Lifasi Le Linca L’a Sepisize Mulimu

BIBELE, lona Linzwi la Mulimu le li ñozwi, li lu fa sepo ha li bulela kuli: “Ka sepiso ya hae, lu talimezi lihalimu le linca, ni lifasi le linca, mo ku yahile Ku Luka.”—2 Pitrosi 3:13.

“Lihalimu le linca” ki nto mañi? Bibele ha i bulelanga za lihalimu, i amanga kwa bubusi. (Likezo 7:49) “Lihalimu le linca” ki mulonga o munca o ka busa lifasi. Ki o munca kakuli u ka yola lipuso za cwale; mi hape ki muhato o munca mwa ku petwa kwa mulelo wa Mulimu. Ki ona Mubuso wa n’a lu lutile Jesu ku lapelela. (Mateu 6:10) Bakeñisa kuli Mulimu ki yena Muñ’a ona mi u pila kwa lihalimu, u bizwa kuli ki “mubuso wa kwa lihalimu.”—Mateu 7:21.

“Lifasi le linca” ki nto mañi? Haki lifasi-mubu le linca, kakuli Bibele i bonisa hande kuli fa lifasi-mubu ku ka piliwa ku ya ku ile. “Lifasi le linca” ki nyangela ye nca ya batu. Li ka ba le linca kakuli ba ba maswe ba ka yundiswa. (Liproverbia 2:21, 22) Kaufela ba ba ka pila ka nako yeo ba ka kuteka ni ku utwa Mubupi mi ba ka pila ka ku latelela litaelo za hae. (Samu 22:27) Batu ba macaba kaufela ba memiwa ku ituta zona litaelo zeo ni ku pila ka zona honafa. Kana mwa eza cwalo?

Mwa lifasi le linca la Mulimu, mañi ni mañi u ka kuteka puso ya Hae. Kana lilato la mina la ku lata Mulimu la mi susumeza ku mu utwa? (1 Joani 5:3) Kana kwa iponahaza kuli mwa eza cwalo fa lapa? kwa mubeleko kamba kwa sikolo? ka mo mu pilela bupilo bwa mina?

Mwa lifasi le linca leo, batu kaufela ba ka swalisana mwa ku lapela Mulimu wa niti. Kana mwa lapela Mubupi wa lihalimu ni lifasi? Kana bulapeli bwa mina bwa mi swalisanisa luli ni balapeli ba bañwi ba macaba, mishobo, ni lipuo kaufela?—Samu 86:9, 10; Isaya 2:2-4; Zefania 3:9.

 [Mbokisi fa likepe 17]

Mulimu Ya Sepisa Zona Lika Ze

Ki Mubupi wa mahalimu ni lifasi-mubu le. Ki yena y’o Jesu Kreste n’a bulezi ka za hae kuli ki “Mulimu a nosi wa niti.”—Joani 17:3.

Buñata bwa batu ba kuteka milimu ye ba ipangezi. Ba bañata ba kubamela maswaniso a’ si na bupilo. Ba bañwi ba kanyisa likopano za batu, lituto za batu, kamba litakazo za bona beñi. Nihaiba ku ba ba bulela kuli ba itusisa Bibele haki kaufel’a bona ba ba kuteka libizo la yena y’o Bibele i bulela kuli ki ‘Mulimu wa niti.’—Deuteronoma 4:35, NW.

Yena Mubupi ka sibili u ipulela kuli: “Ki Na [Jehova, NW], ki lona Libizo la ka.” (Isaya 42:5, 8) Lona libizo leo li fumaneha ibat’o ba h’a 7,000 mwa Bibele mwa lipuo ze ne i ñozwi ku yona kwa makalelo. Jesu Kreste n’a lutile balateleli ba hae ku lapela kuli: “Ndat’a luna ya kwa lihalimu, libizo la hao a li be le li kenile.”—Mateu 6:9.

Mulimu wa niti y’o ki Mulimu ya cwañi? U ipulela kuli u na ni ‘makeke ni musa, ha akufi ku halifa, u tezi sishemo, u na ni niti’ mi ki ya sa latuli mulatu wa ba ba lobile litaelo za hae ka bomu mi wa ba ota. (Exoda 34:6, 7) Mw’a sebelisanezi ni batu ku paka hande kuli mw’a taluselizwe cwalo ki mona mwa inezi luli.

Libizo ni yena mutu ka sibili ya yemelwa ki libizo leo, li swanela ku ngiwa ka bukeni. Ka ku ba Mubupi ni Muambakani ya Pahami, lwa lukela ku mu utwa ni ku mu lapela. Kana mwa eza cwalo ka butu?

 [Mbokisi/Siswaniso se si fa likepe 18]

Ki Lifi Licinceho Ze Ka Tahiswa ki ‘Lihalimu Le Linca ni Lifasi Le Linca’?

Lifasi li ka fetulwa ku ba Paradaisi Luka 23:43

Nyangela ya lifasi kaufela ili m’o ba Joani 13:35;

macaba, mishobo, ni lipuo kaufela ba ka Sinulo 7:9, 10

swalisana ka lilato

Kozo mwa lifasi kaufela, buiketo Samu 37:10, 11;

sakata ku bote Mika 4:3, 4

Musebezi o tabisa, lico ze ñata Isaya 25:6; 65:17, 21-23

Makulanu, maswabi, nilifu li ka feliswa Isaya 25:8;

Sinulo 21:1, 4

Lifasi li ka swalisana mwa ku lapela Sinulo 15:3, 4

Mulimu wa niti

 [Mbokisi/Maswaniso a fa likepe 19]

Kana Mu Ka Ba Teñi?

Mulimu ha koni ku puma!—Tite 1:2.

Jehova u li: “Linzwi la ka . . . ha li na ku kutela ku Na mukungulu, li si ka sebeza se si latwa ki Na, ni ku eza ze ni li lumezi.”—Isaya 55:11.

Jehova s’a kalile kale ku bupa “lihalimu le linca, ni lifasi le linca.” Mulonga wa kwa lihamu se u kalile kale ku busa. Mutomo wa “lifasi le linca” se u tomilwe kale.

Buka ya Sinulo ha se i sinuzi za lika ze ñwi ze komokisa zeo “lihalimu le linca ni lifasi le linca” li ka tahiseza batu, i bonisa manzwi a Mulimu ka sibili, yena Muambakani ya Pahami, a’ li: “A mu bone, linto kaufela ni li eza ze nca.” Hape u li: “Ñola; kakuli manzwi ao a sepahala, ki a niti.”—Sinulo 21:1, 5.

Puzo ya butokwa ki ya kuli, Kana lwa eza licinceho ze tokwahala kuli lu be ba ba swanela ku ba mwa “lifasi le linca” le li ka busiwa ki “lihalimu le linca”?