Lila za Jesu linyemile. Kihona asazo fa swanisezo yebonisa bumaswe bwabona. Bafalisi cwale balelisana za kumuswala. Balika kutahisa kuli abulele nto yeñwi yekatahisa kuli aisiwe ku Mubusisi wa Roma, mi balifa babañwi kwa balutiwa babona kuli bayo mulika.—Luka 6:7.

Balutiwa bao bali: “Muluti, lwaziba kuli ubulela ni kuluta batu ka kunepahala mi hauna ketululo, kono uluta nzila ya Mulimu ka kuya ka niti: Kana kwalumelezwa kuli lulife mutelo ku Sesare kamba kutokwa?” (Luka 20:21, 22) Jesu hapumiwi ki kalole ka bona, kakuli waziba kuli baeza cwalo ka buipi ni bupumi. Hakabulela kuli: ‘Batili, haki swanelo ku lifa mutelo,’ bakona kumutameleza kuli ukwenuhela mubuso wa Roma. Kono hakabulela kuli: ‘Eni, kwa swanela,’ batu babatoile mubuso wa Roma, habana kumuutwisisa mi baka mufetuhela. Ka mukwa ocwalo, ualaba cwañi?

Jesu ualaba kuli: “Kiñi hamu nilika, mina baipi? Hamu nibonise sheleñi ya muwayawaya ya mutelo.” Bamutiseza dinari, mi ubabuza kuli: “Siswaniso se, ni libizo le, ki za mañi?” Baalaba bali: “Ki za Sesare.” Cwale Jesu ubalaela kuli: “Ka mukwa ocwalo, mukutiseze Sesare zeli za Sesare, kono mukutiseze Mulimu zeli za Mulimu.”—Mateu 22:18-21.

Baana ba bakomokiswa ki manzwi a Jesu. Bakuziswa ki mualabelo wahae mi baikela. Kono  hakufeleli fo, Jesu usa zwelapili kulikiwa. Bafalisi hase bapalezwi kumulika, sikwata sa baeteleli ba bulapeli bobuñwi sitaha ku Jesu.

Basaduki babalumela kuli hakuna kuba ni zuho, babuza Jesu puzo yeama zuho ni linyalo la mutu ni mulamwae. Babuza kuli: “Muluti, Mushe naaize: ‘Haiba muuna atimela asina bana, munyanaa hae ulukela kunyala musalaa hae ni kutahiseza muhulwanaa hae bana.’ Cwale nelunani bana ba mba ba 7. Wapili anyala, mi atimela, mi bakeñisa kutokwa bana, musalaa hae anyalwa ki munyanaa hae. Kwaezahala cwalo ku wabubeli ni ku wabulaalu mane kuisa ku wabu 7. Kwa mafelelezo, musali atimela. Cwale ka nako ya zuho, musali yo ukaba wa mañi ku ba 7 bao? Kakuli kaufelaa bona bakile bamunyala.”—Mateu 22:24-28.

Jesu ubaalaba ka kuama kwa mañolo a Mushe ebalumela Basaduki, uli: “Mubushize, kakuli hamuzibi Mañolo kamba maata a Mulimu. Kakuli habakazuha kwa bafu, baana habana kunyala mi basali habana kunyalwa, kono bakaba sina mangeloi aa kwa lihalimu. Kono haili ka za kuzuha kwa babashwile, kana hamusika bala mwa buka ya Mushe, mwa taba ya sicacani sa miutwa, kuli Mulimu naaize ku yena: ‘Ki na Mulimu wa Abrahama ni Mulimu wa Isaka ni Mulimu wa Jakobo’? Haki Mulimu wa babashwile, kono ki wa babapila. Mubushize hahulu.” (Mareka 12:24-27; Exoda 3:1-6) Sicaba sikomokiswa ki kalabo yeo.

Jesu ukuzisize Bafalisi ni Basaduki, ka mukwa ocwalo, likwata zepeli ze, za balwanisi likopana hamoho ni kutaha kuto lika Jesu hape. Muñoli yomuñwi uli: “Muluti, ki ifi taelo yetuna ka kufitisisa mwa Mulao?”—Mateu 22:36.

Jesu ualaba kuli: “Wapili ki wo: ‘Teeleza, wena Isilaele, Jehova Mulimu waluna ki Jehova alimuñwi, mi ulukela kulata Jehova Mulimu wahao ka pilu yahao kaufela ni ka moyo wahao kaufela ni ka munahano wahao kaufela ni ka maata ahao kaufela.’ Wabubeli ki wo: ‘Ulukela kulata wahenu mouitatela.’ Hakuna mulao omuñwi omutuna kufita yeo.”—Mareka 12:29-31.

Muñoli yo hautwa kalabo yeo, uli: “Muluti, ubulezi hande, ka kuya ka niti, ‘Yena ki Alimuñwi, mi hakuna usili kwandaa hae’; mi kumulata ka pilu kaufela, ka kutwisiso kaufela, ni ka maata kaufela ni kulata wahabo sina mutu mwaitatela ki kwa butokwa hahulu kufita linubu kaufela za kucisa zefiwa mutumbi ni matabelo kamukana.” Jesu habona kuli muñoli yo ualabile ka kutwisiso, umubulelela kuli: “Hauyo kwahule ni Mubuso wa Mulimu.”—Mareka 12:32-34.

Jesu naanze aluta mwa tempele ka mazazi amalaalu, (ili la Nisani 9, 10, ni 11). Batu babañwi babaswana sina muñoli yo, nebateeleza ku yena ka tabo. Kono isiñi baeteleli ba bulapeli, ili bao cwale sebapalelwa kuba ni “bundume bwa kumubuza sesiñwi hape.”