Jesu hasafolisize mutangaa muzamaisi wa masole, uzwa mwa Kapernauma mi uya kwa Naine, ili muleneñi ofumaneha likilomita zefitelela 32 kwa mboela-wiko. Hazamai anosi. Uzamaya ni baapositola bahae ni buñata bobutuna. Mwendi seibato ba manzibwana habaatumela muleneñi wa Naine. Habanze baatumela cwalo, bakatana Majuda babañatanyana babaya kwa mabita. Balwezi situpu sa mutangana kusizwisa mwa muleneñi kusiisa kwa kusibuluka.

Mahe mutangana yo ki yena yalobehile hahulu pilu ni kufita. Ki mbelwa, mi mwana alimuñwi feela yanani yena ki kale atimela. Muunaa hae hatimela, naasiyezi ni mwanaa hae yalatwa yo. Munahane feela mwanaalatela mwanaa hae. Hape ki yena feela yanaasepile kuli uka mutusa ni kumubabalela kwapili. Cwale ki kale atimela ni yena. Ki mañi yasiyezi yakaba ni yena ni kumutusa?

Jesu habona musali yo, umushwela makeke bakeñisa maswabi amatuna ali ku ona. Ka manzwi a musa ni afa sepo, ubulelela musali yo kuli: “Tuhela kulila.” Kono Jesu habuleli feela cwalo. Uatumela ni kuswala saala sa mufu. (Luka 7:13, 14) Kezo yeo itahisa kuli batu babaya kwa mabita bayeme honafo feela. Babañata mwendi baipuza kuli: ‘Muuna yo utalusañi, mi ubata kuezañi?’

Kucwañi ka za babazamaya ni Jesu babaiponezi limakazo zahae za kufolisa matuku amañata? Mwendi habasika bona kale Jesu hazusa mutu kwa bafu. Nihaike kuli kwakale batu babañwi bakile bazusiwa kwa bafu, kana Jesu wakona kuzusa bafu? (1 Malena 17:17-23; 2 Malena 4:32-37) Jesu ulaela kuli: “Mutangana, nili ku wena: Zuha!” (Luka 7:14) Mutangana yo wazuha. Mi waina ni kukala kubulela! Jesu umufa ku mahe yakomokile kono ili yatabile hahulu. Hasaliyo anosi.

 Batu hababona kuli mutangana yo wapila, balumbeka Mufani wa Bupilo, yena Jehova, bali: “Mupolofita yomutuna ubonahezi mwahalaa luna.” Babañwi bautwisisa zeitalusa makazo ya Jesu, bali: “Mulimu ushemubile batu bahae.” (Luka 7:16) Taba yemakaza yeo ihasana kapili-pili mwa libaka za fakaufi, mwendi mane ifita mwa tolopo yahabo Jesu, yona ya Nazareta, yeli likilomita ze 10 kuzwa mwa tolopo ye. Piho yeo mane ifita ni kwa mboela ili kwa Judea.

Joani Mukolobezi usainzi mwa tolongo, mi ubata hahulu kuutwa za misebezi yaeza Jesu. Balutiwa ba Joani bamutaluseza za limakazo zeo. Joani ueza cwañi?