Ka lizazi la mafelelezo la mukiti wa Litabernakele, lona lizazi labu 7, Jesu uluta batu inze ali mwa kalulo yeñwi ya tempele yebizwa “mabulukelo a maluwo.” (Joani 8:20; Luka 21:1) Mwendi neli mwa Lapa la Basali, ili mo batu bafelanga linubu zabona.

Busihu ka nako ya mukiti, mwa sibaka se sa tempele kubeiwangwa lilambi zetuka hahulu. Kubeiwangwa lilambi zeene ze fa matomelo azona, mi yeñwi ni yeñwi yazona italanga mafula. Liseli lelitahiswangwa ki lilambi zeo libanga lelituna hahulu kuli mane limonyehanga sibaka kaufela ni kwa matuko asona. Zabulela Jesu cwale likona kuhupulisa bateelezi bahae ka za taba ye, uli: “Ki na liseli la lifasi. Mutu kaufela yanilatelela haana kuzamaya mwa lififi nihanyinyani, kono ukaba ni liseli lelipilisa.”—Joani 8:12.

Bafalisi bahana zaabulela Jesu, bali: “Uipaka ili wena; bupaki bwahao haki bwa niti.” Jesu ualaba kuli: “Niha niipaka ili na, bupaki bwaka ki bwa niti, kakuli naziba konizwile ni koniya. Kono mina hamuzibi konizwile ni koniya.” Uekeza uli: “Mwa Mulao wamina kuñozwi kuli: ‘Bupaki bwa batu bababeli ki bwa niti.’ Na naipaka, mi Ndate yanilumile ni yena wanipaka.”—Joani 8:13-18.

Ka kusalumela zatalusa Jesu, Bafalisi bamubuza kuli: “Ndataho ukai?” Jesu ubaalaba ka kunonga uli: “Hamu nizibi mi ni Ndate hamu muzibi. Kambe mwaniziba, kambe ni Ndate mumuzibile.” (Joani 8:19) Nihaike kuli Bafalisi basabata kuli Jesu atamiwe, hakuna mutu yamuswala.

Jesu ukutela kubulela manzwi asabulezi kale, uli: “Naya, mi muka nibata, kono mukashwa ni sibi samina. Koniya hamukoni kutaha  kwateñi.” Majuda ka kusautwisisa manzwi a Jesu, bakala kuipuza kuli: “Kana mutu yo ubata kuipulaya? Kakuli uli: ‘Koniya hamukoni kutaha kwateñi.’” Habautwisisi zatalusa Jesu, kakuli habazibi kwa zwa. Ubataluseza kuli: “Mina muzwa fafasi; na nizwa kwahalimu. Muzwa mwa lifasi le; na hanizwi mwa lifasi le.”—Joani 8:21-23.

Jesu utalusa za bupilo bwahae bwa kwa lihalimu pili asika taha kale fa lifasi, ni za sepiso ya kuli ki yena Mesiya kamba Kreste, ili yo baeteleli ba bulapeli baswanela kulibelela. Nihakulicwalo, bamualaba ka kashwau ka katuna bali: “Ki wena mañi?”—Joani 8:25.

Habanze bamuhanyeza ni kumulwanisa cwalo, Jesu ubaalaba kuli: “Kiñi mane zeniambolela ni mina?” Niteñi, uzwelapili kuisa pilu ku Ndatahe ni kutalusa libaka Majuda habaswanela kuteeleza ku Mwana: “Yanilumile ki wa niti, mi litaba zeniutwile luli ku yena nilibulela mwa lifasi.”—Joani 8:25, 26.

Cwale Jesu ubonisa buikolwiso bwahae ku Ndatahe ili bo Majuda basina bona, uli: “Hase mupahekile Mwanaa mutu, kihona mukaziba kuli ki na, ni kuli haniikezezi lika ka ili na; kono nibulela lika ze, ka mwa nilutezi Ndate. Mi Yanilumile uinzi ni na; hasika nisiya ninosi, kakuli kamita nieza lika zemutabisa.”—Joani 8:28, 29.

Nihakulicwalo, Majuda babañwi babonisa tumelo ku Jesu, mi ubabulelela kuli: “Haiba muzwelapili mwa linzwi laka, mu balutiwa baka luli, mukaziba niti, mi niti ika milukulula.”—Joani 8:31, 32.

Taba ya kulukululwa haitabisi batu babañwi. Bahana bali: “Lu bana ba Abrahama mi halusika ba kale batanga ba mutu ufi kamba ufi. Ubulela cwañi kuli: ‘Mukalukuluha’?” Majuda baziba kuli ka linako zeñwi nebahatelezwi ki bazwahule, ka mukwa ocwalo, bahana kubiziwa batanga. Kono Jesu ubonisa kuli basali batanga, uli: “Kaniti luli namibulelela nili, mutu kaufela yaeza sibi ki mutangaa sibi.”—Joani 8:33, 34.

Kuhana kuli haki batanga ba sibi kubeya Majuda mwa muinelo womaswe. Jesu uli: “Mutanga haini mwa ndu kuya kuile; mwana ki yena yaina mwateñi kuya kuile.” (Joani 8:35) Mutanga haana swanelo ya kuyola, mi wakona kulelekwa ka nako ifi kamba ifi. Mwana kamba yaañuzwi ki yena feela yanani swanelo ya kuina “kuya kuile,” fo kutalusa kuli ka nako ya kupila kwahae kaufela.

Ka mukwa ocwalo, niti ka za Mwana, ki yona niti yelukulula batu kuya kuile kwa lifu lelitahisizwe ki sibi. Jesu uli: “Haiba Mwana amilukulula, mukaba babalukuluhile luli.”—Joani 8:36.