Jesu umemile balutiwa bahae babane—bo Pitrosi, Andreasi, Jakobo, ni Joani—kuli babe bayambi ba batu. Cwale ka la Sabata, kaufelaa bona baya kwa sinagoge yeñwi ya mwa Kapernauma. Jesu uluta batu mwa sinagoge, mi hape bakomokiswa ki mulutelo wahae. Ubaluta ka maata isiñi sina bañoli.

Fa lizazi la Sabata le, kunani muuna yakenwi ki mudimona. Mwa sinagoge muuna yo uhuwa ka linzwi lelituna uli: “Lunani taba mañi ni wena Jesu, wa Munazareta? Kana utezi kuto lutimeza? Nakuziba hande, ki wena Yakenile wa Mulimu!” Jesu ukalimela mudimona ozamaisa muuna yo, uli: “Kuza, hakuzwe ku yena!”—Mareka 1:24, 25.

Honafo, moya omaswe wo uwiseza muuna yo fafasi, kumunyakaulisa ni kutahisa kuli ahuwe ka linzwi lelituna. Kono mudimona uzwa ku muuna yo “kusina kumuholofaza.” (Luka 4:35) Batu baba mwa sinagoge baikomokela feela! Bali: “Se kiñi? . . . Ulaela ka maata nihaiba yona mioya yemasila, mi yamuutwa.” (Mareka 1:27) Kacwalo, taba yekomokisa ye yahasana mwa Galilea kaufela.

Jesu ni balutiwa bahae bazwa mwa sinagoge ni kuya kwa ndu ya Simoni, kamba Pitrosi. Teñi koo mukwenyanaa Pitrosi wamusali ukula fibele yebuhali. Bakupa Jesu kuli amutuse. Jesu uya ku yena, umuswala kwa lizoho ni kumuyemisa. Honafo feela wafola, mi ukala kusebeleza Jesu ni balutiwa bahae, mwendi ka kubalukiseza lico.

Ibato ba ka nako ya manzibwana, batu babazwa mwa libaka kaufela batisa bakuli babona kwa ndu ya Pitrosi. Mi sekubonahala kuli muleneñi kaufela ukubukani fa munyako wa ndu. Kabakalañi? Babata kufoliswa. Mane ‘kaufela babanani bakuli ba matuku a mifuta-futa babatisa ku yena. Mi ubafolisa ka kubeya mazoho ahae fahalimwaa yomuñwi ni yomuñwi wabona.’ (Luka 4:40) Kaniti, kusina taba ni matuku ebakula, Jesu wabatusa, sina mone kupolofitezwi. (Isaya 53:4) Mane ulukulula ni babakenwi ki madimona. Mioya yemaswe haizwa ku bona, ihuwa ili: “Ki wena Mwanaa Mulimu.” (Luka 4:41) Kono Jesu waikalimela mi hailumelezi kubulela hape. Yaziba kuli Jesu ki Kreste, mi halati kuli iiponahalise kuli isebeleza Mulimu wa niti.