa lifu ba ka zusezwa kwa bupilo. Na bulezi kuli: “Nako ya ta, mo ba ba li mwa mabita kaufela, ba ka utwa linzwi la hae, Mi ba zwe.”—Joani 5:28, 29; mu bapanye Likezo 24:15.

Ba ka kutisezwa kwa bupilo fa lifasi-mubu fa. Mwa sibaka sa lizibiso za kuli batu ba timezi, lipiho ze tabisa li ka talusa ka za bao ba ba kutiselizwe kwa bupilo! Yeo i ka ba tabo hakalo ku amuhela balatiwa ku zwelela kwa mabita!