Kauhanyo 2

Mu Lumbeke Jehova ka ku Ba Yena Mulimu A Nosi wa Niti

1. Mulimu wa niti a nosi ki mañi?

BIBELE i talusa kuli niha ku na ni ba bañata ba b’a ngiwa ku ba milimu, “ku luna, Mulimu ki a li muñwi, yena Ndate.” (1 Makorinte 8:5, 6) ‘Mulimu a li muñwi’ y’o ki Jehova, yena Mubupi wa linto kamukana. (Deuteronoma 6:4; Sinulo 4:11) Jesu n’a mu bizize kuli ki “ndate, Yena Ndat’a mina.” (Joani 20:17) N’a lumelelani ni Mushe, y’o kwamulaho n’a kile a li: “[Muñ’a] Bupilo ki Mulimu, . . . ha ku na yo muñwi kwand’a hae.” (Deuteronoma 4:35) Jehova ki ya pahami ku fita lika kaufela ze lapelwa, ze cwale ka maswaniso, batu ba ba ezizwe balimu, kamba Satani Diabulosi, yena sila sa hae, ya li “mulimu wa lifasi le.” (2 Makorinte 4:3, 4) Ka ku fapana ni yona yeo kaufela, Jehova ki yena ‘Mulimu a nosi wa niti,’ ka mwa n’a mu bizelize Jesu.—Joani 17:3.

2. Ha lu nze lu ituta ka za Mulimu, bupilo bwa luna bu swanela ku amiwa cwañi?

² Batu ba ba na ni buitebuho ha ba ituta ka za tulemeno to tunde twa Mulimu, hamoho cwalo ni z’a lu ezelize, ni z’a ka lu ezeza, ba sutelela ku yena. Lilato la bona ku Jehova ha li nze li hula, ba ikutwa ku ba ba ba tamehile ku mu bubeka. Ka nzila ifi? Nzila ya pili ki ka ku bulelela ba bañwi ka za hae. Maroma 10:10 i li: “[Mutu] u paka ka mulomo, kuli a piliswe.” Nzila ye ñwi ki ka ku mu likanyisa ka manzwi ni ka likezo. Maefese 5:1 i li: “Mu be ba ba likanyisa Mulimu sina bana ba ba latwa.”  Kuli lu eze cwalo ka ku tala, lu tokwa ku ziba Jehova ka mw’a inezi luli.

3. Tulemeno twa Mulimu to tu tuna ka ku fitisisa ki tufi?

³ Mwa Bibele kaufela ku na ni lipulelo ze ñata ze bonisa tulemeno twa Mulimu to tu zwile mubano. Tulemeno twa hae to tu tuna ka ku fitisisa ki butali, katulo ye lukile, m’ata, ni lilato. ‘Mulimu ki Yena ya na ni butali.’ (Jobo 12:13) ‘Linzila za hae kaufela li lukile.’ (Deuteronoma 32:4) ‘M’ata a hae ki a matuna.’ (Isaya 40:26) ‘Mulimu ki lilato.’ (1 Joani 4:8, NW) Nihakulicwalo, ku tona tulemeno to tune to tu zwile mubano t’o, ki kafi ka ka ipitezi ka ku fitisisa, ili kona ka ka zibahaza hahulu ka ku fitisisa kuli ki Mulimu ya cwañi?

‘Mulimu Ki Lilato’

4. Kwa tulemeno twa Mulimu, ki kafi ke ne ka mu ezisize ku bupa pupo kaufela ni lika kaufela ze pila?

⁴ Mu nahane kuli kiñi se ne si ezisize Jehova ku bupa pupo kaufela ni libupiwa ze butali za kwa moya ni za butu. Kana ne li butali kamba m’ata a hae? Batili, kakuli Mulimu niha n’a itusisize zona zeo, haki zona ze n’e mu ezisize ku bupa. Mi ku luka kwa hae ne ku si ka mu ezisa ku bata ku abana mpo ya bupilo. Kono se ne si ezisize Mulimu ku abana ni ba bañwi mwa tabo ya ku ba mutu ya pila ya butali ki lilato la hae le lituna. Lilato ki lona le ne li mu ezisize ku ba ni mulelo wa kuli batu ba ba ipeya ku utwa ba pile ku ya ku ile mwa Paradaisi. (Genese 1:28; 2:15) Lilato ne li mu ezisize ku lukisa za ku felisa nyazo ye n’e tahezi batu kabakala sibi sa Adama.

5. Ka ku ya ka Bibele, Jehova u yemela kalemeno kafi, mi ki kabakalañi?

⁵ Kacwalo, kwa tulemeno twa Mulimu to tu zwile mubano kaufela, ka ka ipitezi ka ku fitisisa ki lilato la hae.  Ki mona mw’a inezi. Butali, katulo ye lukile, ni m’ata a hae niha li li za butokwa, Bibele ha i buleli kuli ki yena tulemeno t’o. Kono i bulela kuli ki yena lilato. Ee, Jehova ki yena lilato luli. Lilato leo li zamaiswa ka likuka, isi ka maikuto. Lilato la Mulimu li zamaiswa ki likuka za niti ni ku luka. Ki lona lilato le li pahami ka ku fitisisa, ka mo li bonisezwa ki yena Jehova Mulimu ka sibili. Lilato le li cwalo li bonisa ku sa ba ni buitati ni hanyinyani mi kamita li zamaelela ni likezo z’e li paka.

6. Mulimu niha li ya pahami ku lu fita, kiñi se si lu konisa ku mu likanyisa?

⁶ Ki kona kalemeno ka kande kao ka lilato ka ka lu konisa ku likanyisa Mulimu ya cwalo. Ka ku ba batu ba ba kwatasi, ba ba si ka petahala, ili ba ba kona ku eza mafosisa, lu kana lwa nahana kuli ha lu koni ku kondisa mwa ku eza cwalo. Kono ki wo mutala o muñwi wa lilato la Jehova le lituna: Wa lemuha bufokoli bwa luna mi h’a tokwi kuli lu eze ka ku petahala. Wa ziba kuli ka nako ye, ha lu si ka petahala ni hanyinyani. (Samu 51:5) Ki ka lona libaka leo Samu 130:3, 4 ha i li: “[Muñ’a] Bupilo, ha u ka londoloza bumaswe, Mulena, ku ka pila mañi? Kono swalelo i fumanwa ku Wena.” Ee, Jehova ki “Mulimu ya na ni makeke ni musa, ya sa akufi ku halifa, ya tezi sishemo.” (Exoda 34:6) “Wena [Muñ’a] Bupilo u na ni musa, mi wa lata ku swalela.” (Samu 86:5) Ki taba kwa ku omba-omba! Kwa katulusa luli ku sebeleza Mulimu yo munde y’o ni ku ba ni pabalelo ya hae ye lilato, ili ye sishemo!

7. Lika z’a bupile Jehova li kona ku bonisa cwañi lilato la hae?

⁷ Lilato la Jehova hape li kona ku bonwa ku za bupile. Mu nahane lika ze nde ze ñata z’a lu file Jehova kuli lu ikole zona, ze cwale ka malundu a mande, mishitu, masa, ni mawate. U lu file lico ze ñata ze  shutana-shutana kuli lu tabele mo li utwahalela ni kuli li lu fepe. Hape, Jehova u file lipalisa ze shutana-shutana ze nde ili ze nunka hande hamoho ni lifolofolo ze makaza. N’a bupile lika ze n’e ka tabisa batu, niha n’a sa tokwi ku eza cwalo. Ki niti kuli ha lu pila mwa lifasi le li maswe le mwa muinelo wa luna wa ku sa petahala, ha lu koni ku ikola pupo ya hae ka ku tala. (Maroma 8:22) Kono mu nahane fela z’a ka lu ezeza Jehova mwa Paradaisi! Walisamu u lu kolwisa kuli: “U fumbutulula sata sa [hae], mi ze pila kaufela za kula.”—Samu 145:16.

8. Ki ufi mutala o mutuna ka ku fitisisa wa lilato la Jehova ku luna?

⁸ Ki ufi mutala o mutuna ka ku fitisisa wa lilato la Jehova kwa batu? Bibele i talusa kuli: “Mulimu u latile lifasi hahulu, mane u li file Mwan’a hae wa libanda, kuli mutu ufi kamba ufi ya lumela ku yena a si ke a shwa, kono a be ni bupilo bo bu sa feli.” (Joani 3:16) Kana Jehova n’a ezize cwalo ka libaka la kuli batu ki ba bande? Maroma 5:8 i alaba kuli: “Mulimu fo a tahisize kanya ya lilato la hae ku luna, kikuli lu sa li baezalibi Kreste u shwile bakeñisa luna.” Ee, Mulimu n’a lumile Mwan’a hae ya petehile ku taha fa lifasi-mubu kuli a to fana bupilo bwa hae ka ku ba sitabelo ilikuli a lu liulule kwa sibi ni lifu. (Mateu 20:28) Seo ne si kwaluzi nzila ya kuli batu ba ba lata Mulimu ba kone ku fumana bupilo bo bu sa feli. Ka litohonolo, lilato la Mulimu li fita kwa batu kaufela ba ba bata ku eza tato ya hae, kakuli Bibele i li: “Mulimu h’a yi ka ku keta batu; kono mwa sicaba ni sicaba, ya mu saba mi a eza se si lukile, u lumelelwa ki Yena.”—Likezo 10:34, 35.

9. Lu swanela ku amiwa cwañi ki taba ya kuli Jehova u fanile Mwan’a hae kuli a lu liulule?

⁹ Buniti bwa kuli Jehova u fanile Mwan’a hae kuli a lu  liulule, ili ku kwalula nzila ya kuli lu fumane bupilo bo bu sa feli, bu swanela ku ama cwañi mo lu itusiseza bupilo bwa luna cwale? Bu lukela ku ezisa lilato la luna la ku lata Jehova, yena Mulimu wa niti, ku ba le lituna ni ku fita. Ka nako ye swana, bu lukela ku lu ezisa ku bata ku teeleza ku Jesu, yena ya yemela Mulimu. “[Jesu] u shwezi batu kaufela kuli ba ba pila ba lisele ku ipilela, kono ba pilele ya shwile mi a zuhile bakeñisa bona.” (2 Makorinte 5:15) Ku latelela mwa n’a hatile Jesu ki ko kunde luli, kakuli n’a li mutala o munde mwa ku likanyisa lilato ni mufelañeke za Jehova! Seo si boniswa ki za n’a bulezi Jesu kwa baikokobezi kuli: “Mu tahe ku na mina kamukana ba ba katezi, ba ba imezwi, mi ni ka mi imulula. Mu itwese coko ya ka, mi mu itute ku na; kakuli ni na ni musa ni pilu ye bunolo, [mi] mu ka fumanela mioya ya mina pumulo. Kakuli coko ya ka i bubebe, mi mulwalo wa ka ha u na bukiti.”—Mateu 11:28-30.

Ku Bonisa Lilato ku Ba Bañwi

10. Lu kona ku bonisa lilato kwa Bakreste ba bañwi ka linzila mañi ze ñwi?

¹⁰ Lu kona ku bonisa cwañi kuli lu lata Bakreste ba bañwi sina mo lu latelwa ki Jehova ni Jesu? Mu lemuhe linzila ze ñata ze lu kona ku eza cwalo ka zona: “Lilato li na ni pilu-telele, li na ni musa; lilato ha li na pilu seta; lilato ha li ikankabeki; ha li ikuhumusi; ha li ezi ze swabisa; ha li yemi fa litukelo za lona; ha li konwi ku halifiswa; ha li kakanyi bumaswe; ha li tabeli ze si ka luka, kono li tabela ze na ni niti; li lwala linto kaufela; li na ni tumelo kwa linto kaufela; li na ni sepo mwa linto kaufela; li itiisa mwa linto kaufela. Lilato ha li na ku fela, ku ya ku ile.”—1 Makorinte 13:4-8; 1 Joani 3:14-18; 4:7-12.

11. Lu swanela ku bonisa lilato ku bomañi ba bañwi, mi ili ka nzila ifi?

 ¹¹ Lu swanela ku bonisa lilato ku bomañi ba bañwi, mi ili ka nzila ifi? Jesu n’a ize: “Mu ye cwale, mu lute macaba kaufela, mu ba kolobeze ka Libizo la Ndate, ni la Mwana, ni la Moya o Kenile; mu ba lute ku mamela ze ni mi laezi kaufela.” (Mateu 28:19, 20) Seo si ama ku taluseza ba bañwi ba ba si ka ba kale Bakreste sina luna taba ye nde ka za lifasi le linca le li li paradaisi le li taha. Jesu n’a bonisize hande kuli haki ba ba na ni litumelo ze swana ni za luna fela be lu swanela ku lata. N’a ize: “Ha mu latana [fela] ni ba ba latana ni mina, mu lukelwa ki mupuzo ufi? Ha ni li, batelisi ki mo ba ezeza ni bona? Mi ha mu itumelisa ni banabahabo mina fela, mu fita ba bañwi mwañi? Ha ni li, batelisi ki mo ba ezeza ni bona?”—Mateu 5:46, 47; 24:14; Magalata 6:10.

‘Mu Zamaye ka Libizo la Jehova’

12. Ki kabakalañi libizo la Mulimu ha li kona ku biziswa yena fela?

¹² Nzila ye ñwi ya ku lumbeka Mulimu wa niti ka yona ki ku ziba, ku itusisa, ni ku luta ba bañwi libizo la hae le li ipitezi, lona la Jehova. Walisamu n’a bulezi takazo ye tiile ye kuli: “Ba zibe batu, kuli ki Wena u nosi wa Libizo la [Jehova, NW], ki Wena Muambakani-ya-Pahami, wa lifasi kaufela.” (Samu 83:18) Libizo la Jehova li talusa “U Tahisa ku Ba Teñi.” Ki yena Muleli yo Mutuna, y’o kamita a peta milelo ya hae. Mi ki Mulimu wa niti fela ya kona ku ba ni lona libizo leo, kakuli batu ni kamuta ha ba koni ku ziba haiba ze ba eza li ka konda. (Jakobo 4:13, 14) Ki Jehova a nosi ya kona ku bulela kuli linzwi la hae ‘li ka sebeza’ z’a li luma ku yo eza. (Isaya 55:11) Ba bañata ba komokanga ha ba bona libizo la Mulimu lwa pili mwa Libibele za  bona ni ku ituta ze li talusa. (Exoda 6:3, NW) Kono zibo yeo i ka ba tusa fela haiba ba “zamaya ka Libizo la [Muñ’a] Bupilo Mulimu . . . ku ya ku ile.”—Mika 4:5.

13. Ku ziba Jehova ni ku zamaya ka libizo la hae ku amañi?

¹³ Samu 9:10 i bulela cwana ka za libizo la Mulimu: “Ba ba ziba Libizo la hao ba ka ku sepa.” Ku ziba fela ka za libizo la Jehova ha ku si ka likana. Kona ku nosi ha ku koni ku tahisa ku mu sepa. Ku ziba libizo la Mulimu ku talusa ku utwisisa kuli Jehova ki Mulimu ya cwañi, ku kuteka tamaiso ya hae, ku utwa litaelo za hae, ku mu sepa mwa lika kaufela. (Liproverbia 3:5, 6) Ka nzila ye swana, ku zamaya ka libizo la Jehova ku talusa ku ineela ku yena ni ku mu yemela ka ku ba yo muñwi wa balapeli ba hae. Ku talusa ku pila ka ku ya ka tato ya Mulimu. (Luka 10:27) Kana mwa eza cwalo?

14. Kuli lu sebeleze Jehova ku ya ku ile, ku tokwahalañi kwand’a ku susuezwa fela ki tamo?

¹⁴ Kuli lu sebeleze Jehova ku ya ku ile, ha lu lukeli fela ku susuezwa ki tamo. Muapositola Paulusi n’a elelize Timotea, ya n’a s’a sebelelize Jehova ka lilimo-limo kuli: “U itwaelise musebezi wa bulapeli.” (1 Timotea 4:7) Bulapeli bu zwelela kwa pilu ye itebuha mutu ya swanela ku lapelwa. “Musebezi wa bulapeli” ki likute le li tungile la ku kuteka yena Jehova ka sibili. U bonisa ku kumalela ku yena kabakala ku mu kuteka hahulu ni ku kuteka linzila za hae. U lu ezisa ku bata kuli mañi ni mañi a kuteke hahulu libizo la hae. Lu lukela ku eza musebezi wa bulapeli mwa bupilo bwa luna kuli ku ya ku ile lu zamaye ka libizo la Jehova, yena Mulimu a nosi wa niti.—Samu 37:4; 2 Pitrosi 3:11.

15. Lu kona cwañi ku lapela fela Mulimu a nosi?

¹⁵ Kuli Mulimu a amuhele sebelezo ya luna, lu lukela  ku lapela fela yena a nosi, ka ku ba kuli ki “Mulimu ya lifufa.” (Exoda 20:5) Ha lu koni ku lata Mulimu mi hape ni ku lata lifasi le li maswe, leo Satani a li mulimu wa lona. (Jakobo 4:4; 1 Joani 2:15-17) Jehova wa ziba hande-nde kuli mañi ni mañi wa luna u sweli ku lika ku ba mutu ya cwañi. (Jeremia 17:10) Haiba luli lwa lata ku luka, wa bona seo mi u ka lu tusa ku tiyela miliko ye lu talimana ni yona ka zazi. Ka ku lu tiisa ka moya wa hae o kenile, o m’ata, u ka lu konisa ku tula bumaswe bo bu atile mwa lifasi le. (2 Makorinte 4:7) Hape u ka lu tusa ku buluka sepo ya luna ye tiile ya bupilo bwa ku ya ku ile mwa paradaisi fa lifasi-mubu. Ki sepo kwa bunde yeo! Lu swanela ku itebuha hahulu yona ni ku itatela ku sebeleza Jehova, yena Mulimu wa niti, ya konahalisa yona sepo yeo.

16. Mu swanela ku bata ku ezañi ni ba bañwi ba ba eza bolule-lule?

¹⁶ Bolule-lule ba batu mwa lifasi kaufela ba amuhezi ka tabo memo ya walisamu ya n’a ñozi kuli: “Mu kopane ni na, ku lumbeka [Muñ’a] Bupilo, lu nuneke Libizo la hae hamoho.” (Samu 34:3) Jehova u mi mema kuli mu be mwahal’a batu ba bañata-ñata ba ba nze ba ekezeha ba ba sweli ku eza cwalo.

Lundululo

• Jehova ki mutu ya cwañi? Lu tusiwa cwañi ki ku utwisisa hande tulemeno twa hae?

• Lu kona cwañi ku tusa batu ba bañwi ku ituta niti ka za Mulimu?

• Ku ziba libizo la Jehova ni ku zamaya ka libizo la hae ku amañi?

Jehova, ka lilato la hae le lituna, ‘u ka fumbutula sata sa hae ni ku kulisa ze pila kaufela’

[Lipuzo za Tuto]

 [Maswaniso a fa likepe 14]

Jehova, ka lilato la hae le lituna, ‘u ka fumbutula sata sa hae ni ku kulisa ze pila kaufela’