Kwa 1 Makorinte 6:1-8, muapositola Paulusi naa talusize za mizeko ya mwahalaa balumeli. Naa swabisizwe ki taba ya kuli Bakreste ba bañwi ba kwa Korinte ne ba “isana kwa Kuta ya bahedeni.” (Timana 1) Paulusi naa file mabaka a utwahala Bakreste ha ba swanela ku tatululela matata a bona mwa puteho mwa sibaka sa ku isana kwa likuta za lifasi. Ha lu nyakisiseñi mabaka a mañwi Paulusi ha naa file kelezo yeo ye tahile ka moya ni miinelo ye miñwi ye kona ku zuha ili ye si ka amiwa mwa kelezo yeo.

Ha lu ba ni butata ni mulumeli yo muñwi mwa pisinisi, lu swanela pili ku lika ku tatulula butata bo ka ku itusisa likuka za Jehova, isi ka mihupulo ya luna. (Liproverbia 14:12) Sina mwa naa boniselize Jesu, ki kwa butokwa hahulu ku pakisa ku tatulula lifapahano li si ka hula kale ku ba ze tuna. (Mateu 5:23-26) Ka bumai, Bakreste ba bañwi ba banga hahulu ni muñañatoho, kuli mane ba isanga matata a bona kwa likuta za lifasi. Paulusi naa ize: “Za ku zekisana, mu se mu na ni mulatu luli.” Kabakalañi? Libaka le lituna kikuli mizeko ye cwalo ha i kutekehisi libizo le linde la puteho kamba Mulimu ye lu lapela. Kacwalo, lu swanela ku nahanisisa hahulu puzo ya naa buzize Paulusi, ye li: “Kiñi se mu sa iketeli ku amuhela ha mu fosezwa?”—Timana 7.

Paulusi hape naa bonisize kuli Mulimu u beile tukiso ye nde mwa puteho ya ku tatulula ka yona matata. Maeluda ki baana ba Sikreste ba ba na ni butali bakeñisa zibo ya bona ya Mañolo, mi Paulusi u bulela kuli ba “kona ku [atula] fa taba ya mulumeli ni mwanahabo wa mulumeli” mwa litaba “za bupilo bo.” (Litimana 3-5) Jesu naa bonisize kuli lifapahano ze tahiswa ki lifoso ze tuna ze cwale ka busawana kamba ku uzweza ba bañwi ka bupumi, li swanela ku tatululwa ka mihato ye milalu ya naa bulezi: wa pili kikuli, mutu u swanela ku lika ku tatulula butata kwa mukunda ni mutu ya fapahani ni yena; wa bubeli kikuli, haiba butata bu pala ku tatululwa mwa muhato wa pili, u ka biza paki a li muñwi kamba ze peli; mi haiba ni fo butata bu pala ku tatululwa, u ka nga muhato wa bulalu wa ku fitisa taba yeo kwa baana-bahulu ba puteho.—Mateu 18:15-17.

 Nihakulicwalo, maeluda ba Sikreste hasi licaziba za mulao wa naha kamba za litaba za lipisinisi, mi wo hasi wona musebezi wa bona mwa puteho. Ha ba tomeli mizwale milao ya mwa ku tatululela matata a bona mwa lipisinisi. Kono ba lika ku tusa batu ba ba eza pisinisi hamoho ku sebelisa Mañolo ni ku lumelelana fa taba ka kozo. Mwa litaba ze ñwi ze tatafezi hahulu, ba kana ba kupa tuso ku muokameli wa mupotoloho kamba kwa ofisi ya mutai wa Lipaki za Jehova. Kono ku na ni miinelo ye miñwi ye si ka amiwa mwa kelezo ya naa file Paulusi. Ki ifi ye miñwi ya miinelo yeo?

Mwa miinelo ye miñwi, muzeko u kona ku ba yona nzila ye bunolo kamba ye tokwiwa ki mulao kuli mutu a pete nto ye ñwi ku si na matata. Ka mutala, mwendi muzeko u kona ku ba yona nzila inosi ya kona ku itusisa mutu kuli a be ni telekano ni mutu ya nyalani ni yena, ku fiwa tukelo ya ku babalela bana hamulaho wa telekano, ku fiwa tukelo ya ku lifiwanga mali a telekano, ku lifelwa liluwo le li sinyehile ki kampani ya insurance, ku fiwa tukelo ya ku ba yo muñwi wa batu bo i kolotezi kampani ha ku nyakisiswa za ku wa kwa kampani yeo, kamba ku zeka kuli will ye ne ñozwi ki mutu ya shwile i kutekiwe. Hape ku na ni miinelo ye miñwi ye kona ku tahisa kuli muzwale ya isizwe kwa kuta ki mutu yo muñwi ni yena a leke saimoni mutu yo ilikuli a si ke a limbiwa taba. a

Haiba Bakreste ba ba ni mizeko ye cwalo ba sa ezi likañi, ne ba si ke ba loba kelezo ya naa file Paulusi. b Niteñi, saa swanela ku iyakatwa hahulu Mukreste ki ku bona teñi kuli libizo la Jehova li siyala li kenile mi kozo ni swalisano ya puteho ha i filikanyiwi. Balateleli ba Kreste ba zibahala hahulu ka lilato la bona, mi “lilato . . . ha li yemi fa litukelo za lona.”—1 Makorinte 13:4, 5; Joani 13:34, 35.