‘Ne Ba Si Ka Lemuha Se Siñwi’

KU KESHEBISA litemuso ku kona ku tahisa kozi.

Batu ba mwa tolopo ya Darwin, mwa Australia ne ba patehile ku itukiseza mukiti ka 1974 milangu ne i lilile ku lemusa batu kuli ne ku taha liñungwa. Kono Darwin ne i si ka sinyiwa ki liñungwa ka lilimo ze 30. Cwale ka nako ye ne i ka sinyiwa cwañi? Buñata bwa batu ne ba si ka nga kuli yeo ne li kozi luli ku fitela moya o m’ata ha u kala ku yayaula lituwa ni ku wisaka mamota a mandu mo ne ba kubukani batu. Ha li to pazulanga habusa, tolopo yeo ne se i li fela matota.

Mwa Colombia ka November 1985, lilundu ne li tunyize. Litwa ni mezi a kangezi ne li shengunukile ni ku tahisa sileze se ne si kwahezi batu ba ba fitelela 20,000 mwa tolopo ya Armero. Kana batu ne ba si ka fiwa temuso? Lilundu leo ne li nyungani ka likweli-kweli. Kono kabakala ku twaela ku pila bukaufi ni lilundu le li cwalo, buñata bwa batu mwa Armero ne ba si ka isa teñi pilu. Baeteleli ne ba filwe temuso ya kuli kozi ne i tuha i taha, kono ne ba si ka lemusa batu ka za teñi. Fa wayalesi ne ku filwe lizibiso za kuli batu ba si ke ba ikalelwa. Masipika a mwa keleke ne a itusisizwe kwa ku eleza batu kuli ba si ke ba tula lipilu. Manzibwana ne ku utwahezi milumo ye mibeli ye mituna. Kana ne mu ka siya libyana za mina ni ku baleha? Ki ba sikai fela be ne ba ezize cwalo mi kozi ya tulukela batu.

Bocaziba hañata ba zibelanga cimo ka ku nepahala ko ku ka ba ni lizikinyeho. Kono ki ka siwela ba ziba nako tenyene ye li ka ezahala. Ka 1999, lizikinyeho mwa lifasi kaufela ne li bulaile batu ba ba bat’o eza 20,000. Buñata bwa be ne ba bulailwe bao ne ba nahana kuli nto yeo ne i si ke ya ezahala ku bona.

Mu Nga Cwañi Litemuso Ze Zwa ku Mulimu ka Sibili?

Bibele ne i talusize hande kale-kale likezahalo ze ne ka ba sisupo sa mazazi a maungulelo. Ka za taluso yeo, Bibele i lu susueza ku nahana za “mazazi a Nuwe.” ‘Mwa mazazi ale, munda o mutuna u si ka bonahala kale,’ batu ne ba patehile ku eza za bona sina kamita,  nihaike ku si na ku kakanya ne ba bilaela za mifilifili ye n’e atile. Haili ka za temuso yeo Mulimu n’a file ka mutang’a hae Nuwe, batu ne “ba si ka lemuha se siñwi, mane munda wa kena, mi wa ba kukisa kaufela.” (Mateu 24:37-39) Kana ne mu kabe mu utwile temuso? Kana mwa i utwa cwale?

Ku cwañi kambe ne mu pila mwa Sodoma, bukaufi ni Liwate la Dead Sea, mwa miteñi ya Lota, mwan’a muhabo Abrahama? Naha ne i li inge paradaisi. Munzi n’o fumile hahulu. Batu ne ba ikezeza mo ba latela. Mwa miteñi ya Lota, “batu ne ba ca, ba nwa, ba leka, ba lekisa, ba cala likota, ba yaha mandu.” Batu ba mwa miteñi yeo ne li baitamaeli ba ba swabisa. Kana ne mu kabe mu utwile temuso Lota ha n’a nyazize likezo ze maswe? Kana ne mu kabe mu teelelize ha n’a ka mi taluseza kuli Mulimu u atuzi ku sinya munzi wa Sodoma? Kamba kana ne mu ka nga temuso yeo inge sisomo, sina mo ne ba i ngezi makwenyan’a Lota? Kana ne mu ka kala ku mata kono ni ku itemuna, sina mwa n’a ezelize musal’a Lota? Nihaike ba bañwi ne ba si ka lumela temuso, lizazi la n’a zwile Lota mwa Sodoma, “lihalimu la nelisa mulilo ni sulufura, mi ba bulaiwa.”—Luka 17:28, 29.

Ba bañata miteñi ye ha ba lemuhi se siñwi. Kono mitala yeo i bulukilwe mwa Linzwi la Mulimu kuli i be temuso ku luna, ku lu susueza kuli lu LIBELELE!

[Mbokisi/Siswaniso se si fa likepe 22]

Kana Luli Ne Ku Bile ni Munda O Mutuna?

Bahanyezi ba bañata b’a latula. Kono Bibele i bulela kuli ne u bile teñi luli.

Jesu Kreste ka sibili n’a bulezi ka za ona, mi ha ne u ezahala n’a li teñi, n’a u bona inz’a li kwa lihalimu.

[Mbokisi/Siswaniso se si fa likepe 23]

Kana Sodoma ni Gomora Ne Li Sinyizwe Luli?

Lika ze pumbuzwi li paka nto yeo.

Litaba za kwaikale za silifasi za bulela za teñi.

Jesu Kreste n’a pakile taba yeo, mi ze ne ezahezi li bulezwi mwa libuka ze 14 za Bibele.