Kauhanyo 14

Jehova U Zamaisa Cwañi Kopano ya Hae?

1. Bibele i fa litaba mañi ka za kopano ya Jehova, mi ki kabakalañi ha li li za butokwa ku luna?

KANA Mulimu u na ni kopano? Mañolo a buyelezwi a lu taluseza kuli u na ni. Mwa Linzwi la hae, u lu zibisa hanyinyani ka za kalulo ye makaza ya kwa lihalimu ya yona kopano yeo. (Ezekiele 1:1, 4-14; Daniele 7:9, 10, 13, 14) Niha lu sa koni ku bona yona kalulo ye sa bonahali yeo, i ama hahulu-hulu balapeli ba niti kacenu. (2 Malena 6:15-17) Kopano ya Jehova hape i na ni kalulo ye bonahala fa lifasi-mubu. Bibele i lu tusa ku i utwisisa ni ku utwisisa mw’a i zamaiseza Jehova.

Ku Ziba Kalulo Ye Bonahala

2. Mulimu n’a tahisize puteho mañi ye nca?

² Sicaba sa Isilaele ne si li puteho ya Mulimu ka lilimo ze 1,545. (Likezo 7:38) Kono Maisilaele ne ba palezwi ku latelela milao ya Mulimu mi ne ba hanile Mwan’a hae luli. Kacwalo, Jehova a hana puteho yeo ni ku i fulalela. Jesu n’a bulelezi Majuda kuli: “A mu bone, ndu ya mina i siyala ku mina ili matota.” (Mateu 23:38) Mulimu cwale a tahisa puteho ye nca, ya n’a itamile ni yona bulikani bo bunca. Mwa puteho yeo ne ku ka ba ni batu b’a 144,000 ba ba ketilwe ki Mulimu be ne ba ka yo ba ni Mwan’a hae mwa lihalimu.—Sinulo 14:1-4.

3. Ka Pentekonta ya 33 C.E., ne ku ezaheziñi se ne si bonisa kuli Mulimu cwale n’a itusisa puteho ye nca?

 ³ Ba pili ku yona puteho ye nca yeo ne ba tozizwe ka moya wa Jehova ka Pentekonta ya 33 C.E. Ka za yona kezahalo ye komokisa yeo, lu bala kuli: “Lizazi la Pentekonta ha li tile, ne ba inzi kamukana mwa sibaka si li siñwi. Mi ka nako i liñwi fela, kwa utwiwa mulumo o zwa kwa lihalimu, inge wa moya wa liñungwa, mi wa t’o tala ndu kaufela ye ne ba inzi ku yona. Malimi a’ kauhana, a’ swana sina malimi a mulilo a ba tahela, a t’o ina fahalimw’a yo muñwi ni yo muñwi wa bona. Mi kamukan’a bona ba tala Moya o Kenile.” (Likezo 2:1-4) Kacwalo moya wa Mulimu wa bonisa hande-nde kuli seo ki sona sikwata sa batu bao Mulimu n’a ka itusisa kwa ku peta mulelo wa hae, se ne si ka zamaiswa ki Jesu Kreste mwa lihalimu.

4. Ki bomañi kacenu ba ba eza kopano ya Jehova ye bonahala?

⁴ Kacenu, ki bomasiyaleti fela ba b’a 144,000 ba ba sa li fa lifasi. Kono ka ku taleleza bupolofita bwa Bibele, “buñata bo butuna,” bwa “lingu ze ñwi,” ba ba eza bolule-lule, ba swalisanisizwe ni bomasiyaleti ba ba tozizwe. Jesu, yena Mulisana Yo Munde u kopanyize zona lingu ze ñwi zeo ni bomasiyaleti ilikuli ba be mutapi u li muñwi fela o zamaiswa ki yena ka ku ba Mulisana wa bona a li muñwi. (Sinulo 7:9; Joani 10:11, 16) Bona bao kaufela ba eza puteho i liñwi ye swalisani, yona kopano ya Jehova ye bonahala.

I Zamaiswa ki Mulimu

5. Ki mañi ya zamaisa kopano ya Mulimu, mi u eza cwalo ka nzila ifi?

⁵ Pulelo ye mwa Mañolo ye li “keleke ya Mulimu-Ya-Pila” i bonisa hande ya i zamaisa. Kopano ki ya teokratiki,  kamba i busiwa ki Mulimu. Jehova u fanga liketelelo kwa batu ba hae ka Jesu, yena Y’a ketile kuli a be yena Toho ya puteho ya sa bonahali. Hape u fanga liketelelo ka Bibele, lona Linzwi la hae le li buyelezwi.—1 Timotea 3:14, 15; Maefese 1:22, 23; 2 Timotea 3:16, 17.

6. (a) Ketelelo ya kwa lihalimu ya puteho ne i bonahezi cwañi mwa lilimo za mwanda wa pili? (b) Kiñi se si bonisa kuli Jesu u sa li yena Toho ya puteho?

⁶ Ketelelo ye cwalo ne i bonahezi hande hahulu fa Pentekonta. (Likezo 2:14-18, 32, 33) Ne i bonahezi lingeloi la Jehova ha ne li zamaisize za ku yo hasanyiwa kwa taba ye nde mwa Africa, linzwi la Jesu ha ne li file liketelelo ku Saule wa kwa Tarese ha n’a cincize, ni Pitrosi ha n’a kalisize ku kutaza mwahal’a Bamacaba. (Likezo 8:26, 27; 9:3-7; 10:9-16, 19-22) Kono nako ha n’e nze i ya, manzwi a tuhela ku utwahala a zwa kwa lihalimu, mangeloi a tuhela ku bonahala, limpo za limakazo za moya za tuhela ku fiwa. Kono Jesu n’a sepisize kuli: “A mu bone, na, ni inzi ni mina ka mazazi kaufela, ku isa kwa mafelelezo a lifasi.” (Mateu 28:20; 1 Makorinte 13:8) Kacenu Lipaki za Jehova ba amuhela ketelelo ya Jesu. Kambesi cwalo kambe ku shaela taba ya Mubuso inge ba toilwe hahulu cwalo ne ku si ke kwa konahala.

7. (a) Ki bomañi ba ba li “mutanga ya sepahala, ya na ni kutwisiso,” mi ki kabakalañi? (b) “Mutanga” n’a filwe musebezi mañi?

⁷ Nakonyana pili a si ka shwa kale, Jesu n’a bulelezi balutiwa ba hae ka za “mutanga ya sepahala, ya na ni kutwisiso” ya n’a ka siyelwa buikalabelo bo butuna ki Mulen’a hae. “Mutanga” y’o na ka ba teñi Mulena ha n’a ka ya kwa lihalimu mi n’a kabe a sa sebeza ka t’ata Kreste ha n’a ka kuta ka ku sa bonahala, a na ni m’ata a Mubuso.  Taluso ye cwalo ha i koni ku yemela mutu a li muñwi fela, kono ya swanela puteho ya Kreste ye tozizwe. Kakuli n’a i lekile ka mali a hae, Jesu n’a i biza kuli ki “mutanga” wa hae. N’a file ba ba ku yona musebezi wa ku tahisa balutiwa ni ku zwelapili ku ba fepa, ili ku ba fa “lico [za kwa moya] ka nako ye lukela.”—Mateu 24:45-47; 28:19; Isaya 43:10; Luka 12:42; 1 Pitrosi 4:10.

8. (a) Ba sitopa sa mutanga cwale se ba na ni buikalabelo mañi? (b) Ki kabakalañi ku amuhela ketelelo ye fiwa ka mwa batela Mulimu ha ku li kwa butokwa?

⁸ Ka ku ba kuli sitopa sa mutanga ne si eza musebezi wa Mulena ka busepahali ha n’a kutile ka ku sa bonahala ka 1914, ku na ni se si bonisa kuli ne si filwe buikalabelo bo butuna ni ku fita ka 1919. Lilimo ze fitile ku zwa f’o li bile nako ya ku paka za Mubuso mwa lifasi kaufela, mi buñata bo butuna bwa balapeli ba Jehova ba sweli ku kubukanyiwa kuli ba kone ku puluswa kwa ñalelwa ye tuna. (Mateu 24:14, 21, 22; Sinulo 7:9, 10) Bao ni bona ba tokwa lico za kwa moya, mi ba li fiwa ki sitopa sa mutanga. Kacwalo, kuli lu tabise Jehova, lu tokwa ku amuhela ketelelo y’a fa ka yona nzila yeo ni ku eza lika ka ku lumelelana ni yona.

9, 10. (a) Mwa lilimo za mwanda wa pili, ki tukiso mañi ye n’e li teñi ya ku alaba lipuzo ka za litumelo ni ku fa ketelelo mwa ku kutaza taba ye nde? (b) Ki tukiso mañi ye li teñi kacenu ya ku zamaisa misebezi ya batu ba Jehova?

⁹ Fokuñwi ku zuhanga lipuzo ka za litumelo ni miezezo ya lika. Ku ezahalanga cwañi f’o? Likezo kauhanyo 15 i lu taluseza ka za mo ne i tatululezwi taba ye n’e amile Balicaba be ne ba sikuluhile. Taba yeo ne i isizwe kwa baapositola ni ba bahulu be ne ba li mwa Jerusalema, be ne ba li bona sitopa se si etelela. Banna bao  ne ba kona ku fosa, kono Mulimu n’a itusisize bona. Ba nyakisisa mañolo a n’a ama taba yeo ni bupaki bwa kuli moya wa Mulimu n’o sebelize mwa ku kwalula simu ya Bamacaba. Kihona ba fa katulo. Mulimu n’a fuyauzi tukiso yeo. (Likezo 15:1-29; 16:4, 5) Sona sitopa se si etelela seo sa luma ba bañwi ku yo zwisezapili musebezi wa ku kutaza Mubuso.

¹⁰ Mwa linako za luna, Sitopa Se Si Etelela sa kopano ya Jehova ye bonahala ki sa mizwale ba ba tozizwe ka moya ba ba zwa mwa linaha ze shutana-shutana. Sitopa seo si fumaneha kwa sibaka sa tamaiso sa mwa lifasi kaufela sa Lipaki za Jehova. Ka ku etelelwa ki Jesu Kreste, Sitopa Se Si Etelela si zwisezapili bulapeli bwa niti mwa linaha kaufela, ili ku zamaisa misebezi ya bukutazi ya Lipaki za Jehova mwa liputeho za bona ze likiti ze mashumi-shumi. Ba Sitopa Se Si Etelela ba na ni mubonelo o swana ni wa muapositola Paulusi ya n’a ñolezi Bakreste sina yena kuli: “Isikuli lu busa tumelo ya mina, kono lu lata ku mi tusa ze mi tabisa; kakuli mu yemi ka tumelo.”—2 Makorinte 1:24.

11. (a) Maeluda ni batanga ba bukombwa ba ketiwanga cwañi? (b) Ki kabakalañi ha lu swanela ku sebelisana hande ni ba ba ketilwe?

¹¹ Lipaki za Jehova mwa lifasi kaufela ba itingile fa Sitopa Se Si Etelela ku ba sona se si keta mizwale ba ba kona, mi bao ba filwe m’ata a ku keta maeluda ni batanga ba bukombwa kuli ba babalele liputeho. Ze tokwahala ku ba ba ketiwa li bonisizwe mwa Bibele mi za bonisa kuli banna bao ha ba si ka petahala mi ba fosanga. Maeluda ba ba babazanga ba ba kona ku ketiwa, ni bona ba ba ketanga luli ba na ni buikalabelo bo butuna  ku Mulimu. (1 Timotea 3:1-10, 12, 13; Tite 1:5-9) Kacwalo ba lapelanga kuli moya wa Mulimu u ba tuse mi ba batanga ketelelo ku zwelela mwa Linzwi la hae le li buyelezwi. (Likezo 6:2-4, 6; 14:23) Haike lu itebuhe ‘batu ba ba li limpo’ bao, ba ba tusa kaufel’a luna ku ‘y’o fita fa buñwi bwa tumelo.’—Maefese 4:8, 11-16.

12. Jehova u itusisa cwañi basali mwa tukiso ya teokratiki?

¹² Mañolo a bonisa kuli ba ba lukela ku okamela mwa puteho ki banna. Seo ha si kutisezi basali kwatasi, kakuli ba bañwi ku bona ki bacalifa ba Mubuso wa  kwa lihalimu, mi ki bona ba ba kutaza hahulu. (Samu 68:11) Hape, ka ku peta hande buikalabelo bwa bona bwa mwa lubasi, basali ba tusa mwa ku ezisa puteho ku ba ni libubo le linde. (Tite 2:3-5) Kono ba ba luta mwa puteho ki banna ba ba ketilwe ku eza cwalo.—1 Timotea 2:12, 13.

13. (a) Bibele i eleza maeluda ku nga cwañi buikalabelo bwa bona? (b) Kaufel’a luna lu kona ku abana mwa tohonolo mañi?

¹³ Mwa lifasi, mutu ya na ni situlo se situna u ngiwa ku ba wa butokwa, kono mwa kopano ya Mulimu mulao kikuli: “Ye li yo munyinyani ku mina kaufela, ki yena yo mutuna.” (Luka 9:46-48; 22:24-26) Mañolo a eleza maeluda kuli ba si ke ba busa mutapi wa Mulimu ka t’ata, kono kuli ba be mitala kwa mutapi. (1 Pitrosi 5:2, 3) Haki ba sikai fela ba ba ketilwe, kono ki Lipaki za Jehova kaufela, banna ni basali ba ba na ni tohonolo ya ku yemela Mubusi wa pupo kamukana, ku bulela ka buikokobezo ka libizo la hae ni ku taluseza batu kaufela ka za Mubuso wa hae.

14. Ka ku itusisa mañolo a bonisizwe, mu buhisane lipuzo ze kolohanyizwe kwa mafelelezo a paragilafu.

¹⁴ Ne lu ka eza hande ku ipuza kuli: ‘Kana na itebuha luli mwa zamaiseza Jehova kopano ya hae ye bonahala? Kana moya wa ka, lipulelo za ka, ni likezo za ka za bonisa cwalo?’ Ku nahanisisa lisupo ze latelela ku kona ku tusa kaufel’a luna ku itatuba cwalo.

Haiba luli ni ipeya ku Kreste ka ku ba yena Toho ya puteho, u zibe, ka mo ku boniselizwe mwa mañolo a latelela, ni ka be ni ezañi? (Mateu 24:14; 28:19, 20; Joani 13:34, 35)

Ha ni amuhela ka buitebuho litukiso za kwa moya  ze taha ka sitopa sa mutanga ni Sitopa sa sona Se Si Etelela, ni bonisa likute ku mañi? (Luka 10:16)

Batu kaufela mwa puteho, sihulu maeluda, ba swanela ku ezana cwañi? (Maroma 12:10)

15. (a) Ka ku ya ka mo lu ngela kopano ya Jehova ye bonahala, lu bonisañi? (b) Ki mwa nto mañi mo lu kona ku bonisa Diabulosi ku ba lihata ni ku tabisa Jehova?

¹⁵ Jehova kacenu u lu etelela ka kopano ya hae ye bonahala ye zamaiswa ki Kreste. Mo lu ngela yona tukiso yeo ku bonisa mo lu ikutwela ka za taba ya bubusi. (Maheberu 13:17) Satani u pihelela kuli se lu iyakatwa hahulu ki luna beñi. Kono haiba lu sebeza ka mo ku tokwahalela kaufela ni ku ambuka lika ze hohela mamelelo ku luna beñi, lu bonisa Diabulosi ku ba lihata. Haiba lu lata ni ku kuteka ba ba lu zamaisa kono inge lu hana ku ‘babaza batu kuli lu fumane se siñwi ku bona,’ lu tabisa Jehova. (Juda 16; Maheberu 13:7) Ka ku sepahala kwa kopano ya Jehova, lu bonisa kuli Jehova ki yena Mulimu wa luna ni kuli lu swalisani mwa ku mu lapela.—1 Makorinte 15:58.

Lundululo

• Kacenu kopano ya Jehova ye bonahala ki nto mañi? Mulelo wa yona ki ufi?

• Ya ketilwe ku ba Toho ya puteho ki mañi, mi u lu fa ketelelo ye lilato ka litukiso mañi ze bonahala?

• Lu swanela ku ba ni mubonelo mañi o munde ka za ba ba mwa kopano ya Jehova?

[Lipuzo za Tuto]

[Maswaniso a fa likepe 133]

Jehova u lu etelela ka kopano ya hae ye bonahala ye zamaiswa ki Kreste