Josefa ni Maria habakuteli kwa Nazareta kono bazwelapili kuina mwa Betelehema. Jesu hakwanisa mazazi a 8 a kupepwa, bamukenya mwa mupato ka kuya ka Mulao wanaafile Mulimu kwa Maisilaele. (Livitike 12:2, 3) Hape ka kuya ka sizo, mbututu neifiwa libizo ka lona lizazi leo. Babeya mwanaa bona libizo la Jesu, sina mwanaalaelezi lingeloi Gabriele.

Sekufitile nako yefitelela kweli, mi Jesu unani mazazi a 40 a kupepwa. Bashemi bahae bamuisa kai cwale? Bamuisa kwa tempele mwa Jerusalema, ili muleneñi osi kwahule hahulu ni kobaina. Mulao ubulela kuli hamulaho wa mazazi a 40 kuzwa fapepelwa mwana wamushimani, mahe uswanela kuisa nubu ya kuikenisa kwa tempele.—Livitike 12: 4-8.

Maria ueza cwalo. Utisa nubu ya linyunywani zepeli zenyinyani. Taba yeo ilutusa kuutwisisa muinelo obali ku ona bo Josefa ni Maria. Ka Mulao, nubu yeswanela kufiwa ki nyunywani ni nguyana yamuuna. Kono haiba me haakoni kutisa ngu yamuuna, atise maiba amabeli kamba tunkwilimba totubeli. Wo ki ona muinelo wali ku ona Maria mi utisa linyunywani zeo sina nubu yahae.

Muuna wa musupali uatumela Josefa ni Maria kwa tempele. Libizo lahae ki Simioni. Mulimu naamupatululezi kuli pili asika shwa kale, ukabona Kreste kamba Mesia wa Jehova yanaasepisizwe. Ka lizazi le, moya okenile ususumeza Simioni kuya kwa tempele mi uyo fumana Josefa ni Maria bainzi ni mwanaa bona. Simioni uswala mbututu mwa mazoho ahae.

Hanze asweli Jesu cwalo, Simioni ulumbeka Mulimu, uli: “Cwale wena Mulena Yapahami ka Kufitisisa, ulukulula mutangaa hao kuli aye ka kozo kulikana ni linzwi lahao, kakuli meeto aka aboni nzila yeuka pilisa ka yona, yeulukisize fapilaa batu kaufela, lona liseli lelizwisa lisila la lififi ku ba macaba, ni kanya ya Isilaele sicaba sahao.”—Luka 2:29-32.

Josefa ni Maria bakomokiswa ki manzwi ao. Simioni wabafuyaula mi ubulelela Maria kuli mwanaa hae “uketezwi kuwa ni kuzuha hape kwa babañata mwa Isilaele,” ni kuli Maria ukaba ni maswabi sina yatabwa ki mukwale oshengile.—Luka 2:34.

Kunani mutu yomuñwi yaliteñi lizazi le. Mutu yo ki Anna, mupolofita wamusali yanani lilimo ze 84. Mane hatondahalangi kwa tempele. Ka yona nako yeo, uatumela Josefa, Maria, ni Jesu yaali mbututu. Anna ukala kulumbeka Mulimu ni kubulela za Jesu ku babateeleza kaufela.

Ka niti luli, Josefa ni Maria banyakalaliswa ki lika ze kaufela zeezahala kwa tempele! Zeo kaufela lipaka taba ya kuli mwanaa bona ki yena Yasepisizwe ki Mulimu.