Kauhanyo 21

Mulelo wa Jehova U Petiwa ka ku Tala

1, 2. (a) Mulelo wa Jehova ka za libupiwa za hae ze butali ki ufi? (b) Ki bomañi be ne ba li mwa lubasi lwa balapeli ba Mulimu ba ba swalisani?

LIBUPIWA kaufela za Mulimu ze butali li swalisani mwa ku lapela Mulimu a nosi wa niti, mi kaufel’a zona li ikola tukuluho ye tuna ka ku ba bana ba Mulimu—w’o ki ona mulelo wa Jehova o lilato. Hape ki yona nto ye ba lakaza ba ba lata ku luka.

² Jehova n’a kalile ku peta ona mulelo o mutuna w’o ha n’a kalile ku bupa lika. Pupo ya hae ya pili ne li Mwana y’o ku zwa fa n’a zuselizwe kwa bafu u bile “yena ye li ponahalo ya kanya ya [Mulimu], ni siswaniso sa se A li sona.” (Maheberu 1:1-3) Mwana y’o n’a li ya ipitezi, kakuli n’a bupilwe ki Mulimu a nosi fela. Hasamulaho, ba bañwi kaufela ne ba ka bupiwa ka yena Mwana y’o: ne ku ka bupiwa pili mangeloi mwa lihalimu, mi hasamulaho ni batu fa lifasi-mubu. (Jobo 38:7; Luka 3:38) Bona bao kaufela ne ba bile lubasi lu lu luñwi lwa mwa pupo kaufela. Ku bona bao kaufela, Jehova n’a li Mulimu, Muambakani-ya-Pahami, ni Ndat’a bona ya lilato.

3. (a) Kaufel’a luna lu hozizeñi kwa bashemi ba luna ba pili? (b) Jehova n’a ezelize bana ba Adama tukiso mañi ye lilato?

³ Bashemi ba luna ba pili ha ne ba atulezwi lifu kakuli ne ba ezize sibi ka bomu, ne ba lunduzwi mwa Edeni  ni ku fulalelwa ki Mulimu. Ne ba zwile mwa lubasi lwa hae lwa mwa pupo kamukana. (Genese 3:22-24; Deuteronoma 32:4, 5) Kaufel’a luna lu simuluhile ku bona, mi kacwalo lu pepilwe ni litakazo za sibi. Kono Jehova n’a ziba kuli ba bañwi kwa bana ba bo Adama ni Eva ne ba ka lata ku luka. Kacwalo n’a ezize tukiso ya kuli bona bao ba kone ku fumana “tukuluho ya kanya ya bana ba Mulimu.”—Maroma 8:20, 21.

Isilaele I Tuhela ku Shemubiwa

4. Jehova n’a file Isilaele wa kwakale tohonolo mañi?

⁴ Lilimo ze bat’o ba 2,500 ku zwa fa n’a bupezwi Adama, Jehova n’a file batu ba bañwi tohonolo ya ku ba ni silikani se si ipitezi ni Yena. N’a ketile Isilaele wa kwakale kuli i be batu ba hae mi a ba fa Mulao wa hae. (Genese 12:1, 2) A ba eza sicaba mi a itusisa bona kwa ku peta mulelo wa hae. (Deuteronoma 14:1, 2; Isaya 43:1) Kono ne ba sa unjamwi ki sibi ni lifu, mi kacwalo ne ba sa koni ku ba ni tukuluho ye tuna ye ne ba na ni yona bo Adama ni Eva pili.

5. Maisilaele ne ba latehezwi cwañi ki tohonolo ye ipitezi ya n’a ba file Mulimu?

⁵ Niteñi, Maisilaele ne ba shemubilwe ki Mulimu. Hape ne ba na ni buikalabelo bwa ku kuteka Jehova ka ku ba Ndat’a bona ni ku eza lika ka ku lumelelana ni mulelo wa hae. Jesu n’a koñomekile butokwa bwa kuli ba pete buikalabelo b’o. (Mateu 5:43-48) Kono sicaba sa Isilaele ne si palezwi ku eza cwalo. Majuda bao niha ne ba ize “Ndat’a luna ki a li muñwi, ki Yena Mulimu,” Jesu n’a zibahalize kuli likezo ni moya wa bona ne li sa bonisi cwalo. (Joani 8:41, 44, 47) Ka 33 C.E., Mulimu n’a felisize Mulao, mi silikani sa hae ni Isilaele se ne si  ipitezi sa fela. Kono kana seo ne si talusa kuli ku zwa f’o batu ne ba sa koni ku ba balikani ba Mulimu?

Ku Kubukanya ‘Linto za kwa Lihalimu’

6. Mulelo wa “sa n’a lelile” Mulimu s’a n’a bulezi Paulusi kwa Maefese 1:9, 10 ki ufi?

⁶ Muapositola Paulusi n’a bonisize kuli batu ba bañwi ne ba kona ku ba ni silikani se si ipitezi ni Mulimu. Ka mutala, ka za tukiso ya Jehova ili m’o ba ba na ni tumelo ne ba kona ku ba lilama za lubasi lwa Hae, Paulusi n’a ñozi kuli: “[Mulimu] u lu zibisize s’a n’a patile sa tato ya hae, s’a n’a lelile pili, ka ku lata kwa hae; kikuli, linako za n’a tomile ha li se li petahalile, a kubukanyeze linto kamukana ku Kreste, ni za kwa lihalimu ni za mwa lifasi.” (Maefese 1:9, 10) “S’a n’a lelile” seo si tomile ku Jesu Kreste. Ka yena, batu ba fita fa ku lumelelwa ki Mulimu. Palonyana ku bona bao ba na ni sepo ya ku ya kwa lihalimu. Ba bañata ni ku fita ba ka pila ku ya ku ile fa lifasi-mubu.

7. ‘Linto za kwa lihalimu’ ki bomañi?

⁷ Pili, ku kala ka Pentekonta ya 33 C.E., ne ku isizwe mamelelo kwa ‘linto za kwa lihalimu,’ f’o kikuli, ba ba ka busa ni Kreste mwa Mubuso wa lihalimu. Ka tumelo ya bona mwa sitabelo sa butokwa sa Jesu, Mulimu n’a ba beile ku ba ba ba lukile. (Maroma 5:1, 2) Nako ha ne inze i ya, Majuda ni balicaba ne ba kopanyizwe teñi mi ‘linto za kwa lihalimu,’ ne li ka ba palo ye eza 144,000. (Magalata 3:26-29; Sinulo 14:1) Ku bona bao, ki bomasiyaleti fela ba ba sa li fa lifasi.

Ku Kubukanya ‘Linto za mwa Lifasi’

8. ‘Linto za mwa lifasi’ ki bomañi, mi swalisano ya bona ni Jehova ki ifi?

⁸ Hape ne ku lelilwe ku kubukanya ‘linto za mwa lifasi.’  Batu ba ba eza bolule-lule cwale ba sweli ku kubukanyiwa mi ba na ni sepo ya ku to pila ku ya ku ile fa lifasi-mubu. Ka ku swalisana ni bacalifa ba Mubuso ba ba li bomasiyaleti, ba lumbeka libizo la Jehova ni ku pahamisa bulapeli bwa hae. (Isaya 2:2, 3; Zefania 3:9) Hape ba biza Jehova kuli “Ndate” kakuli ba lemuha kuli ki yena mubupi. Mi hape ba lumelelwa ki yena kabakala tumelo ya bona mwa mali a Jesu a n’a suluzwi. (Sinulo 7:9, 14) Kono ka ku ba kuli ha ba si ka petahala kale, ba ka kona fela ku ba bana ba Mulimu luli mwa nako ya kwapili.

9. Maroma 8:21 i fa sepiso mañi kwa batu?

⁹ Bona ba ba na ni sepo ya ku pila fa lifasi-mubu bao ba libelezi ka cisehelo muta batu ba ka “lukululwa kwa butanga bwa ku bola.” (Maroma 8:21) Tukuluho yeo i ka kalisa muta Kreste ni mpi ya hae ya kwa lihalimu ha se ba felisize ñalelwa ye tuna ka Armagedoni. Seo si ka tahisa ku sinyiwa kwa muinelo kaufela o maswe wa linto wa Satani, mi ku ka latelelwa ki limbuyoti za Puso ya Kreste ya Lilimo ze Sikiti.—Sinulo 19:17-21; 20:6.

10. Batanga ba Jehova ba ka opela pina mañi ya tumbo?

¹⁰ Batanga ba Jehova ba fa lifasi-mubu ba ka nyakalala luli ha ba ka swalisana mwa ku bulela manzwi a’ bulelwa ki batanga ba hae ba mwa lihalimu, ba ba zibahaza ka tabo kuli: “Mulena Mulimu Ya-Mata-Kaufela, misebezi ya hao ki ye mituna, ya komokisa. Wena Mulimu wa macaba, linzila za hao li lukile, ki za niti; ya si na ku saba ni ku lumbeka Libizo la hao, ikaba mañi Mulena? Kakuli Ya Kenile ki Wena a nosi; mi macaba kaufela a ka ta, a kubamele fapil’a hao; kakuli  likatulo za hao li zibisizwe patalaza.” (Sinulo 15:3, 4) Ee, batanga ba Jehova kaufela ba ka swalisana mwa ku lapela Mulimu a nosi wa niti. Nihaiba ba ba shwile ba ka zuswa ni ku fiwa kolo ya ku abana mwa ku lumbeka Jehova.—Likezo 24:15.

Tukuluho Ye Makaza Ye Taha

11. Ba ba ka punyuha ñalelwa ye tuna ba ka ikola tukuluho mañi ye makaza?

¹¹ Ñalelwa ye tuna, ye ka fela ka Armagedoni ha se i felisize bumaswe mwa lifasi, Satani Diabulosi h’a sa na ku ba “mulimu wa lifasi le.” Balapeli ba Jehova ha ba sa na ku tokwa ku lwanisa likukuezo za Satani ze maswe. (2 Makorinte 4:4; Sinulo 20:1, 2) Bulapeli bwa buhata ha bu sa na ku bulela buhata ka za Jehova ni ku aluhanya batu. Batanga ba Mulimu wa niti ha ba sa na ku nyandiswa ki mibuso ya butu. Ku ka ikoliwa tukuluho ye makaza luli!

12. Batu kaufela ba ka lukululwa cwañi kwa sibi ni ze si tahisa?

¹² Jesu ka ku ba yena “Ngunyan’a Mulimu ya zwisa sibi sa lifasi” u ka sebelisa sitabelo sa hae kwa ku felisa libi za batu. (Joani 1:29) Jesu ha n’a li fa lifasi, ha n’a swalela libi za mutu, n’a mu folisa, ili ku bonisa kuli u swalezwi luli. (Mateu 9:1-7; 15:30, 31) Ka nzila ye swana, Kreste Jesu, ka ku ba Mulena wa mwa lihalimu wa Mubuso wa Mulimu, ka makazo u ka folisa libofu, limumu, bosusu, lihole, ba ba katazeha mwa munahano, ni ba ba na ni matuku a mañwi kaufela. (Sinulo 21:3, 4) Ku ba ba ipeya ku utwa kaufela, “mulao wa sibi” u ka feliswa ilikuli mihupulo ni likezo za bona li be ze tabisa ku bona ni ku Mulimu. (Maroma 7:21-23) Lilimo ze Sikiti ha li ka yo felanga, ba kabe ba  fitisizwe fa ku ba batu ba ba petehile, ka ku ba ‘siswaniso ni ku swana’ kwa Mulimu a nosi wa niti.—Genese 1:26.

13. Kwa mafelelezo a Puso ya Lilimo ze Sikiti, Jesu u ka ezañi, mi ki lifi ze ka zwa mwateñi?

¹³ Kreste ha s’a fitisize batu kaufela fa ku petahala, u ka kutisa m’ata kaufela a n’a filwe ki Ndat’ahe kuli a pete musebezi w’o: “[U] ka beya mubuso mwa mata a Mulimu Ndate, h’a sa felisize bulena kaufela, ni mibuso kaufela, ni mata kaufela. Kakuli u swanezi ku busa ku isa f’a ka beela lila za hae kaufela mwatas’a mautu a hae.” (1 Makorinte 15:24, 25) Puso ya Lilimo ze Sikiti i kabe i petile mulelo wa yona ka ku tala; kacwalo ha ku sa na ku tokwahala kuli ku be ni mubusonyana w’o mwahal’a Jehova ni batu. Mi ka ku ba kuli sibi ni lifu li kabe li felisizwe mi batu ba kabe ba liuluzwi, Jesu h’a sa tokwa ku ba Muliululi. Bibele i talusa kuli: “Mwana u ka beiwa mwa mata a Hae, Yena ya beile linto kaufela mwatas’a hae, ilikuli Mulimu a [be] linto kamukana kwa batu kamukana.”—1 Makorinte 15:28.

14. Batu kaufela ba ba fitisizwe fa ku petahala ba ka tahelwa kiñi, mi ki kabakalañi?

¹⁴ Hamulaho wa zeo, batu ba ba fitisizwe fa ku petahala bao ba ka fiwa kolo ya ku bonisa kuli ba ketile ku sebeleza Mulimu a nosi wa niti ku ya ku ile. Kacwalo, Jehova a si ka ba amuhela kale ka ku tala kuli ba be bana ba hae, u ka tahiseza bona batu ba ba fitisizwe fa ku petahala bao tiko ya mafelelezo. Satani ni badimona ba hae ba ka zwiswa mwa tolongo. Seo ha si na ku tahisa bumaswe bo bu inelela ku ba ba lata Jehova ha buniti. Kono ba ba ituhelela ku sa utwa Jehova ka ku sa sepahala ba ka yundiselezwa hamoho ni yena  muipanguli wa pili y’o ni badimona ba hae.—Sinulo 20:7-10.

15. Ki muinelo mañi o ka ba teñi hape mwahal’a libupiwa za Jehova ze butali?

¹⁵ Ku tuha f’o, batu kaufela ba ba petehile be ne ba yemezi bubusi bwa Mulimu mwa nako ya tiko ya mafelelezo yeo ba ka amuhelwa ki Jehova ni ku ba bana ba hae. Ku zwa honaf’o, ba ka abana ka ku tala mwa tukuluho ye tuna ya bana ba Mulimu ka ku ba kalulo ya lubasi lwa Mulimu lwa mwa pupo kaufela. Libupiwa kaufela ze butali za mwa lihalimu ni mwa lifasi li ka swalisana hape mwa ku mu lapela ka ku ba yena Mulimu a nosi wa niti. Mulelo wa Jehova u ka be u petehile ka ku tala! Kana mwa tabela ku ba mwa lubasi lo lu tabile, lwa mwa pupo kaufela ili lwa ku ya ku ile l’o? Haiba mwa tabela, lu mi susueza ku utwa ze i bulela Bibele kwa 1 Joani 2:17 kuli: “Lifasi la fela, ni takazo ya lona; kono ya eza tato ya Mulimu u ina ku ya ku ile.”

Lundululo

• Petuhelo ya mwa Edeni i si ka ezahala kale, balapeli ba Jehova kaufela ne ba li mwa swalisano ye cwañi ni yena?

• Batanga ba Mulimu kaufela ba na ni buikalabelo mañi?

• Ki bomañi ba ba ka ba bana ba Mulimu, mi nto yeo i ama cwañi mulelo wa Mulimu ka za swalisano mwa ku lapela?

[Lipuzo za Tuto]

 [Siswaniso se si fa likepe 190]

Batu ba ba ipeya ku utwa ba ka ikola bupilo mwa paradaisi ya mwa lifasi kaufela