Seibato ba silimo ni likweli ze 6 kuzwa fo Joani Mukolobezi azibahaleza Jesu sina Ngunyana wa Mulimu. Jesu hakalisa bukombwa bwahae, baana babasepahala babile balutiwa bahae, ili Andreasi, Simoni Pitrosi, Joani, mwendi ni Jakobo (muhulwanaa Joani), Filipi, ni Bartolome (hape yabizwa Natanaele). Hamulaho wa nako, babañwi babañata ni bona balatelela Kreste.—Joani 1:45-47.

Cwale Jesu ki kale aitukiseza kuketa baapositola bahae. Bao babaka ba balikani bahae babatuna mi ukabafa lituto zeipitezi. Kono pili asika baketa kale, Jesu uya kwa lilundu, mwendi lelili bukaufi ni Liwate la Galilea, lelisi kwahule ni Kapernauma. Ulapela busihu kaufela, mwendi ili kukupa butali ni mbuyoti ku Mulimu. Lizazi lelitatama, ubiza balutiwa bahae mi ku bona uketa ba 12 kuli babe baapositola bahae.

Jesu uketa ba 6 bababulezwi kwa makalelo, babacwale ka Mateu, ili yo Jesu naamubizize inze ali fa ofisi ya mutelo. Babañwi baketalizoho babaketilwe, ki Judasi (hape yabizwa Tadea ni “mwanaa Jakobo”), Simoni wa kwa Kana, Tomasi, Jakobo mwanaa Alfea, ni Judasi Isikariota.—Mateu 10:2-4; Luka 6:16.

Ba 12 bao sebazamaile ni Jesu mi wabaziba hande. Babañwi ku bona ki banabahabo yena. Bao bakopanyeleza Jakobo ni munyanaa hae Joani. Mi haiba, sina mobangela babañwi, Alfea neli mwanahabo Josefa, yena ndatahe Jesu yanaa muañuzi, fohe mwanaa Alfea ili muapositola Jakobo ni yena ki mwanaahabo Jesu.

Jesu hapalelwi kuhupula mabizo a baapositola bahae. Kana ni mina mwakona kuahupula? Nto yeñwi yekona kumitusa ki kuhupula kuli kunani bababeli bababizwa Simoni, bababeli bababizwa Jakobo, ni bababeli bababizwa Judasi. Simoni (Pitrosi) unani munyanaa hae yabizwa Andreasi, mi Jakobo (mwanaa Zebedea) unani munyanaa hae yabizwa Joani. Muezezo wo uka mitusa kuhupula mabizo a baapositola ba 8. Babañwi babane ki mutelisi (Mateu), yomuñwi ki yanaakakanyize hasamulaho (Tomasi), yomuñwi ki yanaabizizwe mwatasaa kota (Natanaele), mi yomuñwi ki mulikanaa Natanaele (Filipi).

Baapositola ba 11 bazwa mwa Galilea, ili habo Jesu. Natanaele uzwa kwa Kana. Filipi, Pitrosi, ni Andreasi basimuluha mwa Betsaida. Hamulaho wa nako, Pitrosi ni Andreasi batutela mwa Kapernauma, ili ko mwendi Mateu naapilile teñi. Jakobo ni Joani ni bona bapila mwa Kapernauma kamba bukaufi ni yona, mi baeza musebezi wa bundui. Kubonahala kuli Judasi Isikariota, yena yanaabetekile Jesu hasamulaho, ki yena feela muapositola yazwa mwa Judea.