Zeo Kaufela Li Talusañi?

JESU KRESTE n’a ize: “Ku fela kwa lifasi” ne ku ka zibahala ka lindwa, tala, matuku a’ yambukela, ni lizikinyeho.—Mateu 24:1-8; Luka 21:10, 11.

Ku zwa ka 1914, bupilo bu tatafalizwe ki lindwa za mwahal’a macaba ni mwahal’a mikowa, hañata kabakala kuli ba bulapeli ba ikenyanga ku za bupolitiki. Mi nako ye, lindwa li tahiswa ki likezo za businyi ze tahisa sabo ye tuna.

Ku si na taba ni zwelopili ku za sayansi, bolule-lule ba batu mwa lifasi kaufela ba mwa tala ye tuna. Ka silimo, bolule-lule ba batu ba bulaiwanga ki tala.

Matuku a’ yambukela hahulu a’ atile, ni ona ki kalulo ya sisupo sa n’a file Jesu. Hamulaho wa Ndwa ya Lifasi ya Pili, butuku bo bu yambukela bwa fikele ne bu bulaile batu ba ba fitelela 21,000,000. Ka ku shutana ni matuku a n’a banga teñi kale, a n’a sa yambangi hahulu, bona ne bu yambile linaha ni lioli kaufela. Mwa lifasi cwale ku fumaneha AIDS, mi matuku a mañwi a cwale ka TB, malaria, bubofu, ni zeze, a atile mwa linaha ze zwelapili.

Kutwi ka silimo, ku banga ni lizikinyeho ze likiti-kiti za butuna bo bu shutana-shutana. Ku si na taba ni lipangaliko ze li teñi ni mibihelo ya makande ya ngana, makande a mazazi a, ki a likozi ze tahiswa ki lizikinyeho ze ezahala mwa libaka mo ku fumaneha batu ba bañata.

Bibele hape ne i polofitile kuli: “U zibe kuli, mwa mazazi a maungulelo, ku ka taha linako ze tata. Kakuli batu ba ka ba baitati, ba ba lata mali, ba ba itumbaeta ni ku ikuhumusa; ikaba banyefuli, ba ba sa utwi bashemi ba bona, ba ba si na buitumelo, ba ba hana za Mulimu; ikaba batu ba ba si na lilato la taho, ba ba na ni ñole, ba ba seba batu ka buhata, ba ba sa koni ku iswala, ba ba na ni buhali, ba ba toya batu ba bande; ikaba lishembi ni matanya, ni ba ba inuneka, ni ba ba lata minyaka, isi Mulimu; ikaba batu ba ba eza mukwa wa bulumeli, kono se si eza mata a bulumeli ba si latuzi. U sabe kwa batu ba ba cwalo.”—2 Timotea 3:1-5.

Kana haki niti kuli lu pila mwa “linako ze tata”?

Kana mu lemuhile kuli batu hahulu-hulu ki baitati, ba ba lata mali, ni bainuneki?

Ki mañi ya kona ku latula kuli mwa lifasi ku tezi batu ba ba lata kuli lika li ezwe ka mo ba batela, kono ili ba ba si na buitumelo, ba ba na ni ñole, ba ba hana za Mulimu?

Kana mwa ziba kuli ku sa utwa bashemi ni ku sa ba ni lilato ku ekezehile hahulu, isi mwa libaka ze ñwi fela, kono ili mwa lifasi kaufela?

 Kaniti mwa ziba kuli lu pila mwa lifasi m’o ku lata hahulu minyaka ku atile hahulu, kono ha ku na lilato la bunde. Bibele i talusa cwalo moya o ne u ka ba teñi mwa “mazazi a maungulelo.”

Kana ku na ni ze ñwi hape ze tokwahala ze ka lu bonisa nako ye lu pila ku yona? Jesu hape n’a polofitile kuli ka yona nako ye, taba ye nde ya Mubuso wa Mulimu ne i ka kutazwa mwa lifasi kaufela. (Mateu 24:14) Kana nto yeo i sweli ya ezwa?

Tora ya ku Libelela, hatiso ye bulela litaba za mwa Bibele, yeo mulelo wa yona ki wa ku hasanya taba ye nde ya Mubuso wa Jehova, i hatiswa mwa lipuo ze ñata ku fita lihatiso ze ñwi kaufela.

Silimo ni silimo, Lipaki za Jehova ba tandanga likiti-kiti za lihora mwa  ku paka ka butu ku ba bañwi ka za Mubuso wa Mulimu.

Lipaki za Jehova cwale ba hatisa lihatiso ze talusa litaba za mwa Bibele mwa lipuo z’e 400, ku kopanyeleza ni mwa lipuo ze bulelwa ki batu ba banyinyani, ba kwahule. Lipaki za Jehova ba fitisize taba ye nde kwa macaba kaufela; hape ba kutalize mwa lioli ni libaka ze sa balwi ka ku ya ka za bupolitiki. Mwa linaha ze ñata, ba na ni tukiso ya ku luta Bibele kamita.

Kaniti, taba ye nde ya Mubuso wa Mulimu i kutazwa mwa lifasi kaufela, isi ka mulelo wa ku fetula lifasi, kono ili ku fa bupaki. Kai ni kai, batu ba fiwa kolo ya ku bonisa haiba ba na ni taba ni ya bupile lifasi ni lihalimu, ni haiba ba ka kuteka milao ya hae ni ku bonisa kuli ba lata ba bañwi.—Luka 10:25-27; Sinulo 4:11.

Honafa, Mubuso wa Mulimu u ka zwisa ba ba maswe kaufela mwa lifasi ni ku li eza paradaisi kamukan’a lona.—Luka 23:43.

[Mbokisi fa likepe 6]

Mazazi a Maungulelo a Ñi?

Haki mazazi a maungulelo a batu. Bibele i fa sepo ya bupilo bo bu sa feli ku ba ba eza tato ya Mulimu.—Joani 3:16, 36; 1 Joani 2:17.

Haki mazazi a maungulelo a lifasi. Linzwi la Mulimu li sepisa kuli lifasi li ka ina ku ya ku ile.—Samu 37:29; 104:5; Isaya 45:18.

Kono a, ki mazazi a maungulelo a muinelo wo wa linto wa mifilifili, o si na lilato, ni ba ba u kumalela.—Liproverbia 2:21, 22.

[Mbokisi/Maswaniso a fa likepe 7

Kana Bibele Luli Ki Linzwi la Mulimu?

Bapolofita ba mwa Bibele ne ba kuta-kutezi ku ñola kuli: ‘Muñ’a Bupilo s’a bulela ki se.’ (Isaya 43:14; Jeremia 2:2) Nihaiba Jesu Kreste, Mwan’a Mulimu, n’a koñomekile kuli za n’a bulela n’a sa ‘ipuleleli zona ili yena.’ (Joani 14:10) Yona Bibele ka sibili i bulela hande kuli: “Liñolo kamukana li tahile ka Moya wa Mulimu.”—2 Timotea 3:16.

Ba United Bible Societies ba biha kuli Bibele i hatisizwe mwa lipuo ze 2,200. Ha ku na buka ye ñwi ye hatisizwe mwa lipuo ze kuma f’o. Likopi ze fitelela 4 bilioni za Bibele se li hasanyizwe. Ha ku na buka ye ñwi ye hasanyizwe ku fita f’o. Kana ha mu libeleli kuli cwalo kona mo ku swanela ku bela ka za litaba ze zwa ku Mulimu, ze ya kwa batu kaufela?

Puhisano ka butungi ka za bupaki bwa kuli Bibele i tahile ka moya wa Mulimu mu kona ku i fumana mwa buka ya The Bible—God’s Word or Man’s?, ye hatisizwe ki Lipaki za Jehova.

Ha mu ka bala Bibele ka ku lumela kuli luli ki Linzwi la Mulimu, mu ka fumana tuso ye tuna.

[Mbokisi/Maswaniso a fa likepe 8

Mubuso wa Mulimu Ki Nto Mañi?

Ki mulonga wa kwa lihalimu o bonisa bubusi bwa Jehova, Mulimu wa niti, yena Mubupi wa lihalimu ni lifasi. —Jeremia 10:10, 12.

Bibele i bonisa kuli Mulimu u file Jesu Kreste m’ata a bubusi ao. (Sinulo 11:15) Ha n’a li fa lifasi, Jesu n’a bonisize kuli Mulimu na s’a mu file kale m’ata a makaza, ili m’ata a n’a mu konisa ku zamaisa lika za ka taho ze cwale ka moya, ni ze ñwi cwalo, ku folisa matuku kaufela, mane ni ku zusa bafu. (Mateu 9:2-8; Mareka 4:37-41; Joani 11:11-44) Bupolofita bwa mwa Bibele bo ne bu filwe ka moya ne bu bonisize kuli Mulimu hape n’a ka mu fa “bulena, kanya, ni mubuso, kuli ba mishobo kaufela, ni ba macaba, ni ba lipuo kaufela ba t’o mu sebeleza.” (Daniele 7:13, 14) Mulonga w’o u bizwa kuli ki Mubuso wa kwa lihalimu; ka nako ye, Jesu Kreste u buseza kwa lihalimu.

[Maswaniso a fa likepe 7]

Ku kutazwa kwa taba ye nde mwa lifasi kaufela