Bupilo bwa Mina Bu Libile Kai?

• Batu ba bañata ba patehisizwe hahulu ki mipateho ya ka zazi kuli mane ha ba nahanangi hahulu za ko ba libile.

• Bibele i lu taluseza ka za lika ze makaza ze ka ezahala kwapili. Hape i lemusa ka za likezahalo ze filikanya ze ka ba teñi mwa likopano za butu mwa lifasi kaufela. Kuli lu fumane tuso ni ku pima kozi, ku butokwa hahulu kuli lu eze se siñwi.

• Ku na ni batu ba ba ziba ze i bulela Bibele, ba ba likanga ku i latelela, kono ili ba ba ituhelelanga ku yaululwa ki mipateho ya mwa bupilo.

• Kana mwa tabela mo bu zamaela bupilo bwa mina? Ha mu lelanga ku eza lika, kana mwa nahananga ka za mo li kona ku amela milelo ya mina ye mituna mwa bupilo?

[Mbokisi/Maswaniso a fa likepe 9]

Za Butokwa Hahulu ku Mina Ki Lifi?

Ne mu ka kolohanya cwañi lika ze latelela? Mu li kolohanye ka ku ya ka butokwa bwa zona.

Buñata bwa zona li na ni sibaka sa zona mwa bupilo, kono ha ne mu ka keta, sa pili neikaba sifi? sa bubeli bo? ni cwalo-cwalo.

․․․ Za ku itabisa ka zona/ku ishumusa

․․․ Mubeleko wa ka

․․․ Buikangulo bwa ka

․․․ Tabo ya ka

․․․ Sinyalana ni na

․․․ Bashemi ba ka

․․․ Bana ba ka

․․․ Ndu ye nde, liapalo ze nde

․․․ Ku kondisa ku ze ni eza kaufela

․․․ Ku lapela Mulimu

 [Mbokisi fa likepe 10, 11]

Kana Liketo za Mina Li Mi Libisize Ko Mu Bata Luli?

MU NYAKISISE LIPUZO ZE

ZA KU ITABISA KA ZONA/KU ISHUMUSA: Kana ze ni itabisa ka zona za ni katulusanga? Kana li amanga likezo ze kona ku ni holofaza kamba mane ku ni tahiseza buyanga ku isa lifu? Kana ki likezo ze bonahala ku ba za ku itabisa ka zona mwendi ka lihoranyana fela kono ili ze tahisa masitapilu a ka nako ye telele? Ze ni keta ku itabisa ka zona niha li ka ba ze nde, kana ni sinyezanga hahulu fateñi nako kuli mane ha ni fumanangi nako ya ku eza lika za butokwa?

MUBELEKO WA KA: Kana ki fona fo ni ipiliseza kamba wa ni busa luli? Kana wa ni imeza kuli mane buikangulo bwa ka bu mwa kozi? Kana ze ni tabela, ki ku sebeza lihora ze ñata kamba ku ba ni sinyalana ni na kamba bana ba ka? Haiba mubelekisi wa ka a bata kuli ni eze lika ze sa lumelezwi ki lizwalo la ka, kamba ze filikanya za kwa moya, kana ni ka eza mw’a batela ilikuli ni si ke na zwiswa fa mubeleko?

BUIKANGULO BWA KA: Kana na bu keshebisa, kamba kana na bu babalela ka nako kaufela? Kana ni ambolanga za bona ka nako kaufela? Kana mo ni bu tokomelela kwa bonisa kuli na iyakatwa lubasi lwa ka?

TABO YA KA: Kana yeo ki yona nto ya pili ye ni iyakatwa? Kana ni i’ nga ku ba ya butokwa ku fita tabo ya sinyalana ni na, kamba ya lubasi lwa ka? Kana mo ni i batela kwa lumelelana ni ku ba mulapeli wa Mulimu wa niti?

SINYALANA NI NA: Kana n’i nganga sinyalana ni na ku ba mulikan’a ka ka linako fela fo ni tabelela cwalo? Kana na kuteka sinyalana ni na, ka mw’a lukela ku kutekelwa? Kana tumelo ku Mulimu ya zamaisa mo ni ngela sinyalana ni na?

BASHEMI BA KA: Haiba ni sa li mwanana, kana na utwa bashemi ba ka, ili ku ba alaba ka likute, ku eza misebezi ye ni filwe, ku fita fa lapa ka nako ye tomilwe, ku ambuka liango ni likezo ze ba hanisa? Haiba se ni hulile, kana na teelezanga ka likute kwa bashemi ba ka, ni ku ba fa tuso ye swanela ha ku tokwahala cwalo? Kana mo ni ba ezeza ki ka ku ya ka mo ni latela kamba ka taelo ya Linzwi la Mulimu?

BANA BA KA: Kana na ikutwa kuli ni na ni buikalabelo bwa ku luta bana ba ka likuka ze swanela za muzamao, kamba kana ni libelela kuli ba ka itutela zona kwa sikolo? Kana na tolanga ni bana ba ka, kamba kana ni libelela kuli libapaliso, TV, kamba kompyuta li ka ba patehisa? Kana na kalimelanga bana ba ka kamita ha ba keshebisa litaelo za Mulimu, kamba kana ni ezanga cwalo sihulu ha ni nyemile?

NDU YE NDE, LIAPALO ZE NDE: Ki lifi ze zamaisa mo ni iyakatelwa ponahalo ya ka ni ya maluwo a ka? Kana ki mo ni bata ku bonelwa ki bomuyahwa ni na? Kana ki mo lu pilela lubasi lwa ka? Kana ki taba ya kuli ni mulapeli wa Mulimu?

KU KONDISA KU ZE NI EZA KAUFELA: Kana ni ikutwa kuli ku eza lika hande ki kwa butokwa? Kana ni satalalanga kuli ibe na ya eza hande ka ku fitisisa? Mutu yo muñwi h’a eza hande ku ni fita, kana na filikananga?

KU LAPELA MULIMU: Kana ku tabelwa ki Mulimu ku butokwa ku na ku fita ku tabelwa ki sinyalana ni na, bana ba ka, bashemi ba ka, kamba mubelekisi wa ka? Kana ne ni k’a nga ku pila mwa mbombolelwa ku ba kwa butokwa ku fita ku sebeleza Mulimu?

 MU NYAKISISISE HANDE KELEZO YA MWA BIBELE

Mulimu u butokwa cwañi ku mina?

Muekelesia 12:13: “Saba Mulimu, mi u mamele milao ya hae. Kakuli ki yona swanelo kaufela ya mutu.”

MU IPUZE KULI: Kana bupilo bwa ka bwa bonisa kuli w’o ki ona mubonelo wa ka? Kana ku utwa litaelo za Mulimu kw’a zamaisa mo ni ezeza misebezi ya fa lapa, ya kwa mubeleko, ya kwa sikolo? Kamba kana lika ze ñwi kamba mipateho ya mwa bupilo ki yona ye zamaisa ka za haiba na tomanga nako ya ku lapela Mulimu?

Bulikani bwa mina ni Mulimu ki bo bu cwañi?

Liproverbia 3:5, 6: “U sepe [Muñ’a] Bupilo ka pilu ya hao kaufela, mi u si ke wa tiyela fa butali bwa hao; u beye [Muñ’a] Bupilo mwa milelo ya hao kaufela, mi Yena u ka lukisa linzila za hao.”

Mateu 4:10: “Kubamela Mulena Mulimu wa hao, mi u sebeleze Yena a nosi.”

MU IPUZE KULI: Kana cwalo ki mona mo ni ikutwela ka za Mulimu? Kana likezo za ka za ka zazi, ni mo ni tatululelanga butata, kwa bonisa kuli ni na ni sepo ni buipeyo bo bu cwalo?

Ku bala ni ku ituta Bibele ku butokwa cwañi ku mina?

Joani 17:3: “Bupilo bo bu sa feli, kikuli ba ku zibe, Wena, Mulimu a nosi wa niti, ni y’o lumile, yena Jesu Kreste.”

MU IPUZE KULI: Kana butokwa bo n’i nga ka bona ku bala Linzwi la Mulimu ni ku nahanisisa ka za lona bwa bonisa kuli luli na lumela cwalo?

Ku fumaneha kwa mikopono ya puteho ya Sikreste ku butokwa cwañi ku mina?

Maheberu 10:24, 25: “A lu babalelane, kuli lu susumezane mwa lilato ni mwa misebezi ye minde. Lu si ke lwa tuhela liputeho za luna, . . . sihulu ka ku bona kuli lizazi le lituna li sutelezi.”

Samu 122:1: “Na taba ha ba ni bulelela, ba li: A lu yeñi mwa Ndu ya [Muñ’a] Bupilo.”

MU IPUZE KULI: Kana mo ni pilela kwa bonisa kuli na itebuha taelo yeo ye mwa Linzwi la Mulimu? Mwa kweli ye felile, kana ku na ni mikopano ya Sikreste ye ne ni shutile kakuli ne ni tuhelezi nto ye ñwi ku ni patehisa?

Kana mwa abananga ka cisehelo mwa ku taluseza ba bañwi ka za Mulimu ni milelo ya hae?

Mateu 24:14: “Evangeli ye ya mubuso i ka bulelwa mwa lifasi kaufela, ibe bupaki . . . , kihona ku ka taha mafelelezo.”

Mateu 28:19, 20: “Mu ye cwale, mu lute macaba kaufela, . . . mu ba lute ku mamela ze ni mi laezi kaufela.”

Samu 96:2: “Mu opelele [Muñ’a] Bupilo, mu lumbeke Libizo la hae; mu taluse ku pilisa kwa hae ka zazi ni zazi.”

MU IPUZE KULI: Kana musebezi w’o ki wa butokwa mwa bupilo bwa ka ka mo ku swanehela? Kana buikatazo bo ni eza teñi bwa bonisa kuli na kolwa kuli lu pila mwa linako ze ipitezi?