Ki mwa miinelo mañi mo musali wa Sikreste a swanela ku apala se siñwi kwa toho mwa litaba za bulapeli, mi ki kabakalañi? Ha lu nyakisiseñi za naa susumelizwe ku bulela Paulusi ka moya o kenile fa taba ye. Paulusi u lu fa ketelelo ye lu tusa ku eza liketo ze nde ze kuteka Mulimu. (1 Makorinte 11:3-16) U patulula lisupo ze taalu ze lu swanela ku nyakisisa: (1) Likezo za eza musali ze tokwa kuli a apale se siñwi kwa toho, (2) Miinelo mwa tokwa ku apala se siñwi kwa toho, ni (3) Mabaka haa mamela sikuka seo.

Likezo. Paulusi u talusa likezo ze peli: ku lapela ni ku polofita. (Litimana 4, 5) Ku lapela ki ku ambola ku Jehova ka likute. Mi ku polofita kacenu ku kona ku talusa misebezi kaufela ya ku luta Bibele ya eza Mukreste. Kono kana Paulusi u talusa kuli musali u swanela ku apala se siñwi kwa toho nako kaufela haa lapela kamba haa luta Bibele? Batili. Miinelo ki yona ye ka tokwa kuli a apale se siñwi kwa toho kamba kutokwa.

Miinelo. Manzwi a Paulusi a ama kwa miinelo ye mibeli—mwa lubasi ni mwa puteho. Paulusi u li: “Muuna ki toho ya musali . . . Musali kaufela haa lapela kamba a polofita a si na saa apezi kwa  toho, u shubula toho ya hae.” (Litimana 3, 5) Mwa lubasi, Jehova u file muuna buikalabelo bwa ku ba toho ya musali. Musali naa ka shubula muunaa hae haiba a eza buikalabelo bo Jehova a file ku muuna a sa bonisi kuli wa lemuha maata a tamaiso a muunaa hae. Ka mutala, haiba a zamaisa tuto ya Bibele muunaa hae inze a li teñi, u ka bonisa kuli wa lemuha maata a tamaiso a muunaa hae ka ku apala se siñwi kwa toho. U swanela ku eza cwalo ibe kuli muunaa hae u kolobelizwe kamba kutokwa kakuli ki yena toho ya lubasi. a Nihaa lapela kamba ku luta fapilaa mwanaa hae wa mushimani ya kolobelizwe kono ili ya sa li yo munyinyani, u swanela ku apala se siñwi kwa toho, isi ka libaka la kuli mwana yo ki toho ya lubasi, kono kabakala maata a tamaiso e ba filwe baana mwa puteho ya Sikreste.

Paulusi u ama kwa puteho ka manzwi aa li: “Mutu haa lata ku tahisa likañi, mukwa wo ha u yo ku luna, ha u yo ni mwa Likeleke za Mulimu.” (Timana 16) Mwa puteho ya Sikreste, baana ba ba kolobelizwe ki bona ba ba filwe maata a ku zamaisa. (1 Timotea 2:11-14; Maheberu 13:17) Ki baana feela ba ba kona ku ketiwa sina maeluda ni batanga ba bukombwa ni ku fiwa buikalabelo ki Mulimu bwa ku babalela mutapi wa hae. (Likezo 20:28) Kono fokuñwi ku kana kwa ba ni miinelo ye tokwa kuli musali wa Sikreste a eze buikalabelo bo bu swanelwa ku ezwa ki muuna ya kolobelizwe ya fitile ku ze konisa. Ka mutala, a kana a tokwa ku zamaisa mukopano wa ku zwela mwa sebelezo ya mwa simu kabakala kuli ha ku na muuna ya kolobelizwe ya fitile ku ze konisa. Kamba mwendi u tokwa ku zamaisa tuto ya Bibele ya mwa ndu muuna ya kolobelizwe inze a li teñi. Bakeñisa kuli misebezi yeo ki kalulo ya misebezi ya puteho ya Sikreste, musali wa Sikreste u ka tokwa ku apala se siñwi kwa toho ili ku bonisa kuli u eza buikalabelo bo bu swanelwa ku ezwa ki muuna.

Kwa neku le liñwi, ku na ni lika ze ñata mwa bulapeli za kona ku eza kaizeli a sa tokwi ku apala se siñwi kwa toho. Ka mutala, haa tokwi ku apala se siñwi kwa toho ha alaba kwa mikopano ya Sikreste, haa kutaza fa ndu ni ndu ni muunaa hae kamba  muuna yo muñwi ya kolobelizwe, kamba haa ituta kamba ku lapela ni bana ba hae ba ba si ka kolobezwa. Niteñi, kwa kona ku ba ni lipuzo ze ñwi ze kona ku zuha fa taba ye, mi haiba kaizeli ha zibi hande sa ku eza, wa kona ku eza patisiso ye ekezehile. b Haiba a palelwa ku ziba hande sa swanela ku eza ni hamulaho wa ku eza patisiso mi lizwalo la hae li mu susueza kuli a apale se siñwi kwa toho, ha ku si ka fosahala ha naa ka eza cwalo.

Mabaka. Mwa timana 10, lu fumana mabaka a mabeli musali wa Sikreste haa tokwa ku mamela sikuka se. Lu bala kuli: “Musali u swanezi ku ba ni sisupo kwa toho sa kuli wa buswa, kabakala mangeloi.” Pili, mu lemuhe pulelo ye li, “sisupo . . . sa kuli wa buswa.” Pulelo yeo i talusañi? Ku apala se siñwi kwa toho ki nzila yeo musali a bonisa ka yona kuli wa lemuha maata a tamaiso ao Jehova a file baana ba ba kolobelizwe mwa puteho. Kamukwaocwalo, u bonisa lilato ni busepahali bwa hae ku Jehova Mulimu. Libaka la bubeli li fumanwa mwa manzwi aa li, “kabakala mangeloi.” Musali haa apala se siñwi kwa toho u ama cwañi libupiwa za moya ze maata zeo?

Mangeloi a tabela ku bona kuli tamaiso ya Mulimu ya kutekiwa mwa kopano ya Jehova kaufela, kwa lihalimu ni fa lifasi. Ni ona a ituta se siñwi kwa mutala wa batu ba ba si ka petahala mwa taba ye. Mangeloi ni ona a tokwa ku ipeya kwatasaa tamaiso ya Jehova—ili taba ye se a palezwi mangeloi a mañata mwa nako ye se fitile. (Juda 6) Kacwalo, mangeloi a kona ku iponela miinelo ye miñwi ili mo musali wa Sikreste ya na ni yeloseli ni zibo ye tuna ku fita muuna wa mwa puteho ya kolobelizwe, u ipeya kwatasaa tamaiso ya muuna yo. Mwa miinelo ye miñwi mwendi  musali yo ki Mukreste ya tozizwe, ya ka ba yo muñwi wa ba ba ka ca sanda ni Kreste. Kwapili musali ya cwalo u ka ba ni musebezi o pahami, o fita ni wo ba eza mangeloi, mi u ka busa ni Kreste mwa lihalimu. Kana wo hasi mutala o munde o a swanela ku iponela mangeloi? Kaniti luli, likaizeli kaufela ba na ni tohonolo ye tuna ya ku bonisa ku ipeya ku utwa kwa bona ka buikokobezo ni ka busepahali fapilaa mangeloi a eza lule-lule.