Kuli apaleliswe mulelo wa ba kuta ya Sanhedrini wakubata kumubulaya, Jesu uya mwa muleneñi wa Efraimi, okwa mutulo-upa wa Jerusalema. Uina mwa muleneñi wo ni balutiwa bahae, ilikuli abe kwahule ni lila zahae. (Joani 11:54) Nihakulicwalo, nako ya Mukiti wa Paseka ya silimo sa 33 C.E. isutelezi, ka mukwa ocwalo, Jesu utuha atama musipili hape. Uya kwa mutulo-upa mwa Samaria ni kwa Galilea, upotela sibaka se lwa mafelelezo pili asika shwa kale.

Kwa makalelo a musipili wahae, Jesu hanze azwa mwa munzi omuñwi kuya ku omuñwi, ukatana baana ba mbingwa baalishumi. Butuku bo, hanyinyani-hanyinyani bukona kusinya lilama za mubili, zecwale ka minwana ya kwa mazoho, minwana ya kwa mahutu, kamba mazebe. (Numere 12:10-12) Mulao wa Mulimu ubonisa kuli mutu yakula mbingwa uswanela kuhuwelezanga kuli “Masila, masila!” ni kuina kwahule ni batu.—Livitike 13:45, 46.

Ka mukwa ocwalo, baana ba mbingwa baalishumi ba, bainzi kwahule ni Jesu. Kono bahuwa bali: “Jesu, Muluti, haku lushwele makeke!” Jesu habona baana ba mbingwa ba, ubalaela kuli: “Hamuye muyo iponahaza kwa baprisita.” (Luka 17:13, 14) Ubonisa likute kwa Mulao wa Mulimu, obonisa kuli muprisita ki yena yaswanela kuzibahaza kuli batu bane bakula mbingwa bafolile. Mi cwale bakona kukalisa kupila mwahalaa batu babaiketile.—Livitike 13:9-17.

Baana ba mbingwa baalishumi banani sepo ya kuli Jesu unani maata akubafolisa ka makazo. Baya kuyo bonana ni baprisita, niha basika foliswa kale. Habali mwa nzila, tumelo yabona ku Jesu yabatusa. Bakala kubona ni kuikutwa kuli bafolile!

Ba 9 bona bazwelapili kuya kwa baprisita. Alimuñwi yena ukuta ku Jesu. Muuna yakuta ku Jesu ki Musamaria. Ukutelañi? Muuna yo uitumezi hahulu ku Jesu bakeñisa zeezahalile. Muuna yo yanaakula mbingwa ‘ukanyisa Mulimu ka linzwi lelituna,’ ka kuziba kuli Mulimu ki yena yatahisize kuli afole. (Luka 17:15) Hafumana Jesu, uwela kwa mahutu ahae, ni kuitumela ku yena.

Jesu ubulelela baali ni bona kuli: “Bane bakenisizwe kaufela neli baalishumi, nji cwañi? Cwale ba 9 bona bakai? Kana hakuna yomuñwi yakutile kuto kanyisa Mulimu kwandaa mutu yo wa sicaba sisili?” Cwale Jesu ubulelela Musamaria yo kuli: “Nanuha uzamaye; tumelo yahao ikufolisize.”—Luka 17:17-19.

Ka kufolisa baana baalishumi bane bakula mbingwa, Jesu ubonisa kuli utusiwa ki Jehova Mulimu. Alimuñwi ku baalishumi ufolisizwe kwa mbingwa yahae mi hape umwa nzila yeisa kwa bupilo. Halupili ka nako yeo Mulimu uitusisa Jesu kueza limakazo za kufolisa batu. Kono haluba ni tumelo ku Jesu, lwakona kuba mwa nzila yeisa kwa bupilo bobusa feli. Kana lwabonisa buitumelo sina mwanaaezelize muuna wa Musamaria?