Swanisezo ya mwana yanaalatehile, yasazo bulela Jesu, iswanela kususueza batelisi, bañoli, ni Bafalisi babateeleza, kulemuha kuli Mulimu utabela kuswalela baezalibi bababakile. (Luka 15:1-7, 11) Cwale Jesu uambola kwa balutiwa bahae. Uitusisa swanisezo yeñwi, kono ka nako ye, ubulela ka za muuna wa mufumi yalemuha kuli sikombwa sahae siezize ka kusa sepahala.

Jesu utalusa kuli sikombwa nesitamelelizwe kuli sisinya maluo a mulenaa sona. Ka mukwa ocwalo, mulenaa sona ubulela kuli uka sizwisa fa musebezi. Sikombwa siipulelela mwa pilu kuli: “Nikaeza cwañi, haubona mulenaaka uniamuha bukombwa bwaka? Hanina maata a kulima, mi niswaba kukupelela.” Kuli sifumane mwa kuipiliseza, sili: “Naziba senika eza, ilikuli hanika zwiswa fa bukombwa bwaka, batu baniamuhele mwa mandu abona.” Kapili-pili sibiza mañi ni mañi yanaakolotezi mulenaa sona, ni kumubuza kuli: “Ukolotezi mulenaaka bukai?”—Luka 16:3-5.

Wapili ualaba kuli: “Likotolo ze 100 za mafula a olive.” Ao ki mafula akwana malita aeza 2,200. Mwendi mutu yo yanaakolotile naalimanga likota za olive kamba naanani pisinisi ya kulekisa mafula a olive. Sikombwa simubulelela kuli: “Hakuunge liñolo lahao la tumelelano ki le, mi uine fo, uñole fateñi kapili kuli likotolo ze 50 [ili malita aeza 1,100].”—Luka 16:6.

Sikombwa sibuza yomuñwi hape sili: “Wena bo, ukolotile bukai?” Yo ualaba kuli: “Mingomo ye 100 ya buloto.” Sikombwa sibulelela yanaakolotile kuli: “Hakuunge liñolo lahao la tumelelano ki le, mi uñole fateñi kuli mingomo ye 80.” Ka mukwa ocwalo, uzwisa kwateñi mingomo ye 20.—Luka 16:7.

Sikombwa sisazamaisa za masheleñi a mulenaa sona, ka mukwa ocwalo, sinani maata akuzwisa kwa likoloti zakolotezwi mulenaa sona. Ka kukutisa mwatasi likoloti za batu babakolotezi mulenaa sona, sikombwa siitama bulikani ni batu kuli hasika zwa musebezi mwendi ni bona baka sishemuba.

Hamulaho wa nako, mulenaa sona alemuha zeezahezi. Nihaike kuli zeezahezi litahisa kuli mulenaa sona asinyehelwe, mulena utabiswa ki sikombwa mi wasibabaza bakeñisa kuli ‘nihasisika luka, siezize ka butali.’ Jesu uekeza kuli: “Bana ba lifasi le baezanga ka butali ku ba lusika lwabona kufita bana ba liseli.”—Luka 16:8.

Jesu halumelezi likezo za sikombwa kamba kususueza kuitusisa butali bobucwalo mwa lipisinisi. Kono utalusañi? Ususueza balutiwa bahae kuli: “Muikezeze balikani ka bufumu bobusika luka kuli muta bufumu bo bufela, bakone kumiamuhela mwa libaka za kuya kuile.” (Luka 16:9) Kaniti, luituta kuli lutokwa kuitukiseza za kwapili ni kupila ka butali. Batanga ba Mulimu, bona “bana ba liseli,” batokwa kuitusisa  maluo abona ka butali, ka kuziba kuli bakaba ni bupilo bobusafeli kwapili.

Ki Jehova feela ni Mwanaa hae Jesu babakona kuamuhela mutu mwa Mubuso wa kwa lihalimu kamba mwa Paradaisi ya fa lifasi mwatasaa Mubuso wo. Luswanela kusebeza ka taata kuli lube ni silikani ni bona ka kuitusisa maluo aluna mwa kuzwisezapili za Mubuso. Sepo yaluna ya kupila kuya kuile ikatalelezwa muta gauda, silivera, ni maluwo amañwi lisinyeha kamba kufela.

Jesu hape ubulela kuli batu babaitusisa maluwo kamba sifumu sebanani sona ka busepahali, bakasepahala ni mwa lika zabutokwa hahulu. Jesu ubulela kuli: “Hakulicwalo, haiba hamusika bonisa kuli mwasepahala ka bufumu bobusika luka, ki mañi yaka mifa kubabalela bufumu bwa niti [zona lika za Mubuso]?”—Luka 16:11.

Jesu ubonisa balutiwa bahae kuli kukabatiwa zeñata ku bona kuli baamuhelwe “mwa libaka za kuya kuile.” Mutu hakoni kuba mutangaa Mulimu wa niti mi ka nako yeswana inze ali mutangaa bufumu bobusika luka. Jesu ufeleleza ka kubulela kuli: “Hakuna mutanga yakona kusebeleza malena bababeli, kakuli ukatoya alimuñwi ni kulata yomuñwi, kamba ukakumalela alimuñwi ni kunyaziseza yomuñwi. Hamukoni kusebeleza Mulimu ni Bufumu.”—Luka 16:9, 13.