1. Ka za bulapeli, batu ba na ni ku eza keto mañi?

 JESU n’a ize: “Ya sa ni lwaneli, wa ni lwanisa.” (Mateu 12:30) Ha lu sa yemeli Jehova, lu yemela Satani. Batu ba bañata ba ikutwa kuli ba sebeleza Mulimu ka swanelo, kono Bibele i li Satani u “pumanga lifasi kamukana.” (Sinulo 12:9) Bolule-lule ba batu ba lumela kuli ba lapela Mulimu, kono ye ba sebeleza luli ki Satani Diabulosi! Batu kacenu ba na ni ku iketela: Ba lukela ku sebeleza Jehova, yena “Mulimu wa niti,” kamba Satani, yena “ndat’ahe lishano.”—Samu 31:5; Joani 8:44.

2. Ki nzila ifi yeo ka yona Satani a lika ku palelwisa batu ku lapela Jehova?

² Keto ya ku sebeleza Jehova ki ye butali, ki keto ye tahisa kuli mutu a katelwe ki Mulimu. Kono Satani h’a tabeli mutu ya sebeleza Mulimu; u tahisa manyando ku ba ba sebeleza Mulimu. Nzila ye ñwi yeo ka yona a eza cwalo ki ka ku tahisa sheununo kamba nyandiso ku zwelela ku ba bañwi, mane ni ku zwelela kwa balikani ni ku ba mwa lubasi. Jesu n’a lemusize kuli: “Mi lila za mutu ikaba ba ndu ya hae.”—Mateu 10:36.

3. Haiba ba mwa lubasi kamba balikani ba mi lwanisa kabakala kuli mu lapela Mulimu, mu ka eza cwañi?

³ Haiba ku ezahala cwalo ku mina, mu ka eza cwañi? Batu ba bañata ba ziba kuli mulapelelo wa bona u fosahezi, kono ba zina-zina ku ikayutula ku ona. Ba ikutwa kuli ku eza cwalo ki ku sa sepahala kwa lubasi lwa bona. Kana ku eza cwalo kwa utwahala? Ha ne mu ka ziba kuli ba mwa lubasi lwa  mina ba itusisanga milyani ye kola ye lubeta, kana ne mu si ke mwa ba lemusa kuli milyani ye kola yeo i ka ba holofaza? Ne mu si ke mwa swalisana ni bona mwa ku itusisa milyani ye kola yeo, nji cwañi?

4. Joshua n’a buleziñi kwa Maisilaele ka za bulapeli mwa miteñi ya hae?

⁴ Joshua n’a susuelize Maisilaele ku tuhela bulapeli ni lizo ze maswe za bokukw’a bona. N’a ize: “Cwale ni li: Mu sabe [Muñ’a] Bupilo, mu mu sebeleze ka ku sepahala ni ka niti; mu tuhele milimu yeo bokuku a mina ba kile ba i sebeleza mwa buse bwa Nuka, ni mwa Egepita; mi mu sebeleze [Muñ’a] Bupilo.” (Joshua 24:14) Joshua n’a sepahala ku Mulimu, mi Jehova n’a mu fuyozi. Haiba lu sepahala ku Jehova, ni luna u ka lu fuyola.—2 Samuele 22:26.

5. Ki kabakalañi ha lu lukela ku sinya liunduma?

⁵ Ku ikayutula kwa bulapeli bwa buhata hape ku talusa kuli lu lukela ku sinya liunduma kaufela ze lu kana lu na ni zona, inge cwalo linkau, liunduma, masale ni maseka a mabibo, ni ze ñwi cwalo. Ku eza cwalo ku butokwa kakuli ku bonisa kuli lu sepa Jehova ka ku tala.

6. Bakreste ba pili ne ba ezizeñi ka za libuka za bona za mabibo?

⁶ Mu nyakisise seo Bakreste ba pili ne ba si ezize ha ne ba ikatulezi kuli ne ba bata ku swalisana ni bulapeli bwa niti. Bibele i li: “Ba bañata ba ba ne ba eza mabibo, ba tisa libuka za bona, ba li cisa fapil’a nyangela.”—Likezo 19:19.

7. Lu kona ku ezañi haiba badimona ba lu kataza?

⁷ Ba bañwi ba ba kalisa ku sebeleza Jehova ili be ne ba li baloi kamba be ne ba ezanga mikwa ye miñwi ya mabibo ba kona ku katazwa ki badimona. Haiba ku ezahala cwalo ku mina, mu lapele ku Jehova ka ku tumusa linzwi, ka ku itusisa libizo la hae. U ka mi tusa.—Liproverbia 18:10; Jakobo 4:7.

8. Bakreste ba nga cwañi milimu ya buhata ni maswaniso a itusiswa mwa bulapeli bwa buhata?

⁸ Ba ba itakaleza ku sebeleza Jehova ha ba lukeli ku buluka kamba ku itusisa milimu ifi kamba ifi ya buhata kamba maswaniso afi kamba afi a itusiswa mwa bulapeli bwa buhata. Bakreste ba niti ba “zamaya ka tumelo, isi ka ku bona.” (2 Makorinte 5:7) Ba kuteka mulao wa Mulimu o hanisa ku itusisa maswaniso afi kamba afi mwa bulapeli.—Exoda 20:4, 5.

9. Bibele i fa kelezo mañi ka za ku talifa?

⁹ Bibele i li: “Ya kopana ni ba ba butali, ni yena u ka talifa.” (Liproverbia 13:20) Haiba lu bata ku talifa, lu lukela ku kopana, kamba ku swalisana, ni Lipaki za Jehova. Ki bona batu ba ba zamaya mwa nzila ye isa kwa bupilo bo bu sa feli.—Mateu 7:14.

10. Lipaki za Jehova ba kona ku mi tusa cwañi ku sebeleza Mulimu?

¹⁰ Lipaki ba iyakatwa batu ha buniti. Musebezi wa bona ki wa ku tusa ba lipilu ze sepahala ku utwisisa liniti ze mwa Bibele ze isa kwa bupilo bo bu sa feli. Ba kona ku mi tusa ka ku ituta Bibele ni mina, ba sa mi lifisi. Ba ka alaba lipuzo za mina ni ku mi bonisa mwa ku sebeliseza zibo ya Bibele mwa bupilo bwa mina.—Joani 17:3.

11. Mikopano ya Sikreste i ka mi tusa cwañi?

¹¹ Kwa mikopano ya bona, yeo hañata i ezezwanga mwa Ndu ya Mubuso, mu ka ituta ze ñwi ka za linzila za Jehova. Mu ka tiiswa mwa buikatazo bwa mina bwa ku bata ku swalisana ni bulapeli bwa niti. Mi hape mu ka lutiwa ka mwa ku tuseza ba bañwi ku ituta liniti ze mwa Bibele.—Maheberu 10:24, 25.

12. Tapelo i kona ku mi tusa cwañi ku sebeleza Mulimu?

¹² Ha mu nze mu ituta ze ñwi ka za tato ya Jehova ni mulelo wa hae, mwendi mu ka itebuha hahulu linzila za hae ze lilato. Hape mu lukela ku hulisa takazo ya mina ya ku bata ku eza ze mu tabisa ni ku tokolomoha  ku eza ze mu nyemisa. Mu si libali kuli mwa kona ku atumela Jehova ka tapelo ku mu kupa kuli a mi tuse ku eza se si lukile ni ku tokolomoha ku eza se si maswe.—1 Makorinte 6:9, 10; Mafilipi 4:6.

13. Mu kona ku tabisa cwañi pilu ya Jehova?

¹³ Nako ha i nze i ya, ha mu nze mu hula kwa moya, kaniti luli mu ka bona butokwa bwa ku fita fa ku ineela ni ku kolobezwa ka ku ba yo muñwi wa Lipaki za Jehova. Ka ku swalisana ni batu ba Jehova, mu ka tabisa pilu ya Jehova. (Liproverbia 27:11) Mu ka ba mwahal’a batu ba ba tabile bao Mulimu a bulela ka za bona kuli: “Ni ka yaha fahali a bona, ni izamaele mwateñi; mi ni ka ba Mulimu wa bona, bona ba be sicaba sa ka.”—2 Makorinte 6:16.