Lifasi Le, Li Libile Kai?

Butata bo butuna ni likezahalo ze komokisa se li ona makande a ka zazi mwa lifasi kaufela! Muinelo w’o u talusañi?

SILELEZO YA KA BUTU: Limbomba li tunyisezwa mwa misika. Baluti ni bana ba sikolo ba kunupelwa mwa likolo. Bashemi ha ba talima fela ku sili, limbututu za uzwiwa. Musihali-tuna, basali ni banna ba macembele ba uzwezwa.

KU ZA BULAPELI: Likeleke li yemela likwata za batu ba ba lwana. Ba bahulu ba bulapeli ba bulelwa kuli ba abani mwa lindwa za mikowa. Baprisita ba hapeleza banana ku eza tobali ni bona; keleke i pata taba yeo. Palo ya batu ba ba fumaneha kwa lisebelezo i kutela mwatasi; miyaho ya bulapeli ya lekiswa.

MAINO: Likota za mishitu za lemakiwa kabakala lipisinisi. Babotana ba lemaka likota za ku ola. Mezi a mwa masima a silafezi, h’a swaneli ku nwiwa. Manyalala a likampani ze panga lika, ni miyambelo ye minca li sinya litapi. Moya wa ku buyela u silafezi mi wa fipeza.

 KU IPILISA: Ku bihiwa kuli kwa mboela wa Africa, mutu ni mutu u hola mali a manyinyani-nyinyani ka silimo. Mukwañuli wa baeteleli ba likampani u wisa lipisinisi, ku siya ba bañata ba si na mibeleko. Busholi bu tahisa kuli beñi ba likampani ba luze mali e ba belekezi ka nako ye telele.

LUKUPWE: Batu ba ba bat’o eza 800,000,000 mwa lifasi kaufela kamita ba mwa tala.

LINDWA: Batu ba ba fitelela 100,000,000 ne ba shwezi mwa lindwa mwa lilimo za ma-1900. Lilwaniso ze m’ata za nyukiliya z’e li teñi li kona ku tutula batu hañata-ñata. Lindwa za mwahal’a bayahi ba linaha. Likezo za businyi ze tahisa sabo ye tuna li ama lifasi kaufela.

MATUKU A’ YAMBUKELA NI A MAÑWI: Ku kala ka 1918, butuku bo bu bizwa Spanish flu ne bu bulaile batu b’a 21,000,000. AIDS se i li yona “ncwa ye m’ata ka ku fitisisa haisali.” Kansa ni matuku a pilu a tahisa matomola mwa lifasi kaufela.

Ha mu bona lipiho ze ñwi za makande, kana ha li swalisani ni ze ñwi? Kamba kana ki kalulo ya lika ze sweli ku ezahala mwa lifasi, ze na ni taluso ye tuna?

 [Mbokisi/Siswaniso se si fa likepe 5]

Kana Mulimu Luli Wa Iyakatwa Luna?

Ha ba filikanywa ki lika ze komokisa hahulu kamba ku latehelwa ki nto ye tuna, batu ba bañata ba komoka libaka Mulimu h’a sa ezi se siñwi ili ku tibela lika ze cwalo.

Mulimu wa iyakatwa luli. Yona nako ye, u fa ketelelo ye sepeha ni kimululo ya niti. (Mateu 11:28-30; 2 Timotea 3:16, 17) U ezize litukiso za ku feliseleza mifilifili, makulanu, ni lifu. Litukiso za hae li bonisa kuli u iyakatwa batu, isi fela ba sicaba si li siñwi, kono ili macaba, ni lipuo, ni malimi kaufela.—Likezo 10:34, 35.

Luna lu iyakatwa za Mulimu ku fitisa kai? Kana mwa ziba kuli ya bupile lifasi ni lihalimu ki mañi? Libizo la hae ki mañi? Mulelo wa hae ki ufi? Lipuzo zeo u li alaba mwa Bibele. Mwa Bibele u lu taluseza z’a eza kuli a felise mifilifili, matuku, ni mafu. Ze lu tokwa ku eza ki lifi kuli li lu tuse? Lu tokwa ku ituta za hae ni milelo ya hae. Lu kona fela ku libelela ku tusiwa ki litukiso za hae haiba lu lumela ku yena. (Joani 3:16; Maheberu 11:6) Hape ku eza z’a tokwa ku butokwa. (1 Joani 5:3) Kana mwa iyakatwa hahulu Mulimu kuli mwa kona ku eza cwalo?

Kuli lu utwisise libaka Mulimu h’a tuhelela miinelo ya cwale, ku na ni taba ya butokwa ye lu tokwa ku utwisisa. Bibele y’a talusa taba yeo. Taba yeo i fumaneha fa likepe 15 la yona hatiso ye.