Kauhanyo 13

Buñata Bo Butuna bwa Batu Fapil’a Lubona lwa Jehova

1. (a) Ku lukela ku ezahalañi ku be ne ba li batanga ba Mulimu Bukreste bu si ka taha kale ni ku b’a 144,000 pili ba si ka amuhela kale mupuzo wa bona? (b) Kiñi se si ka kona ku ezahala kwa “buñata bo butuna bwa batu” ba ba pila ka nako ye?

KWA batanga ba Mulimu ba ba sepahala ku zwa ku Abele ku yo fita ku Joani Mukolobezi, ku eza tato ya Mulimu ne li yona nto ya butokwa ka ku fitisisa mwa bupilo bwa bona. Kono kaufel’a bona ne ba shwile mi ba libelela ku zuswa kwa bafu ni ku to pila mwa lifasi le linca la Mulimu. B’a 144,000 ba ba ka busa ni Kreste mwa Mubuso wa Mulimu wa kwa lihalimu ni bona ba lukela ku shwa ba si ka amuhela kale mupuzo wa bona. Kono Sinulo 7:9 i bonisa kuli mwa mazazi a maungulelo a, ne ku ka ba ni “buñata bo butuna bwa batu” ba ba zwa mwa macaba kaufela be ne ba si ke ba shwa kono ili be ne ba ka ba ni sepo ya ku pila ku ya ku ile fa lifasi-mubu. Kana mu ba bañwi ba ku bona?

Ku Ziba Buñata Bo Butuna

2. Ki lifi ze n’e ezahezi pili ku si ka utwisiswa kale hande ka za buñata bo butuna bwa batu ba ba bulezwi kwa Sinulo 7:9?

² Ka 1923, batanga ba Jehova ne ba zibile kuli “lingu” ze bulezwi mwa nguli ya Jesu ye kwa Mateu 25:31-46 ni “lingu ze ñwi” za n’a bulezi kwa Joani 10:16 ki batu be ne ba ka kona ku pila ku ya ku ile fa lifasi-mubu. Ka 1931, ba ba talusizwe kwa Ezekiele 9:1-11 kuli ne ba  swailwe fa lipata ni bona ne ba zibilwe ku ba ba ba na ni sepo ya ku pila fa lifasi-mubu. Mi ka 1935 ne ku zibilwe kuli buñata bo butuna bwa batu ki sona sikwata sa lingu ze ñwi za n’a bulezi Jesu. Kacenu, palo ya bona buñata bo butuna bwa batu ba ba shemubilwe bao se i eza bolule-lule.

3. Ki kabakalañi pulelo ya ku “yema fapil’a Lubona” ha i sa ami sitopa sa lihalimu?

³ Buñata bo butuna bwa batu ba ba bulezwi kwa Sinulo 7:9 ha ba bonwi ku ba mwa lihalimu. Ku ‘yema kwa bona fapil’a Lubona’ lwa Mulimu ha ku tokwi kuli ba be mwa lihalimu. Ku talusa fela kuli Mulimu wa ba bona. (Samu 11:4) Se si bonisa kuli buñata bo butuna bwa batu, ba ba “si na ya kona ku ba bala” haki sitopa sa lihalimu kikuli ha ba bapanyiwa ni ze ñozwi kwa Sinulo 7:4-8 ni kwa Sinulo 14:1-4, bona palo ya bona ha i si ka bulelwa. Mwa mañolo ao, palo ya batu ba ba zwisizwe mwa lifasi ni ku ya kwa lihalimu i bonisizwe ku ba 144,000.

4. (a) “Ñalelwa ye tuna” ye ba punyuha buñata bo butuna bwa batu ki nto mañi? (b) Ka mo ku bulelezwi kwa Sinulo 7:11, 12, ki bomañi ba ba bona buñata bo butuna ni ku abana ni bona mwa ku lapela?

⁴ Sinulo 7:14 i bulela ka za buñata bo butuna kuli: “Bao ki ba ba zwa mwa ñalelwa ye tuna.” Ba punyuha kozi ye tuna ka ku fitisisa ye kile ya tahela batu. (Mateu 24:21) Ha ba ka bonisa ka buitumelo kuli ba pulusizwe ki Mulimu ni Kreste, libupiwa kaufela ze sepahala za mwa lihalimu li ka bulela hamoho ni bona kuli: “Amen. Milumbeko, ni kanya, ni butali, ni buitumelo, ni likute, ni bulena, ni mata, ki za Mulimu wa luna, mwa linako ni linako. Amen.”—Sinulo 7:11, 12.

 Ku Bonisa Kuli Ba Swanela

5. Lu kona cwañi ku ziba ze tokwahala kuli lu be ba bañwi ba buñata bo butuna?

⁵ Ku punyuha ñalelwa ye tuna kwa buñata bo butuna ku ezahala ka ku lumelelana ni lipimo za Jehova ze lukile. Bibele i bonisa hande-nde ze zibahaza ba ba ka puluswa. Kacwalo, ka nako ye, ba ba lata ku luka ba kona ku eza lika ka ku bonisa kuli ba swanela ku to puluswa. Ba lukela ku ezañi?

6. Ki kabakalañi buñata bo butuna ha ba kona ku likanyezwa kwa lingu?

⁶ Lingu li wile pilu mi li na ni buipeyo. Kacwalo, Jesu ha n’a bulezi kuli n’a na ni lingu ze ñwi ze n’e si za sitopa sa lihalimu, n’a talusa batu be ne ba ka bata ku pila ku ya ku ile fa lifasi, be ne ba ka latelela lituto za hae. N’a ize: “Lingu za ka, li utwa linzwi la ka; na li ziba, mi za ni latelela.” (Joani 10:16, 27) Bao ki batu ba ba utwa luli ni ku eza z’a bulela Jesu, ni ku ba balutiwa ba hae.

7. Balateleli ba Jesu ba na ni ku hulisa mikwa mañi?

⁷ Ki mikwa mañi ye miñwi ye ne ba ka tokwa ku hulisa balateleli bao ba Jesu kaufela? Linzwi la Mulimu li alaba kuli: “Mu na ni ku tubula bakeñisa mukwa wa mina wa pili, mutu wa kale ya boliswa ki litakazo ze puma; . . . ni ku apala mutu yo munca ya bupwa ka siswaniso sa Mulimu mwa ku luka, ni mwa ku kena kwa niti.” (Maefese 4:22-24) Ba hulisa mikwa ye ekeza kwa swalisano ya batanga ba Mulimu, ili ‘lilato, tabo, kozo, pilu-telele, musa, bunde, busepahali, ku ishuwa, ni buiswalo.’—Magalata 5:22, 23.

8. Buñata bo butuna ba ka tahelwa kiñi ha ba nze ba tusa bomasiyaleti?

⁸ Buñata bo butuna ba tusa palonyana ya ba ba na  ni sepo ya ku ya kwa lihalimu, ba ba etelela musebezi wa ku kutaza. (Mateu 24:14; 25:40) Lingu ze ñwi ba tusa niha ba ziba kuli ba ka lwaniswa kakuli kwa makalelo a mazazi a maungulelo a, Kreste Jesu ni mangeloi a hae ne ba lunduzi Satani ni badimona ba hae mwa lihalimu. Seo si tahisize “Bumai [ku] mina . . . ba ba yahile mwa lifasi . . . kakuli Diabulosi u shetumukezi ku mina a halifile maswe, ka ku ziba kuli nako ya hae ki ye nyinyani.” (Sinulo 12:7-12) Kacwalo, Satani u lwanisa ka t’ata batanga ba Mulimu mafelelezo a muinelo wo wa linto h’a nze a atumela.

9. Batanga ba Mulimu ba kondisa cwañi mwa ku kutaza taba ye nde, mi ki kabakalañi?

 ⁹ Ku si na taba ni nyandiso ye tuna, musebezi wa ku kutaza wa zwelapili. Kwa mafelelezo a Ndwa ya Lifasi ya I, ne ku na ni bakutazi ba Mubuso b’a likitinyana fela. Kona cwale se ku na ni bolule-lule, kakuli Jehova n’a sepisize kuli: “Ha ku na silwaniso se si ezezwa wena se si ka konda.” (Isaya 54:17) Niheba yo muñwi wa mwa kuta ye tuna ya Sijuda n’a lemuhile kuli musebezi wa Mulimu ha u koni ku paleliswa. Ka za balutiwa, n’a bulelezi Bafalisi mwa lilimo za mwanda wa pili kuli: “Mu ba tuhele; kakuli taba ye, haiba ki mulelo kamba musebezi o zwa kwa batu, i ka fela. Kono haiba i zwa ku Mulimu, ha mu na ku i feza. Mi mu tokomele, mu ka swana mu fumanwa kuli mu lwanisize Mulimu.”—Likezo 5:38, 39.

10. (a) “Liswayo” la buñata bo butuna li talusañi? (b) Batanga ba Mulimu ba utwa cwañi ‘linzwi le li zwa kwa lihalimu’?

¹⁰ Buñata bo butuna ba boniswa ku ba ba ba swailwe liswayo la ku puluswa. (Ezekiele 9:4-6) “Liswayo” ki bona bupaki bwa kuli ba ineezi ku Jehova, ba kolobelizwe ku ba balutiwa ba Jesu, mi ba sebeleza fa ku ba sina Kreste. Ba utwa ‘linzwi le li zwa kwa lihalimu’ le li bulela ka za kopano ya Satani ya mwa lifasi kaufela ya bulapeli bwa buhata kuli: “A mu zwe ku yena mina sicaba sa ka, kuli mu si ke mwa ba ni taba ni libi za hae, mi mwa amuhela kwa likozi za hae.”—Sinulo 18:1-5.

11. Ba buñata bo butuna ba bonisa cwañi ka nzila ya butokwa kuli ki batanga ba Jehova?

¹¹ Hape, Jesu n’a bulelezi balateleli ba hae kuli: “Se ba ka ziba batu kaufela kuli mu balutiwa ba ka ka sona, ki ha mu latana.” (Joani 13:35) Ka ku fapana, lilama za bulapeli bwa lifasi le ba bulayananga mwa lindwa,  hañata ka libaka fela la kuli ki ba mwa linaha ze shutana! Linzwi la Mulimu li li: “Bana ba Mulimu ni bana ba Diabulosi ba bonahala ka se: Mutu ni mutu ya sa ezi se si lukile hasi wa Mulimu, nihaiba ya sa lati mwanahabo. . . . Lu latane. Lu si ke lwa ba sina Kaine, ye ne li ya maswe, mi u bulaile munyan’a hae.”—1 Joani 3:10-12.

12. Fa ñalelwa ye tuna, Jehova u ka eza cwañi ‘likota’ za bulapeli ze beya miselo ye maswe?

¹² Jesu n’a zibahalize kuli: “Kota ye nde kaufela i beya miselo ye minde; mi kota ye maswe ha i koni ku beya miselo ye minde. Kota ye nde ha i koni ku beya miselo ye maswe, mi kota ye maswe ha i koni ku beya miselo ye minde. Kota kaufela ye sa beyi miselo ye minde i ka lemiwa, i latelwe mwa mulilo. Kifo ni li: Mu ka ba ziba ka miselo ya bona.” (Mateu 7:17-20) Miselo ye beiwa ki bulapeli bwa lifasi le i bu bonahaza ku ba ‘likota’ ze bolile, ze ka tuha li sinyiwa ki Jehova mwa ñalelwa ye tuna.—Sinulo 17:16.

13. Buñata bo butuna ba bonisa cwañi kuli ba “yemi fapil’a Lubona” lwa Jehova ka swalisano?

¹³ Sinulo 7:9-15 i bulela za lika ze tahisa kuli buñata bo butuna bwa batu ba puluswe. Ba boniswa ba nze ba “yemi fapil’a Lubona” lwa Jehova, ba yemela bubusi bwa hae bwa pupo kamukana. Ba “tapisize liapalo za bona, ba li sweufalize mwa mali a Ngunyana,” ili nto ye bonisa kuli ba itebuha sitabelo sa Jesu se si zwisa libi. (Joani 1:29) Ba ineezi ku Mulimu mi ba bonisize seo ka ku nweliswa mwa mezi. Kacwalo ba na ni mayemo a kenile fapil’a Mulimu, ili nto ye boniswa ki liapalo ze sweu, mi ba mu “sebeleza musihali ni busihu.” Kana ku na ni linzila zeo ka zona mu kona ku ezisa bupilo bwa mina ku ba bo bu zamaelela hahulu ni ze talusizwe fa?

 Lituso za Cwale

14. Ki lika mañi ze ñwi ze nde ze ba na ni zona batanga ba Jehova nihaiba ka nako ye?

¹⁴ Mwendi mu lemuhile ze nde ze ba na ni zona ba ba sebeleza Jehova nihaiba ka nako ye. Ka mutala, ha ne mu itutile ka za milelo ya Jehova ye lukile, ne mu utwisisize kuli ku na ni sepo ye nde ka za nako ya kwapili. Kacwalo se mu na ni ze mu pilela luli, ili ku sebeleza Mulimu wa niti ka sepo ye nde ya ku to pila ku ya ku ile mwa paradaisi fa lifasi. Ee, Jesu Kreste yena Mulena u ka ‘isa buñata bo butuna bwa batu kwa maweluwelu a mezi a bupilo.’—Sinulo 7:17.

15. Lipaki za Jehova ba tusiwa cwañi ki ku latelela likuka za Bibele mwa litaba za bupolitiki ni za muzamao?

¹⁵ Nto ye nde ye ba na ni yona ba buñata bo butuna bwa batu ki lilato ni swalisano ze fumaneha mwahal’a batanga ba Jehova mwa lifasi kaufela. Ka ku ba kuli kaufel’a luna lu fepiwa ka lico ze swana za kwa moya, kaufel’a luna lu latelela milao ni likuka ze swana ze mwa Linzwi la Mulimu. Ki lona libaka ha lu sa kauhanywi ki mihupulo ya bupolitiki ni ya linaha. Hape lu buluka likuka za muzamao ze pahami zeo Mulimu a tokwa kwa batu ba hae. (1 Makorinte 6:9-11) Kacwalo, ku fita ku ba ni mikwangalakanyi, ku sa swalisana, ni mizamao ye maswe ze atile mwa lifasi, batu ba Jehova ba na ni ye kana ya bizwa kuli ki paradaisi ya kwa moya. Mu bone mo i taluselizwe nto yeo kwa Isaya 65:13, 14.

16. Ba buñata bo butuna niha ba na ni matata a mwa bupilo, ba na ni sepo mañi?

¹⁶ Batu ba ba li batanga ba Jehova ha ba si ka petahala. Mi ba amiwa ki matata a lifasi le, inge cwalo ku tahelwa  ki linako ze t’ata kamba ku ipumana mwa kozi ya lindwa za macaba ba si na mulatu. Hape ba tahelwanga ki makulanu, manyando, ni lifu. Kono ba na ni tumelo ya kuli mwa lifasi le linca, Mulimu “u ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku.”—Sinulo 21:4.

17. Ku si na taba ni ze kona ku ezahala ku luna cwale, ba ba lapela Mulimu wa niti ba libelezi nako ye cwañi ya kwapili?

¹⁷ Niha mu ka shwa cwale kabakala busupali, ku kula, kozi, kamba nyandiso, Jehova u ka mi zusa ni ku mi fa bupilo mwa Paradaisi. (Likezo 24:15) Mi mu ka zwelapili ku ikola malyalya a kwa moya mwa Puso ya Kreste ya Lilimo Ze Sikiti. Ha mu nze mu bona milelo ya Mulimu i petahala, lilato la mina ku yena li ka hula. Mi limbuyoti za kwa mubili z’a ka fa Jehova ka nako yeo li ka mi ezisa ku mu lata ni ku fita. (Isaya 25:6-9) Batu ba Mulimu ba libelezi nako ye nde hakalo ya kwapili!

Lundululo

• Bibele i swalisanisa buñata bo butuna bwa batu ni kezahalo mañi ye ipitezi?

• Haiba luli lu bata ku ba mwahal’a buñata bo butuna bwa batu ba ba shemubilwe ki Mulimu, lu lukela ku ezañi cwale?

• Limbuyoti ze ba na ni zona cwale ba buñata bo butuna ni ze ba ka ba ni zona mwa lifasi le linca la Mulimu ki za butokwa cwañi ku mina?

[Lipuzo za Tuto]

[Siswaniso se si fa likepe 123]

Bolule-lule ba buñata bo butuna bwa batu ba lapela Mulimu wa niti ka swalisano