Kwaupa wa Liwate la Galilea, Jesu, ka makazo, naafepile batu babañata mi hasamulaho azwa mwa sibaka seo kakuli nebabata kumueza mulena. Busihu bo, naazamaile fa liwate lene libifile mi apunyusa Pitrosi, ili yo ni yena naazamaile fa mezi kono bakeñisa kufokola kwa tumelo yahae akalisa kutiba. Jesu hape naakuzisize moya, mwendi ili kutusa balutiwa bahae kuli basike batiba.

Jesu cwale ukutezi kwaneku la wiko wa liwate, mwa sibaka sa Kapernauma. Batu banaafepile ka makazo bamufumana mi bamubuza kuli: “Utile lili kwanu?” Jesu ubakalimela ka kubabulelela kuli basweli kumubata ka mulelo wa kuli abafepe hape. Ubasusueza kuli: “Musebeleze sico sesisa sinyehi sesifa bupilo bobusa feli.” Ka mukwa ocwalo, babuza kuli: “Luswanela kuezañi kuli lupete misebezi ya Mulimu?”—Joani 6:25-28.

Mwendi banahana ka za misebezi yebulezwi mwa Mulao, kono Jesu ubulela ka za musebezi wa butokwa hahulu, uli: “Wo ki ona musebezi wa Mulimu, kuli mubonise tumelo ku yena yanaalumile.” Kono batu hababonisi tumelo ku Jesu, kusina taba ni zaezize kaufela. Bamubulelela kuli aeze makazo ilikuli balumele ku yena. Bamubuza kuli: “Ki musebezi mañi oueza? Bo kuku waluna nebacile maana mwa lihalaupa, sina hakuñozwi kuli: ‘Abafa sinkwa sesizwa kwa lihalimu kuli bace.’”—Joani 6:29-31; Samu 78:24.

Ka kualaba kupo yabona yakuli aeze makazo, Jesu ubonisa batu kone kuzwa sinkwa, uli: “Namibulelela nili, Mushe naasika mifa sinkwa sesizwa kwa lihalimu, kono Ndate umifa sinkwa sa niti sesizwa kwa lihalimu. Kakuli sinkwa sa Mulimu ki yena yazwa kwa lihalimu mi ufa bupilo kwa lifasi.” Ka kusautwisisa zaatalusa, bamukupa kuli: “Mulena, ulufange sinkwa seo kamita.” (Joani 6:32-34) Kono ki sifi “sinkwa” satalusa Jesu?

Jesu utalusa kuli: “Ki na sinkwa sa bupilo. Mutu kaufela yataha ku na haana kushwa tala nikamuta, mi mutu kaufela yabonisa tumelo ku na haana kushwa linyolwa nikamuta. Kono sina hani mibulelezi, muniboni kono hamulumeli. . . . Nizwile kwa lihalimu kuto eza sesilatwa ki yanilumile, isiñi sesilatwa ki na. Se ki sona sesilatwa ki yanilumile, kuli nisike nalatehelwa ki mutu ku banifile kaufela, kono kuli nimuzuse kwa bafu fa lizazi la mafelelezo. Kakuli se ki sona sesilatwa ki Ndate, kuli mutu kaufela yaamuhela Mwana ni kubonisa tumelo ku yena abe ni bupilo bobusa feli, mi nika muzusa kwa bafu fa lizazi la mafelelezo.”—Joani 6:35-40.

Taba ye itahiseza batu kuhalifa, mi Majuda bakala kuñuñuna ka zahae. Ukona kubulela cwañi kuli ki yena “sinkwa sesizwile kwa lihalimu”? (Joani 6:41) Bona bamuunga kuli ki mutu feela ili yo bashemi bahae bazwa mwa Nazareta, ili muleneñi wa mwa Galilea. Batu babuza bali: “Kana yo haki yena Jesu mwanaa Josefa, yeluizibela ndatahe ni mahe?”—Joani 6:42.

Jesu ualaba kuli: “Mutuhele kuñuñuna mwahalaa mina. Hakuna mutu yakona kutaha ku na, konji haiba Ndate, yanilumile, amuhoha, mi nika muzusa kwa bafu fa lizazi la mafelelezo. Kuñozwi mwa litaba za Bapolofita kuli: ‘Kaufelaa bona bakalutwa ki Jehova.’ Mutu kaufela yateelelize ku Ndate ni kuituta ku yena utaha ku na. Hakuna mutu yomuñwi yaboni Ndate, kwandaa yena yazwa ku Mulimu; yo ki yena yaboni Ndate. Kaniti luli namibulelela nili, mutu kaufela yalumela unani bupilo bobusa feli.”—Joani 6:43-47; Isaya 54:13.

Kwamulaho Jesu hanaambozi ni Nekudema, naabonisize kuli mutu utokwa kubonisa tumelo ku Mwanaa mutu kuli abe ni bupilo bobusa feli, naize: “Mutu kaufela yabonisa tumelo ku [Mwanaa Mulimu wa libanda] asike atimezwa kono abe  ni bupilo bobusa feli.” (Joani 3:15, 16) Kono cwale uambola ni batu babañata, mi ubabulelela kuli ubatusa kufumana bupilo bobusa feli, ili nto yeo maana kamba sinkwa sesifumaneha hahulu mwa Galilea lisakoni kubatusa kufumana. Ka mukwa ocwalo, mutu ukona kufumana cwañi bupilo bobusa feli? Jesu ukutela manzwi ahae, uli: “Ki na sinkwa sa bupilo.”—Joani 6:48.

Taba ye, ya za sinkwa sesizwa kwa lihalimu izwelapili, mi iba yetuna hahulu Jesu hanze aluta mwa sinagoge ya mwa Kapernauma.