MULIMU YA M’ATA OTE ki yena Mubusi wa pupo kamukana. Bupilo bwa luna bwa cwale ni bwa kwapili bu itingile ku yena. U na ni m’ata a ku fa mupuzo ni m’ata a ku fa koto. U na ni m’ata a ku fa bupilo ni m’ata a ku bu felisa. Haiba lu tabelwa ki yena, lika li ka lu bela hande; haiba h’a lu tabeli, lika ha li na ku lu bela hande. Ki kwa butokwa luli kuli bulapeli bwa luna ibe b’o a amuhela!

Batu ba lapela ka linzila ze ñata. Haiba bulapeli bu swana ni nzila, kana Mulimu wa amuhela linzila kaufela za bulapeli? Kutokwa. Jesu, yena mupolofita wa Mulimu, n’a bonisize kuli ku na ni linzila ze peli fela. N’a ize: “Munyako wa Sinyeho u atami, mi nzila ye ya mwateñi i atami, mi ba ba kena mwateñi ki ba bañata. Kakuli munyako wa bupilo wa kumbana, nzila ye ya mwateñi ki ye sisani, mi ki ba banyinyani ba ba i fumana.”—Mateu 7:13, 14.

Ku na ni mifuta ye mibeli fela ya bulapeli: bo buñwi bo bu isa kwa bupilo ni bo buñwi bo bu isa kwa sinyeho. Mulelo wa broshuwa ye ki ku mi tusa ku fumana nzila ye isa kwa bupilo bo bu sa feli.