Kwa Bashaeli ba Mubuso:

Munahane kuli mu yomuñwi wa baapositola mi muyemi fa Lilundu la Likota za Olive. Jesu utobonahala ku mina. Mi asika kambamela kale kwa lihalimu, umibulelela kuli: “Mukaamuhela maata moya okenile hauka taha ku mina, mi mukaba lipaki zaka mwa Jerusalema, mwa Judea kaufela ni mwa Samaria, ni kuyo fita kwa libaka za kwahule hahulu za lifasi.” (Lik. 1:8) Nemuka ikutwa cwañi?

Mwendi nemuka ikutwa kuli musebezi wo ki omutuna hahulu. Nemukana mwaipuza kuli, ‘Luna babanyinyani cwana, lukakona cwañi kufa bupaki “kuyo fita kwa libaka za kwahule hahulu za lifasi”?’ Mwendi mwahupula temuso yanaafile Jesu busihu bwa bulaiwa, hanaaize: “Mutanga hafiti mulenaa hae. Haiba baninyandisize, baka minyandisa ni mina; haiba bamamezi linzwi laka, bakamamela ni lamina. Kono bakaeza lika zeo kaufela kumilwanisa kabakala libizo laka, kakuli habazibi yanilumile.” (Joa. 15:20, 21) Hamuhupula manzwi ao, mukana mwaipuza kuli, ‘Kana nikakona kufa bupaki ka kutala hanikopana ni twaniso ni nyandiso yecwalo?’

Ni luna kacenu lukona kuipuza lipuzo zeswana zeo. Ka kuba Lipaki za Jehova, ni luna lufilwe musebezi wa kufa bupaki bobutezi “kuyo fita kwa libaka za kwahule hahulu za lifasi,” ili kukutaza kwa “batu ba macaba kaufela.” (Mat. 28:19, 20) Musebezi wo ukona kupetiwa cwañi, sihulu kabakala twaniso yenepolofitilwe kuli lukakopana ni yona?

Mwa buka ya Likezo za Baapositola, lufumana litaba zetabisa zebonisa mo baapositola ni Bakreste babañwi ba mwa linako zeo nebakonezi kupeta musebezi wabona ka tuso ya Jehova. Buka ye, yemusweli kubala cwale, ilukiselizwe kumitusa kunyakisisa litaba zeo mi mukaikola kubala litaba zende zetabisa zeñozwi mwateñi. Mukalemuha kuli miinelo yemiñata yene bakopani ni yona batanga ba Jehova mwa linako zeo iswana ni miinelo yebaipumana ku yona batu bahae kacenu. Mukalemuha kuli nebaeza musebezi oswana ni olueza, ni kuli neba ueza ka nzila yeswana ni moluuezeza luna kacenu. Kunahanisisa litaba zeo kukatiisa tumelo yamina ya kuli Jehova Mulimu uzwelapili kuetelela kalulo ya fa lifasi ya kopano yahae.

Lusepa kuli hamunze munyakisisa buka ya Likezo mukazwelapili kuba ni buikolwiso bwa kuli Jehova uka mitusa ni kuli uka mitiisa ka maata a moya wahae okenile. Haike kueza cwalo kumisusueze kuzwelapili ‘kupaka ka kutala za Mubuso wa Mulimu’ ni kutusa babañwi kufumana nzila yelibisa kwa bupilo.—Lik. 28:23; 1 Tim. 4:16.