Jesu ukalisa musipili omuñwi wa kuyo kutaza mwa Galilea, hamulaho wa kubulela za tuto ya kuswalela hanaali mwa ndu ya Mufalisi yabizwa Simoni. Seli silimo sabubeli kuzwa fakalela bukombwa bwahae, mi hazamayi anosi. Uzamaya ni baapositola ba 12, hamohocwalo ni basali babañwi “bane bafolisizwe kwa mioya yemaswe ni kwa matuku.” (Luka 8:2) Mwahalaa batu bao kunani Maria Magdalena, Suzana, ni Joana, yena musalaa sikombwa sa Mulena Heroda Antipasi.

Batu babañata habanze bautwa ka za Jesu, kuba ni kusalumelana ko kutuna mwahalaa bona ka za misebezi yahae. Kona zeezahala zeo muuna yanani madimona, wa sibofu ni yasa buleli, hatiswa ku Jesu ni kufoliswa. Muuna yo cwale ulukuluzwi kwa madimona mi sabona ni kubulela. Batu bakomoka hahulu, bali: “Kana yo haki yena Mwanaa Davida?”—Mateu 12:23.

Batu babakubukani kwa ndu yainzi ku yona Jesu ki babañata hahulu, kuli mane Jesu ni balutiwa bahae bapalelwa nihaiba kuca sico. Nihakulicwalo, haki batu kaufela babanahana kuli Jesu ki “Mwanaa Davida” yasepisizwe. Bañoli babañwi ni Bafalisi batile kuzwa kwa Jerusalema—isiñi ka mulelo wa kuto ituta ku Jesu kamba kuto swalisana ni yena. Babulelela batu kuli: “Mutu yo ukenwi ki Beelzebule” kacwalo, usebelisana ni “mubusi wa madimona.” (Mareka 3:22) Banabahabo Jesu habautwa lilata leo, bataha kuli bato swala Jesu. Ka libaka lifi?

Ka nako ye, banyani ba Jesu habalumeli kuli ki Mwanaa Mulimu. (Joani 7:5) Jesu yo yabonahala kuli ki yena yatahisa lilata leo washutana  ni Jesu yebaziba ili yene bahulelela ni yena mwa Nazareta. Ka kunahana kuli mwendi walyangana babulela kuli: “Watakana.”—Mareka 3:21.

Kono bupaki bubonisañi? Jesu ufolisize muuna yanaakenwi ki madimona, ili yo cwale sabona ni kubulela. Batu kaufela baziba taba yeo. Kacwalo, bañoli ni bafalisi balika kutahiseza batu kuli bakakanye Jesu ka kubulela taba ya buhata. Bali: “Mutu yo haleleki madimona ka maata ahae; ueza cwalo ka maata a Beelzebule, mubusi wa madimona.”—Mateu 12:24.

Jesu waziba zebanahana bañoli ni Bafalisi, Kacwalo ubulela kuli: “Mubuso kaufela okauhani kuitwanisa washandauka, mi munzi kamba ndu kaufela yekauhani kuitwanisa haina kutiya. Ka mukwa oswana, haiba Satani aleleka Satani, uzibe ukauhani kuitwanisa; cwale mubuso wahae ukatiya cwañi?”—Mateu 12:25, 26.

Wo ki mutalusezo omunde luli! Bafalisi baziba kuli Majuda babañwi balelekanga madimona. (Likezo 19:13) Kacwalo, Jesu ubuza kuli: “Haiba nileleka madimona ka maata a Beelzebule, bana bamina bona baaleleka ka maata amañi?” Fo ki kuli, taba yebatameleza Jesu ni bona yabaama. Jesu cwale uzwelapili kubulela, kuli: “Kono haiba nileleka madimona ka moya wa Mulimu, uzibe Mubuso wa Mulimu umipatisize luli.”—Mateu 12:27, 28.

Jesu ubonisa kuli ka kuleleka madimona unani maata fahalimwaa Satani, ka kufa mutala wo, uli: “Mutu ukona kutaseza cwañi ndu ya muuna yamaata ni kumuamuha maluwo ahae asa mutami pili? Mi cwale kihona akalobela ndu yahae. Mutu kaufela yasiyo kwa lineku laka wanilwanisa, mi mutu kaufela yasakubukanyi ni na wahasanya.” (Mateu 12:29, 30) Bañoli ni Bafalisi balwanisa Jesu, ili nto yebonisa kuli basebeliswa ki Satani. Bahasanya batu ku Mwanaa Mulimu, yena yatusiwa ki Jehova.

Jesu ulemusa bahanyezi babaitusiswa ki Satani ba, kuli: “Lika kaufela likaswalelwa batu, kusina taba kuli ki libi mañi zebaeza ni kuli ki linyefulo mañi zebabulela. Kono mutu kaufela yanyefula moya okenile haana kuswalelwa kuya kuile kono unani mulatu wa sibi sesisa feli.” (Mareka 3:28, 29) Jesu uleleka madimona ka tuso ya moya wa Mulimu, kono bona bali uitusisa maata a Satani. Munahane feela taba ye moiamela balwanisi ba!