Ya Pakilwe ki Bapolofita Kaufela
Kauhanyo 4
Ya Pakilwe ki Bapolofita Kaufela
1. Litaba ka za Jesu a si ka ba kale mutu wa nama li bonisañi ka za swalisano ya hae ni Jehova?
“NDATE u lata Mwana, mi u mu bonisa z’a eza kaufela.” (Joani 5:20) Mwana y’o n’a li mwa swalisano ye tuna luli ni Ndat’ahe, yena Jehova! Ku tiya kwa yona swalisano yeo ne ku kalile ka nako ya n’a bupilwe, ili lilimo ze ñata-ñata pili a si ka pepwa kale fa lifasi-mubu. N’a li yena Mwan’a Mulimu wa libanda, ili yena a nosi ya n’a bupilwe ki yena Mulimu ka sibili. Lika ze ñwi kaufela ze mwa lihalimu ni fa lifasi-mubu ne li bupilwe ka yena Mwana wa mweli ya latwa hahulu y’o. (Makolose 1:15, 16) Hape n’a bile Linzwi la Mulimu, kamba Mubuleli wa hae, ili Yena y’o ka yena tato ya Mulimu ne i zibahalizwe ku ba bañwi. Yena Mwana y’o ya n’a oliswa hahulu ki Mulimu, a ba yena Jesu Kreste.—Liproverbia 8:22-30; Joani 1:14, 18; 12:49, 50.
2. Bupolofita bwa Bibele bu bulezi ka za Jesu ku fita fa sipimo mañi?
2 Pili Mwan’a Mulimu wa mweli a si ka pepwa kale ka makazo ka ku ba mutu wa nama, ne ku ñozwi bupolofita bo buñata bo bu buyelezwi ka za hae. Muapositola Pitrosi n’a zibahalize ku Kornele kuli: “Bapolofita kaufela ba mu pakile.” (Likezo 10:43) Kalulo ya n’a ka peta Jesu ne i bonisizwe hahulu mwa Bibele kuli mane lingeloi la taluseza muapositola Joani kuli: “Ku paka Jesu, ki Moya wa bupolofita.” (Sinulo 19:10) Bupolofita b’o ne bu bonahalize hande kuli ki yena Mesiya. Ne bu hohezi mamelelo kwa likalulo ze shutana-shutana za n’a ka peta mwa ku taleleza milelo ya Mulimu. Lika zeo kaufela ki zona ze lu swanela ku iseza mamelelo kacenu.
Ze Ne Bu Zibahalize Bupolofita
3. (a) Mwa bupolofita bo bu kwa Genese 3:15, ki bomañi ba ba yemelwa ki noha, “musali,” ni ‘peu ya noha’? (b) Ki kabakalañi ‘ku pyatiwa toho kwa noha’ ha ne ku ka ba kwa butokwa kwa batanga ba Jehova?
3 Bupolofita bwa pili bo bu cwalo ki bo ne bu bulezwi hamulaho wa petuhelo ya mwa Edeni. Jehova n’a ize ku noha: “Ni ka beya toyano mwahal’a mina, ni wena ni musali, ni mwahal’a peu ya hao ni peu ya musali; peu yeo i ka ku pyata toho, wena u i lume fa lisito.” (Genese 3:15) Ya n’a bulelelwa bupolofita b’o luli ki Satani, yena ya n’a yemelwa ki noha. “Musali” ki kopano ya Jehova ye sepahala ya mwa lihalimu, ye swana sina musali ya sepahala ku yena. ‘Peu ya noha’ i kopanyeleza mangeloi ni batu kaufela ba ba bonisa moya wa Satani, ili ba ba lwanisa Jehova ni batu ba Hae. ‘Ku pyata toho ya noha’ ku talusa sinyeho ye ka tahela Satani wa muipanguli kwa mafelelezo, yena ya n’a sawanile Jehova ni ku tahiseza batu maswabi. Kono kalulo ya pili ya yona “peu” ye n’e ka pyata yeo ki nto mañi? Ka lilimo ze mianda-nda, nto yeo ne i bile “kunutu.”—Maroma 16:20, 25, 26.
4. Lusika lwa n’a simuluhile ku lona Jesu ne lu tusize cwañi mwa ku zibahaza kuli ki yena Peu ye n’e sepisizwe?
4 Hamulaho wa lilimo ze 2,000 za litaba za batu, Jehova n’a file tunango to tuñwi. N’a bonisize kuli Peu ne i ka zwelela mwa lusika lwa Abrahama. (Genese 22:15-18) Kono lusika lo ne lu ka tahisa Peu ne lu ka itinga, isi fa lusika lwa nama, kono fa keto ya Mulimu. Abrahama niha n’a lata hahulu Ishimaele mwan’a hae, ya n’a pepilwe ku Hagare, Jehova n’a ize: “Bulikani bwa ka ni ka bu tiisa ni Isaka, y’a ka ku pepela Sara.” (Genese 17:18-21) Hasamulaho, bulikani b’o ne bu talelelizwe, isi ku Isau mweli wa Isaka, kono ku Jakobo, mi y’o ki yena ya n’a simuluzi masika a’ 12 a Isilaele. (Genese 28:10-14) Nako ha i nze i ya, ne ku bonisizwe kuli Peu ne i ka pepelwa mwa lusika lwa Juda, mwa lubasi lwa Davida.—Genese 49:10; 1 Makolonika 17:3, 4, 11-14.
5. Jesu ha n’a kalile bukombwa bwa hae bwa fa lifasi-mubu, kiñi se ne si bonahalize hande kuli ne li yena Mesiya?
5 Ki lika mañi ze ñwi ze n’e filwe ze n’e ka zibahaza Peu? Bibele ne i zibahalize kuli mwa Betelehema ki mona mwa n’a ka pepelwa Peu ye sepisizwe ka ku ba mutu wa nama. Nto yeo ne i bulelezwi cimo ili lilimo ze 700 pili i si ka ezahala kale. Hape ne i zibahalize kuli Peu y’o n’a s’a bile teñi ku zwa “mwa linako ze si na makalelo,” ili ku zwelela fa n’a bupezwi mwa lihalimu. (Mika 5:2) Hape, nako luli fa n’a ka bonahalela fa lifasi-mubu ka ku ba Mesiya ni yona ne i bulezwi cimo, ka mupolofita Daniele. (Daniele 9:24-26) Mi Jesu ha n’a tozizwe ka moya o kenile, ili ku ba Mutoziwa wa Jehova, linzwi la Mulimu tota la zibahaza ka ku utwahala hande kuli ne li yena Mwan’a Hae. (Mateu 3:16, 17) Peu n’a zibahalizwe! Kacwalo, Filipi n’a kona ku bulela ka buikolwiso kuli: “Lu mu fumani ye ba ñozi za hae Mushe ni bapolofita, ki Jesu.”—Joani 1:45.
6. (a) Ka ku ya ka Luka 24:17, balateleli ba Jesu ne ba til’o lemuhañi? (b) Ki mañi ya li kalulo ya pili ya ‘peu ya musali,’ mi ku pyata kwa hae toho ya musali ku talusañi?
6 Hasamulaho, balateleli ba Jesu ne ba til’o lemuha kuli mwa Mañolo a buyelezwi ne ku bulezwi ze ñata-ñata ka za hae ka bupolofita. (Luka 24:27) Ne ku til’o utwahala hande ni ku fita kuli Jesu ki yena kalulo ya pili ya ‘peu ya musali,’ yena ya ka pyata toho ya noha, ili ku bulaelelela Satani. Ka Jesu, lisepiso za Mulimu kaufela kwa batu, lika ze nde kaufela ze lu lakaza hahulu, li ka talelezwa.—2 Makorinte 1:20.
7. Kwand’a ku ziba kuli ki mañi Ya amiwa mwa bupolofita, ki nto mañi ye ñwi ye tusa ku i lemuha?
7 Ku ziba zeo ku swanela ku lu ama cwañi? Bibele i bulela ka za sikombwa wa Muetopia ya n’a balile bo buñwi bwa bupolofita b’o ka za ku taha kwa Muliululi ni Mesiya. Ka ku ba ya n’a zingehile, a buza Filipi ya n’a li mukutazi wa evangeli kuli: “Ni bulelele [muñ’a] taba ye bulelwa ki mupolofita.” Kono sikombwa y’o ha s’a filwe kalabo, n’a si ka feleza taba f’o. Ha s’a teelelize hande-nde kwa taluso ya n’a file Filipi, munna y’o a lemuha kuli ku itebuha bupolofita b’o ne ku tokwa kuli a eze se siñwi. N’a utwisisize kuli n’a tokwa ku kolobezwa. (Likezo 8:32-38; Isaya 53:3-9) Kana ni luna l’unga lika cwalo?
8. (a) Abrahama ha n’a likile ku fana Isaka ku ba sitabelo ne ku swanisezañi? (b) Ki kabakalañi Jehova ha n’a bulelezi Abrahama kuli macaba kaufela n’a ka fuyaulwa ka Peu, mi nto yeo i sebeza cwañi ku luna kacenu?
8 Hape mu hupule taba ye nyangumuna ya Abrahama ha n’a likile ku eza Isaka mwan’a hae sitabelo, yena mwan’a hae a nosi ya n’a pepilwe ku Sara. (Genese 22:1-18) Nto yeo ne i bonisize sa n’a ka eza Jehova, ili ku fana Mwan’a hae wa libanda: “Mulimu u latile lifasi hahulu, mane u li file Mwan’a hae wa libanda, kuli mutu ufi kamba ufi ya lumela ku yena a si ke a shwa, kono a be ni bupilo bo bu sa feli.” (Joani 3:16) Seo si lu kolwisa kuli sina Jehova mwa n’a fanezi Mwan’a hae wa libanda ilikuli a taleleze mulelo wa Hae, hape U ka “lu fa ni linto kaufela.” (Maroma 8:32) Lu tokwa ku ezañi? Ka mo ku ñolezwi kwa Genese 22:18 (NW), Jehova n’a bulelezi Abrahama kuli macaba kaufela n’a ka fuyaulwa ka Peu, “kakuli [Abrahama n’a] utwile linzwi la [Mulimu].” Ni luna lu tokwa ku teeleza ku Jehova ni ku Mwan’a hae: “Ya lumela ku Mwana u na ni bupilo bo bu sa feli; mi ya sa lumeli ku Mwana h’a na ku bona bupilo, kono buhali bwa Mulimu bu inzi fahalimw’a hae.”—Joani 3:36.
9. Haiba lwa itebuha sepo ya bupilo bo bu sa feli ye konile ku ba teñi ka sitabelo sa Jesu, lu ka ezañi?
9 Haiba lwa itebuha sepo ya bupilo bo bu sa feli ye konile ku ba teñi ka sitabelo sa Jesu, lu ka bata ku eza lika zeo Jehova a lu bulelezi ka Jesu. Lika zeo li tomile fa lilato la luna la ku lata Mulimu ni batu ba bañwi. (Mateu 22:37-39) Jesu n’a bonisize kuli ku lata Jehova kwa luna ku ka lu susumeza ku luta ba bañwi ku “mamela [zeo Jesu a lu] laezi kaufela.” (Mateu 28:19, 20) Mi lu bata ku abana lona lilato leo ni batanga ba Jehova ba bañwi ka ku “kopana ni bona” kamita. (Maheberu 10:25, NW; Magalata 6:10) Hape, ka ku teeleza ku Mulimu ni Mwan’a hae, ha lu swaneli ku nahana kuli ba bata kuli lu eze lika ka ku petahala. Maheberu 4:15 i bulela kuli Jesu, ka ku ba Muprisita wa luna yo Mutuna, u kona ku “lu utwela butuku.” Nto yeo ya omba-omba luli, sihulu ha lu lapela ku Mulimu ka Kreste kuli a lu tuse ku tula bufokoli bwa luna!—Mateu 6:12.
Mu Bonise Tumelo ku Kreste
10. Ki kabakalañi ha i li fela Jesu ya kona ku tahisa puluso?
10 Muapositola Pitrosi ha s’a taluselize ba kuta ye tuna ya Sijuda mwa Jerusalema kuli bupolofita bwa Bibele ne bu talelelizwe ku Jesu, a feza ka ku bulela ka m’ata kuli: “Ku piliswa, ha ku yo ku yo muñwi; kakuli ha ku na Libizo li sili mwatas’a lihalimu, le ba filwe batu, le lu ka piliswa ka lona.” (Likezo 4:12) Ka ku ba kuli bana ba Adama kaufela ki baezalibi, lifu la bona ha li na butokwa bo bu kona ku itusiswa mwa ku liulula mutu ufi kamba ufi. Kono Jesu n’a li ya petehile, mi bupilo bwa hae ne bu kona ku ba sitabelo. (Samu 49:6-9; Maheberu 2:9) N’a file Mulimu sitabelo se ne si likanelela hande ni bupilo bo bu petehile b’o Adama n’a latehezwi ki bona. (1 Timotea 2:5, 6) Seo ne si tahisize kuli lu kone ku fumana bupilo bo bu sa feli mwa lifasi le linca la Mulimu.
11. Mu taluse ka m’o sitabelo sa Jesu si kona ku lu tuseza hahulu.
11 Hape sitabelo ne si tahisize kuli lu kone ku amuhela lituso ze ñwi, nihaiba ka yona nako ye. Ka mutala, niha lu li baezalibi, sitabelo sa Jesu si konahalisa kuli lu be ni lizwalo le li kenile kabakala ku swalelwa libi. Seo si fitela kwahule zeo matabelo a lifolofolo a n’a tokwiwa ki Mulao wa Mushe n’a ezelize Maisilaele. (Likezo 13:38, 39; Maheberu 9:13, 14; 10:22) Niteñi, ku ba ni swalelo ye cwalo ku tokwa kuli lu itumelele kuli luli lwa tokwa sitabelo sa Kreste: “Ha lu bulela kuli ha lu na sibi, lwa ipuma, mi niti ha i yo ku luna. Ha lu ipulela libi za luna, Mulimu ki Ya sepahala, Ya lukile, kuli a lu swalele libi, mi a lu tapise bumaswe kaufela.”—1 Joani 1:8, 9.
12. Ki kabakalañi kolobezo ya ku nweliswa mwa mezi ha i li nto ya butokwa kwa ku ba ni lizwalo le linde ku Mulimu?
12 Baezalibi ba kona cwañi ku bonisa kuli ba lumela ku Kreste ni sitabelo sa hae? Mwa lilimo za mwanda wa pili batu ha ne ba bile balumeli, ne ba bonisize cwalo patalaza. Ka nzila ifi? Ne ba kolobelizwe. Kabakalañi? Kakuli Jesu n’a laezi kuli balutiwa ba hae kaufela ba kolobezwe. (Mateu 28:19, 20; Likezo 8:12; 18:8) Haiba pilu ya mutu i susuezwa ki lika ze nde zeo Jehova a ezize ka Jesu, u k’a nga muhato. U ka eza licinceho ze tokwahala kaufela mwa bupilo bwa hae, ku ineela ku Mulimu ka tapelo, ni ku bonisa buineelo bwa hae ka ku kolobezwa ka ku nweliswa mwa mezi. H’a bonisa tumelo ka yona nzila yeo, u “itama kwa lizwalo le linde ku Mulimu.”—1 Pitrosi 3:21.
13. Haiba lu lemuha kuli lu ezize sibi, lu swanela ku ezañi ka za teñi, mi ki kabakalañi?
13 Kono ni hamulaho wa f’o, lu ka zwelapili ku ba ni tulemeno twa sibi. Ki sifi se lu kona ku eza f’o? Muapositola Joani n’a ize: “Ni mi ñolela litaba zeo kuli mu si ke mwa eza sibi. Mi mutu h’a ezize sibi, lu na ni Muyemeli fapil’a Ndate, ki Jesu Kreste Ya-Lukile. Yena ki sitabelo se si lifa libi za luna; mi isi za luna fela, kono ni za lifasi kamukana.” (1 Joani 2:1, 2) Kana f’o ku talusa kuli ku si na taba ni ze lu ezize kaufela, haiba lu lapela ku Mulimu ku kupa swalelo, lika kaufela li ka ba hande? Kutokwa. Swalelo i kona fela ku taha ha lu baka luli. Hape lu kana lwa tokwa tuso ya ba mwa puteho ya Sikreste be se ba hulile, ili ba ba na ni yeloseli. Lu lukela ku itumelela bumaswe bwa se ne si ezizwe ni ku inyaza luli ka za teñi ilikuli lu kone ku lika ka mo lu konela kaufela kuli lu si ke lwa kutela ku si eza. (Likezo 3:19; Jakobo 5:13-16) Haiba lu eza cwalo, lwa kona ku kolwa kuli Jesu u ka lu tusa ni kuli Jehova u ka lu tabela hape.
14. (a) Mu taluse nzila ya butokwa yeo ka yona sitabelo sa Jesu si lu tuselize. (b) Haiba luli lu na ni tumelo, lu ka ezañi?
14 Sitabelo sa Jesu si konahalisize kuli ba “mutapinyana” ba kone ku ba ni bupilo bo bu sa feli kwa lihalimu. Bona bao ki bona ba ba li kalulo ya bubeli ya peu ye bulezwi kwa Genese 3:15. (Luka 12:32; Magalata 3:26-29) Hape si konahalisize kuli bolule b’a mashumi-shumi ba kone ku ba ni bupilo bo bu sa feli mwa paradaisi fa lifasi-mubu. (Samu 37:29; Sinulo 20:11, 12; 21:3, 4) Bupilo bo bu sa feli ki “mpo ya sishemo sa Mulimu . . . ka Jesu Kreste Mulen’a luna.” (Maroma 6:23; Maefese 2:8-10) Haiba lu na ni tumelo ku yona mpo yeo mi lwa itebuha nzila ye ne i konahalisizwe ka yona, lu ka bonisa cwalo. Ka ku bona ka m’o Jehova a itusiselize hahulu Jesu mwa ku peta tato ya Hae ni mo ku bezi kwa butokwa kuli kaufel’a luna lu latelele hahulu mutala wa Jesu, lu ka eza bukombwa bwa Sikreste ku ba o muñwi wa misebezi ya butokwa ka ku fitisisa mwa bupilo bwa luna. Tumelo ya luna i ka bonwa ka buikolwiso bo lu bulelela ba bañwi ka bona ka za mpo ye tuna ye zwa ku Mulimu.—Likezo 20:24.
15. Tumelo ku Jesu Kreste i tahisa cwañi swalisano?
15 Tumelo ye cwalo i tahisa swalisano ye nde luli! Ka yona, lu sutelela hahulu ku Jehova, ku Mwan’a hae, ni ku sutelelana mwa puteho ya Sikreste. (1 Joani 3:23, 24) I lu ezisa ku tabela kuli Jehova ka sishemo u file Mwan’a hae “Libizo le li fahalimw’a mabizo kamukana [kwand’a fahalimw’a libizo la Mulimu fela]; kuli ka Libizo la Jesu, mañwele kaufela a kubame, kwa lihalimu ni mwa lifasi ni mwatas’a lifasi, mi malimi kamukana a bulele kuli Jesu Kreste ki Mulena, ibe kanya ku Mulimu Ndate.”—Mafilipi 2:9-11.
Lundululo
• Mesiya ha n’a tile, ki kabakalañi ha ne ku bile bunolo ku be ne ba lumela Linzwi la Mulimu ku mu ziba?
• Ki lika mañi ze ñwi ze lu swanela ku eza kuli lu bonise kuli lwa itebuha sitabelo sa Jesu?
• Sitabelo sa Jesu se si lu tusize ka linzila lifi? Nto yeo i lu tusa cwañi ha lu lapela ku Jehova kuli a swalele libi za luna?
[Lipuzo za Tuto]
[Siswaniso se si fa likepe 36]
Jesu n’a bulelezi balateleli ba hae kuli ba lute ba bañwi ku mamela litaelo za Mulimu
