Jesu naapatehile hahulu musihali kaufela, mi ukatezi. Ka nako ya manzibwana, ubulelela balutiwa bahae kuli: “Halusileleñi mwabuse,” ili kuzwa mwa Kapernauma.—Mareka 4:35.

Kwa likamba la kwa upa wa Liwate la Galilea kunani sibaka sa Mageraseni. Sibaka se hape sibizwa Dekapolisi. Mwa mileneñi ya mwa Dekapolisi kunani hahulu lizo za Sigerike, nihaike kuli ni mona kunani Majuda babañata mwateñi.

Batu babañata balemuha kuli Jesu uzwa mwa Kapernauma. Kunani lisepe zeñwi hape zesila liwate. (Mareka 4:36) Kaniti, haki musipili omutelele hahulu kusila liwate le. Liwate la Galilea haki lelituna hahulu, lieza likilomita ze 21 mwa butelele ni likilomita ze 12 mwa butuna. Kono litungile.

Nihaike kuli Jesu ki mutu yapetahalile, ukatezi hahulu bakeñisa bukombwa bwahae. Kacwalo, hase bafuuzi sisepe, Jesu ulobala kwa litusi la kwamulaho, mi usama fa musamo ni kuya fa buloko.

Buñata bwa baapositola bahae baziba hande kufuluha sisepe, kono wo ukaba musipili otaata. Liwate la Galilea lipotolohilwe ki malundu, mi mezi alona hañata afutumalanga. Fokuñwi, moya obata ozwa mwa malundu ushetumukelanga mwa liwate kuto kopana ni mezi afutumala, ili nto yetahisanga liñungwa lelituna la ka sipundumukela mwa liwate. Seo ki sona sesiezahala cwale. Honafo feela, mandinda akala kunata kwa sisepe. Sisepe sikala ‘kutala mezi kuli mane baba mwa kozi.’ (Luka 8:23) Kono Jesu uzwelapili kulobala!

Bafuluhi balika ka taata kusikulula sisepe, bafuluha sina mone bafuluhelanga hakunani liñungwa. Kono ka nako ye, kubabela taata. Ka kusaba kushwa, bazusa Jesu, bali: “Mulena, lupilise, lutuha lushwa!” (Mateu 8:25) Balutiwa baikalelwa kuli cwale batuha batiba!

Jesu hazuha, ubulelela baapositola kuli: “Kiñi hamusabile hahulu cwana, mina ba tumelo yenyinyani?” (Mateu 8:26) Jesu kihona akalimela moya ni liwate, ali: “Kuza! Uli tuu!” (Mareka 4:39) Moya obifile wakuza mi liwate laombala. (Mareka ni Luka babulela za kezahalo yemakaza ye, ka kukala kutalusa za makazo ya Jesu ya kukuzisa liwate ni liñungwa, kihona babulela ka za kutokwa tumelo kwa balutiwa.)

Munahane feela taba ye moiamela balutiwa! Kihona basazo iponela liwate lene libifile haliombala. Bakenelwa ki sabo yetuna. Babulelisana bali: “Ki mañi luli yo? Nihaiba moya ni liwate zamuutwa.” Mi bafita mwabuse bwa liwate inze baiketile. (Mareka 4:41–5:1) Mwendi lisepe zeñwi zeneli mwa liwate likonile kukutela kwa likamba la kwa wiko.

Kwasusueza kuziba kuli Mwanaa Mulimu unani maata a kuzamaisa nihaiba moya! Hakabusa lifasi le mwa Mubuso wahae, batu kaufela bakaba mwa kozo, hakuna kuba ni likozi zeitahela feela ili zona!