1. Ki bufi bo buñwi bwa bulapeli bo bu fumaneha mwa Africa?

 BUÑATA bwa batu mwa Africa ba lumela kuli ku lapela Mulimu ki kwa butokwa. Kono batu ha ba lumelelani ka mw’a lukelwa ku lapelelwa. Ba bañwi ba mu lapela kwa likeleke za Mamozilemu, mi ba bañwi ba mu lapela kwa likeleke za sizo. Ba bañwi hape ba yanga kwa likeleke za Krestendomu. Kono ha ku si ka luka ku hupula kuli mwa Africa ku na ni bulapeli bo bulalu fela. Mwahal’a Mamozilemu, ku na ni milao ni litumelo ze shutana. Bulapeli bwa sizo bu shutana hahulu mwa libaka ze ñata. Mane, lifapahano ze mwahal’a likeleke ze twi ki za Sikreste ki ze tuna ni ku fita. Kwand’a likeleke ze tuna mwa Africa, ku na ni likiti-kiti za likeleke ze ñwi.

2. (a) Ki lika mañi hañata ze tahisanga kuli batu ba ipumane mwa bulapeli bo ba li ku bona? (b) Ki lika mañi ze sa bonisi kuli Mulimu w’a amuhela bulapeli bwa luna?

² Ki kabakalañi batu ha ba lapela ka mo ba lumelela? Buñata bwa batu ba amuhela bulapeli bwa bashemi ba bona. Likezahalo za kale-kale ni zona li kukueza bulapeli bwa batu kacenu. Buka ye bizwa The Africans—A Triple Heritage ili: “Bumozilemu ne bu yandululezwi kwa mutulo wa Sahara ka lindwa, . . . mi Bukreste ni bona ne bu yandululezwi kwa mboela wa Sahara ka lindwa. Haiba kwa mutulo wa Sahara Bumozilemu ne bu yanduluzwi ka mukwale, kanti he kwa  mboela wa Sahara, Bukreste ne bu yanduluzwi ka tobolo.” Niteñi, buñata bwa luna lu lumela kuli Mulimu wa amuhela bulapeli bwa luna. Kono bulapeli haki bwa niti ka libaka fela la kuli ki mona mo ba lapela bashemi ba luna kamba kuli sicaba se siñwi ne si hapelelize bokukululu ba luna ku kena ku bona.

3-5. Ki swanisezo mañi ye lu tusa ku bona kuli haki bulapeli kaufela bo bu luta niti?

³ Bulapeli kamukana niha bu ipapata kuli bu na ni ketelelo ye sepahala ya mwa ku sebeleza Mulimu, mihupulo ya bona ya shutana. Ba luta lituto ze ñata ze shutana ka za seo Mulimu a li sona ni z’a bata ku luna. Mu hupule ka za se: Mu nge kuli mu fumani musebezi kwa kampani ye tuna. Fa lizazi la pili ha mu y’o kala ku sebeza, mu bulelelwa kuli yo muhulu wa kampani yeo u fa pumulo. Kacwalo, mu buza babeleki ba balalu ka za se mu ka eza. Mubeleki wa pili u bulela kuli yo muhulu wa kampani yeo u bata kuli mu fiyelange. Wa bubeli u mi bulelela kuli mu lukela ku penta muyaho. Wa bulalu u mi bulelela kuli mu lukela ku isanga mañolo kw’a lukelwa ku iswa.

⁴ Ku tuha f’o, mu buza babeleki bao ka za yo muhulu wa kampani yeo. Wa pili u bulela kuli yo muhulu wa kampani yeo ki yo mutelele, ki mucaha, mi u situhu. Wa bubeli u bulela kuli ki yo mukuswani, ki mucembele, mi ki ya musa. Wa bulalu u bulela kuli yo muhulu wa kampani yeo haki munna—ki musali. Mwendi mu ka ikatulela kuli kwa babeleki ba balalu bao ku na ni ba ba sa buleli niti. Haiba mu bata ku zwelapili mwa musebezi wa mina o munca, mwendi mu ka tatubisisa lika kuli mu zibe kuli yo muhulu wa kampani yeo ki mañi luli ni ku ziba musebezi w’a bata kuli mu u eze.

⁵ Ni ka za bulapeli ku cwalo. Bakeñisa kuli ku na ni mihupulo ye miñata ka za seo Mulimu a li sona ni ka za seo a tokwa ku luna, lu tokwa ku tokomela kuli mo lu lapelela ibe ko ku lumelelana ni niti. Kono lu kona ku ituta cwañi niti ka za Mulimu?