Taba Yezingile Muituti
Mushimani wa libizo la Peter uikalezwi, mi upalelwa kuina hande mwa sipula. Bo muluti bahae, bona basali bakuteka, kihona basazo talusa za mo tuto ya Charles Darwin ya kuli lika nelitahile ka kuipilaula ituselize ba sayansi kuziba zeñata ni kuli ilukuluzi batu kwa litumelo za mioya. Cwale bamemile baituti babona mwa kilasi kutalusa mubonelo wabona fa taba ye.
Peter uzingehile. Bashemi bahae bamulutile kuli Mulimu naabupile lifasi ni lika kaufela zepila ze ku lona. Bamutaluselize kuli zeibulela Bibele ka za kuli lika nelibupilwe ki za niti mi tuto ya kuli lika nelitahile ka kuipilaula ki ya buhata mi haina bupaki. Bashemi ba Peter ni bo muluti bahae kaufelaa bona babata kumutusa. Kono cwale Peter ukakolwa bo mañi?
Silimo ni silimo, bana ba sikolo babañata mwa lifasi kaufela baipumananga mwa muinelo oswana kwa sikolo. Ki lika mañi zaswanela kueza Peter ni bana ba sikolo babañwi? Kaniti, habaswaneli feela kulumela taba yeo kabakala kuli ki mona mobalutezwi cwalo, kono baswanela kueza lipatisiso ni kuikolwisisa bona bañi pili basika ilumela kale. Baswanela kunyakisisa bupaki bobuyemela tuto ya kuipilaula kamba bobuyemela tuto ya kuli lika nelibupilwe, kihona bakaikatulela bona bañi taba yebaka lumela.
Mane Bibele ilulemusa kuli haluswaneli kulumela feela litaba zebabulela batu kusina kunyakisisa kubona haiba linepahalile kamba kutokwa. Muñoli yomuñwi wa Bibele naabulezi kuli: “Mutu yasalemuhi kozi ulumela litaba kaufela, kono yabutali unahanisisa mihato yahae kaufela.” (Liproverbia 14:15) Bibele isusueza Bakreste kuitusisa “maata [abona] a kunahana” ni kuitemuhela bona bañi buniti bwa lituto zebalutiwa.—Maroma 12:1, 2.
Broshuwa ye haisika lukiswa ka mulelo wa kuli ituse likwata za bulapeli zebata kuli tuto ya kuli lika nelibupilwe ilutiwe mwa likolo. Ilukiselizwe kunyakisisa litaba zebabulela batu babalumela kuli lika neliitahezi ka ili zona feela, mi bahana zeibulela Bibele ka za kuli lika nelibupilwe.
Lukanyakisisa za selusi, yona nto yenyinyani ka kufitisisa yepila. Mukaipalela litaba zekomokisa zebonisa molilukiselizwe liselusi. Hape mukakupiwa kunyakisisa litaba zeitusiswa kuyemela tuto ya kuli lika nelitahile ka kuipilaula.
Kaniti luli, kaufelaa luna muta omuñwi lukatokwa kualaba puzo ye: Kana lika zepila nelibupilwe kamba nelitahile ka kuipilaula? Mwendi semunahanisisize kale za taba yeo. Mwa broshuwa ye, lukanyakisisa bupaki bobuñwi bobukolwisize batu babañata kulumela kuli lika zepila nelibupilwe.
