Jesu uzwezipili kususueza baapositola bahae babasepahala ka kuikambota ni bona. Mwendi seli fahalaa busihu. Jesu cwale ufa swanisezo yesusueza.

Ukala ka kubulela kuli: “Ki na kota ya veine ya niti, mi Ndate ki mulimi.” (Joani 15:1) Zabulela mwa swanisezo ye zaswana ni zenebulezwi lilimo-limo kwamulaho ka za sicaba sa Isilaele, sene sibizwa kota ya veine ya Jehova. (Jeremia 2:21; Hosea 10:1, 2) Nihakulicwalo, Jehova ufelisa sicaba seo. (Mateu 23:37, 38) Ka mukwa ocwalo, Jesu ubulela nto yenca. Ki yena kota ya veine yasweli kubabalela Ndatahe, kuzwa Jesu hatoziwa ka moya okenile ka silimo sa 29 C.E. Kono Jesu ubonisa kuli kota ya veine iyemela zeñata, uli:

“[Ndate] uzwisa mutai kaufela o ku na osabeyi miselo, mi ukolela mutai kaufela obeya miselo, kuli ubeye miselo yemiñata. . . . Sina mutai hausa koni kubeya miselo ka ili ona feela konji haiba usiyala kwa veine, kucwalo ni ku mina, hamukoni kubeya miselo konji haiba muzwelapili kuswalisana ni na. Ki na kota ya veine; mina mu mitai.”—Joani 15:2-5.

Jesu usepisize balutiwa bahae babasepahala kuli hasaile, uka balumela mutusi, wona moya okenile. Mazazi a 51 kuzwafo, baapositola ni balutiwa babañwi bakaamuhela moya wo, mi bakaba mitai ya kota ya veine. Mi “mitai” kaufela ikatokwa kuswalisana ni Jesu. Kabakalañi?

Jesu uli: “Ki na kota ya veine; mina mu mitai. Mutu kaufela yazwelapili kuswalisana ni na, mi ni na niswalisana ni yena, ukabeya miselo yemiñata; kakuli kwandaa ka hakuna semukona kueza.” “Mitai” ye, bona balateleli ba Jesu babasepahala, bakabeya miselo, ka kulikanyisa mikwa ya Jesu, ka kubulelela babañwi ka za Mubuso wa Mulimu, ni kutahisa balutiwa babañata. Kono kukaezahalañi haiba mutu haswalisani ni Jesu mi habeyi muselo? Jesu uli: “Mutu hasazwelipili kuswalisana ni na, unepelwa kwande.” Jesu hape uli: “Haiba muzwelapili kuswalisana ni na mi manzwi aka aina ku mina, mukupe semulata kaufela mi sikaezahala ku mina.”—Joani 15:5-7.

Jesu cwale ukutela kubulela taba yasabulezi habeli, yona yakumamela milao yahae. (Joani 14:15, 21) Ubulela nto yekona kubonisa kuli balutiwa bahae baeza cwalo, uli: “Haiba mumamela milao yaka, mukazwelapili mwa lilato laka, sina na hanimamezi milao ya Ndate ni kuzwelapili mwa lilato lahae.” Kono batokwa kueza zeñata kwandaa kulata Jehova Mulimu ni Mwanaa hae. Jesu uli: “Wo ki ona mulao waka, kuli mulatane sina moni milatezi. Hakuna mutu yanani lilato lelifita le, kuli mutu atobohe bupilo bwahae kabakala balikani bahae. Mu balikani baka haiba mueza zeni milaela.”—Joani 15:10-14.

Jesu utuha abonisa lilato lahae ka kufa bupilo bwahae kubabalumela ku yena. Mutala wahae uswanela kususueza balateleli bahae kubonisana lilato leliswana lakuitombola. Lilato le, lika bazibahaza sina mwanaabulelezi Jesu kuli: “Batu kaufela bakaziba kuli mu balutiwa baka ka taba ye—haiba mulatana mwahalaa mina.”—Joani 13:35.

Baapositola baswanela kulemuha libaka Jesu hababiza “balikani.” Utalusa libaka habali balikani bahae, uli: “Nimibizize balikani, kakuli nimizibisize lika kaufela zeniutwile ku Ndate.” Yeo ki tohonolo yetuna hahulu ya kuba balikani babatuna ba Jesu ni kuziba zamubulelezi Ndatahe! Kono kuli baikole silikani se, batokwa ‘kuzwelapili kubeya miselo.’ Haiba baeza cwalo, Jesu uli: “Semuka kupa kaufela ku  Ndate ka libizo laka, uka mifa sona.”—Joani 15:15, 16.

Lilato leli mwahalaa “mitai” ye, bona balutiwa, lika batusa kutiyela nto ifi kamba ifi yekabatela. Jesu ubalemusa kuli lifasi lika batoya mi ubaomba-omba kuli: “Haiba lifasi limitoile, mwaziba kuli litoile na pili lisika mitoya kale. Kambe mu ba lifasi, lifasi nelika lata zeli zalona. Cwale bakeñisa kuli hamu ba lifasi, . . . ki lona libaka lifasi hali mitoile.”—Joani 15:18, 19.

Jesu uekeza kubulela libaka lifasi halika batoya, uli: “Bakaeza lika zeo kaufela kumilwanisa kabakala libizo laka, kakuli habazibi Yanilumile.” Jesu ubulela kuli limakazo zaezize libonisa kuli babamutoile banani mulatu, uli: “Kambe nenisika eza mwahalaa bona misebezi yesika ezwa kale ki mutu yomuñwi, kambe habana sibi; kono cwale baniboni mi banitoile ni kutoya Ndate.” Mane sitoyo sabona sitaleleza bupolofita.—Joani 15:21, 24, 25; Samu 35:19; 69:4.

Jesu hape usepisa kuluma mutusi, wona moya okenile. Balateleli bahae kaufela bakaamuhela maata ao akona kubatusa kubeya muselo, ili ‘kumupaka.’—Joani 15:27.