Swalisano mwa ku Lapela mwa Linako za Luna—I Talusañi?
Kauhanyo 1
Swalisano mwa ku Lapela mwa Linako za Luna—I Talusañi?
1, 2. (a) Ki kezahalo mañi ye makaza ye sweli ku ezahala mwa linako za luna? (b) Batu ba ba lukile ba na ni sepo mañi ye nde?
MWA lifasi kaufela, swalisano mwa ku lapela i sweli ku ezahala ka nzila ye makaza. Nto yeo i sweli ku kubukanya bolule-lule ba batu ba macaba kamukana, ni mishobo ni lipuo. Ka silimo ni silimo, ba bañata ba sweli ku kubukanywa. Bibele i talusa batu bao ku ba “lipaki” za Jehova mi hape ba bizwa kuli ki “buñata bo butuna.” Ba ‘sebeleza Mulimu musihali ni busihu.’ (Isaya 43:10-12; Sinulo 7:9-15) Ba ezezañi cwalo? Kakuli ba fitile fa ku ziba kuli Jehova ki yena Mulimu a nosi wa niti. Nto yeo i ba susueza ku pila ka ku ya ka lipimo za hae ze lukile. Hape, ba itutile kuli lu pila mwa “mazazi a maungulelo” a lifasi le li maswe le, kuli Mulimu u ka tuha a li sinya, ni kuli u ka li yolisa ka lifasi la hae le linca le li li paradaisi.—2 Timotea 3:1-5, 13; 2 Pitrosi 3:10-13.
2 Linzwi la Mulimu li sepisa kuli: “Ku sa na ni nakonyana ye nyinyani, mi ya maswe h’a sa na ku ba teñi . . . Kono ba ba ishuwa ba ka luwa naha, ba ka ikola kozo ye tuna.” (Samu 37:10, 11) “Ba ba na ni niti ba ka yola sanda sa naha, ni ku yaha mwateñi ku ya ku ile.” (Samu 37:29) “[Mulimu] u ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku; kakuli za pili li felile.”—Sinulo 21:4.
3. Ku swalisana kwa niti mwa ku lapela ku sweli ku tahiswa cwañi?
3 Ba ba sweli ku swalisana cwale mwa bulapeli bwa niti ba ka ba bona ba pili ku ba ba ka yaha mwa lifasi le linca leo. Ba itutile tato ya Mulimu mi ba i eza ka mo ba konela kaufela. Ka ku bonisa butokwa bwa seo, Jesu n’a ize: “Bupilo bo bu sa feli, kikuli ba ku zibe, Wena, Mulimu a nosi wa niti, ni y’o lumile, yena Jesu Kreste.” (Joani 17:3) Muapositola Joani n’a ñozi kuli: “Lifasi la fela, ni takazo ya lona; kono ya eza tato ya Mulimu u ina ku ya ku ile.”—1 Joani 2:17.
Ze Ku Talusa Luli
4. (a) Ku kubukanywa kwa batu ba bañata-ñata cwalo mwa ku lapela ka swalisano mwa linako za luna ku talusañi luli? (b) Bibele i talusa cwañi kona ku kubukanywa k’o?
4 Ku kubukanywa kwa batu ba bañata-ñata cwalo ku t’o lapela hamoho mwa linako za luna ku talusañi luli? Ki bupaki bo butuna bwa kuli lu fakaufi luli ni mafelelezo a lifasi le li maswe le, ni ku kalisa kwa lifasi la Mulimu le linca hamulaho fela wa f’o. Lu sweli lwa iponela talelezo ya bupolofita bwa Bibele bo ne bu polofitile ka za kona ku kubukanywa ko ku ipitezi k’o. Bupolofita bo buñwi bo bu cwalo bu li: “Kwa mazazi a kwapili [ona mazazi a maungulelo a] lilundu la [Muñ’a] Bupilo [bulapeli bwa hae bwa niti bo bu pahami] li ka tomwa fa ngo ya malundu [fahalimw’a bulapeli bo buñwi kaufela], . . . macaba a mañata a ka ya, inz’a li: A mu te, lu kambamele fa lilundu la [Muñ’a] Bupilo, kwa Ndu ya Mulimu wa Jakobo; u ka lu luta linzila za hae, lu zamaye mwa makululu a hae.”—Mika 4:1, 2; Samu 37:34.
5, 6. (a) Ku bonahala ka nzila ifi kuli macaba a sweli ku taha ku Jehova? (b) Lu swanela ku ipuza lipuzo mañi?
5 Hailif’o haki macaba mutumbi a sweli ku taha kwa ndu ya Jehova ya kwa moya ya ku lapelela teñi, bolule-lule ba batu ka buñwi ba ba zwa mwa macaba kaufela ba sweli ku eza cwalo. Ha ba nze ba ituta ka za mulelo wa Jehova Mulimu o lilato ni butu bwa hae bo bunde, lipilu za bona za susumezwa luli. Ka buikokobezo ba bata ku ziba z’a tokwa Mulimu ku bona. Tapelo ya bona i swana ni ya walisamu ya n’a ize: “U ni lute ku eza tato ya hao, kakuli u Mulimu wa ka.”—Samu 143:10.
6 Kana mwa ipona mu li mwahal’a buñata bo butuna bwa batu bao Jehova a sweli ku kopanya mwa ku lapela ka swalisano? Kana litaelo ze zwelela mwa linzwi la hae mu li amuhezi ka nzila ye bonisa kuli mwa lemuha luli kuli li zwelela ku Jehova? Mu ka “zamaya mwa makululu a hae” ku yo fita kai?
Mo I Tahisezwa
7. (a) Kwa mafelelezo ki batu ba ba fita kai ba ba ka swalisana mwa ku lapela? (b) Ki kabakala ku ba mulapeli wa Jehova ha ku li kwa ka putako cwale, mi lu kona cwañi ku tusa ba bañwi ku eza cwalo?
7 Mulelo wa Jehova ki wa kuli libupiwa ze butali kaufela li swalisane mwa bulapeli bwa niti. Lu lakaza hahulu kuli ku tahe lizazi f’o ba ba pila kaufela ba ka lapela Mulimu a nosi wa niti! (Samu 103:19-22) Kono nto yeo i si ka ezahala kale, Jehova u lukela pili ku yundisa kaufela ba ba hana ku eza tato ya hae ye lukile. Ka sishemo, u lemusa cimo ka za z’a ka eza, ilikuli batu kai ni kai ba kone ku ba ni kolo ya ku cinca linzila za bona. (Isaya 55:6, 7) Kacwalo mwa linako za luna, “ba masika kamukana, ni mishobo, ni lipuo, ni macaba” ba sweli ku fiwa kupo ye ya ka putako ye li: “Mu sabe Mulimu, mu mu lumbeke; kakuli nako ya hae ya ku atula i tile; mu mu kubamele, Ya ezize lihalimu ni lifasi, ni liwate, ni maweluwelu a mezi.” (Sinulo 14:6, 7) Kana mu amuhezi memo yeo? Haiba mu i amuhezi, u zibe mu na ni tohonolo ya ku mema ba bañwi kuli ni bona ba zibe ni ku lapela Mulimu wa niti.
8. Ha se lu itutile lituto za makalelo za Bibele, ki zwelopili mañi ye ñwi ye lu swanela ku satalalela ku eza?
8 Mulelo wa Jehova haki wa ku lapelwa ki batu ba ba bulela kuli ba lumela ku yena kono ili ba ba zwelapili ku ikezeza ze ba lata. Mulimu u bata kuli batu ba tale “zibo ya tato ya hae” ni ku bonisa seo mwa bupilo bwa bona. (Makolose 1:9, 10) Kacwalo, batu ba ba na ni buitebuho ba ba ituta lituto za makalelo za Bibele ba bata ku eza ka t’ata kuli ba be Bakreste ba ba hulile. Takazo ya bona ki ku fita fa ku ziba hahulu Jehova, ku ekeza kwa kutwisiso ya bona ya Linzwi la hae, ni ku li sebelisa ka ku tala mwa bupilo bwa bona. Ba bata ku bonisa tulemeno twa Ndat’a luna wa kwa lihalimu ni k’u nga lika ka mw’a l’i ngela. Seo si ba ezisa ku bata linzila za ku abana mwa musebezi w’a ezisa kuli u eziwe mwa lifasi mwa linako za luna. Kana ni mina ki yona takazo ya mina yeo?—Mareka 13:10; Maheberu 5:12–6:3.
9. Swalisano ye buniti i konahala cwañi cwale?
9 Bibele i bonisa kuli ba ba sebeleza Jehova ba lukela ku ba batu ba ba swalisani. (Maefese 4:1-3) Swalisano yeo i lukela ku ba teñi ka yona nako ye, niha lu pila mwa lifasi le li kauhani mi lu sa na ni ku lwanisa ku sa petahala kwa luna. Jesu n’a lapezi ka t’ata kuli balutiwa ba hae kaufela ba swalisane, ili ku ikola buñwi bo bu buniti. Seo ne si ka amañi? Pili, ne si ka ama ku ba ni silikani se sinde ni Jehova ni Mwan’a hae. Sa bubeli kikuli ne ba ka swalisana mwahal’a bona. (Joani 17:20, 21) Kuli ku be cwalo, kopano ya Sikreste ki yona kopano yeo Jehova a itusisa kwa ku luta batu ba hae.
Ki Lika Mañi Ze Tahisa Swalisano?
10. (a) Ha lu itusisa Bibele ka butu kwa ku fumana likalabo kwa lipuzo ze lu ama, lu hulisa lika mañi? (b) Mu tatube lisupo ze ekeza kwa swalisano ya Sikreste ka ku alaba lipuzo ze kolokisizwe mwa paragilafu ye.
10 Lisupo ze 7 ze tahisa swalisano mwa ku lapela li bonisizwe kwatasi. Ha mu nze mu alaba lipuzo ze zamaelela ni zona lisupo zeo, mu nahane ka m’o sisupo ni sisupo si amela silikani sa mina ni Jehova ni Bakreste ba bañwi. Ku nahanisisa fa lisupo zeo ni ku bala mañolo ao manzwi a ona a si ka boniswa ku ka ekeza kwa butali, nahanisiso, ni temuho ya mina ya Sikreste—ili tulemeno t’o kaufel’a luna lu tokwa. (Liproverbia 5:1, 2; Mafilipi 1:9-11) Mu nyakisise lisupo ze si li siñwi ka si li siñwi.
(1) Lwa lumela kuli Jehova u na ni tukelo ya ku toma lipimo ka za bunde ni bumaswe. “U sepe [Muñ’a] Bupilo ka pilu ya hao kaufela, mi u si ke wa tiyela fa butali bwa hao; u beye [Muñ’a] Bupilo mwa milelo ya hao kaufela, mi Yena u ka lukisa linzila za hao.”—Liproverbia 3:5, 6.
Ki kabakalañi ha lu swanela ku bata kelezo ni ketelelo ya Jehova ha lu eza likatulo? (Samu 146:3-5; Isaya 48:17)
(2) Lu na ni Linzwi la Mulimu le li lu etelela. “Nako ye mu amuhezi Linzwi la Mulimu le mu utwile ku luna, mu li amuhezi isi sina linzwi la mutu, kono sina Linzwi la Mulimu, mi ki lona luli, kifohe, li sebeza ka mata ku mina balumeli.”—1 Matesalonika 2:13.
Ku eza fela ze lu “ikutwa” kuli li lukile ku tahisa kozi mañi? (Liproverbia 14:12; Jeremia 10:23, 24; 17:9)
Haiba ha lu zibi kelezo ye fiwa ki Bibele ka za taba ye ñwi, lu swanela ku ezañi? (Liproverbia 2:3-5; 2 Timotea 3:16, 17)
(3) Kaufel’a luna lu fumana tuso kwa tukiso ye swana ya ku fepiwa kwa moya. “Bana ba hao kaufela i ka ba ba ba lutilwe ki Mulena.” (Isaya 54:13) “A lu babalelane, kuli lu susumezane mwa lilato ni mwa misebezi ye minde. Lu si ke lwa tuhela liputeho za luna, mo ba ezeza ba bañwi; kono lu kutazane, sihulu ka ku bona kuli lizazi le lituna [la sinyeho] li sutelezi.”—Maheberu 10:24, 25.
Ba ba sebelisa ka ku tala tukiso ya Jehova ya ku fepiwa kwa moya ba fumana lituso mañi? (Isaya 65:13, 14)
(4) Mueteleli wa luna ki Jesu Kreste, isi mutu ufi kamba ufi. “Mu si ke mwa bizwa Rabbi; kakuli Muluti wa mina ki a li muñwi, Yena Kreste; mi mina kaufela mu bana hamoho. Mi mu si ke mwa biza mutu fafasi kuli ki ndat’a mina; kakuli ndat’a mina ki a li muñwi, Yena ya inzi kwa lihalimu. Hape mu si ke mwa bizwa bazamaisi: kakuli Muzamaisi wa mina ki a li muñwi, Yena Kreste.”—Mateu 23:8-10.
Kana ku luna ku na ni ba ba swanela ku lumela kuli ki ba butokwa ku fita ba bañwi? (Maroma 3:23, 24; 12:3)
(5) Lu nga kuli Mubuso wa Mulimu ki yona sepo i nosi ya batu. “Cwale mina mu lapele cwana, mu li: Ndat’a luna ya kwa lihalimu, Libizo la hao a li be le li kenile; ku tahe mubuso wa hao; se si latwa ki Wena si ezwe mwa lifasi, mo si ezezwa kwa lihalimu; kono mu bate pili mubuso wa Mulimu ni Ku Luka kwa Hae, mi linto zeo kamukana mu ka li ekelezwa kwateñi.”—Mateu 6:9, 10, 33.
Ku ‘bata pili mubuso’ ku tusa cwañi mwa ku bukeleza swalisano ya luna? (Mika 4:3; 1 Joani 3:10-12)
(6) Moya o kenile u tahisa kwa balapeli ba Jehova tulemeno to tu tokwahala mwa ku ba ni swalisano ya Sikreste. “Muselo wa Moya ki lilato, ni tabo, ni kozo, ki pilu-telele, ni musa, ni bunde, ki busepahali, ni ku ishuwa, ni buiswalo.”—Magalata 5:22, 23.
Lu lukela ku ezañi kuli moya wa Mulimu u tahise muselo wa ona ku luna? (Likezo 5:32)
Ku ba ni moya wa Mulimu ku ama cwañi silikani sa luna ni Bakreste ba bañwi? (Joani 13:35; 1 Joani 4:8, 20, 21)
(7) Balapeli ba Mulimu ba niti kaufela ba abana mwa ku kutaza taba ye nde ya Mubuso wa hae. “Evangeli ye ya mubuso i ka bulelwa mwa lifasi kaufela, ibe bupaki mwa macaba kamukana; kihona ku ka taha mafelelezo.”—Mateu 24:14.
Lu lukela ku susuezwa kiñi kuli lu bate ku abana ka ku tala mwa musebezi wa ku kutaza? (Mateu 22:37-39; Maroma 10:10)
11. Ki lifi ze ezahala ha lu sebelisa liniti za Bibele mwa bupilo bwa luna?
11 Ku lapela Jehova ka swalisano ku lu suteleza hahulu ku yena mi ku lu konisa ku ba mwa sango se sinde ni balumeli sina luna. Samu 133:1 i li: “A mu bone, ku munati cwañi mi ku kateleha cwañi, batu ni banabahabo bona ha ba pila hamoho, mwa buñwi.” Kwa katulusa hakalo ku zwa mwa lifasi mo ku tezi buitati, buhule, ni mifilifili ni ku to kopana ni ba ba lata Jehova ha buniti ili ba ba utwa milao ya hae!
Mu Ambuke Likukuezo Ze Kauhanya
12. Ki kabakalañi ha lu tokwa ku ambuka moya wa buipanguli?
12 Kuli swalisano ya luna ya mwa lifasi kaufela ye butokwa i si ke ya sinyeha, lu lukela ku ambuka likukuezo ze kauhanya. Ye ñwi ya zona ki moya wa buipanguli ku Mulimu ni milao ya hae. Jehova u lu tusa ku u ambuka ka ku zibahaza mutahisi wa ona, yena Satani Diabulosi. (2 Makorinte 4:4; Sinulo 12:9) Satani ki yena ya n’a kukuelize bo Adama ni Eva ku sa utwa za n’a bulezi Mulimu ni ku eza likatulo ze n’e lwanisana ni tato ya Mulimu. Ze n’e zwile mwateñi ki butata ku bona ni luna. (Genese 3:1-6, 17-19) Lifasi le li tezi moya wa ku ipangula ku Mulimu ni kwa milao ya hae. Kacwalo lu tokwa ku tibela moya w’o kuli u si ke wa sebeza ku luna.
13. Ki lika mañi ze ka bonisa kuli luli lu itukiseza ku to pila mwa lifasi le linca la Mulimu la ku luka?
13 Ka mutala, mu nyakisise sepiso ya Jehova ye nyangumuna ya ku yolisa lifasi le li maswe le ka mahalimu a manca ni lifasi le linca “mo ku yahile Ku Luka.” (2 Pitrosi 3:13) Kana nto yeo ha i swaneli ku lu susueza ku kala ku itukiseza ku to pila mwa nako yeo, fo ku ka bela ni ku luka? Ku eza cwalo ku ama ku utwa kelezo ya Bibele ye ikutwahalela hande ye li: “Mu si ke mwa lata lifasi, nihaiba ze mwateñi mwa lifasi; mutu h’a lata lifasi, lilato la Ndate ha li yo ku yena.” (1 Joani 2:15) Kacwalo lu ambuka moya wa lifasi le, ili moya wa lona wa buipanguli, buitati bo bu fitelezi, buhule ni mifilifili. Lu itwaeza ku teeleza ku Jehova ni ku mu utwa ku zwelela kwa pilu, ku si na taba ni ku sa petahala kwa luna. Ze lu eza kaufela mwa bupilo bwa luna li bonisa kuli munahanelo wa luna ni milelo ya luna li tengamezi kwa ku eza tato ya Mulimu.—Samu 40:8.
14. (a) Ki kabakalañi ha ku li kwa butokwa ku amuhela cwale kolo ya ku ituta linzila za Jehova ni ku li latelela mwa bupilo bwa luna? (b) Mañolo a’ bonisizwe mwa paragilafu a lu ama cwañi ka butu?
14 Nako ye tomilwe ha i ka taha ya kuli Jehova a sinye muinelo wa linto o maswe wo ni ba ba lata za ona, h’a na ku liyeha. H’a na ku cinca nako yeo ku i isa kwapili kamba ku cinca lipimo za hae kuli a bukeleze ni ba ba sa lika ku kumalela kwa lifasi le kono hape inge ba sa kata-kata ku ituta tato ya Mulimu ni ku i eza. Ye ki yona nako ya k’u nga muhato! (Luka 13:23, 24; 17:32; 21:34-36) Kacwalo kwa tabisa hakalo ku bona buñata bo butuna ha ba amuhela kolo ya butokwa yeo, ili ku bata ka cisehelo litaelo z’a fa Jehova ka Linzwi ni ka kopano ya hae. Mi hape ba zamaya ka swalisano mwa makululu a hae ku liba mwa lifasi le linca! Mi ha lu ituta ze ñata ka za Jehova, lu ka fita fa ku mu lata hahulu ni ku bata ku mu sebeleza.
Lundululo
• Mulelo wa Jehova ka za bulapeli ki ufi?
• Ha se lu itutile lituto za makalelo za Bibele, ki zwelopili mañi ye ñwi ye lu swanela ku satalala ku eza?
• Luna ka butu lu kona ku ezañi kuli lu swalisane ni balapeli ba Jehova sina luna?
[Lipuzo za Tuto]
[Siswaniso se si fa likepe 4]
‘Ba ba ishuwa ba ka luwa naha ni ku ikola kozo ye tuna’
