PUZO 5
Kana Luswanela Kulumela Zeibulela Bibele?
Kana mukile mwabulelelwa litaba za buhata ka za mutu yomuñwi? Mwendi nemuutwile babañwi hababulela ka za hae kamba litaba zanaabulezi. Kono hamulaho wa nako, mwalemuha kuli litaba zenebulezwi ka za hae nesi za niti. Batu babañata balemuhile taba yeswana ka za Bibele.
Batu babañata babaitutile habatabeli Bibele. Kabakalañi? Batu hañata hababulelangi litaba za niti ka za buka yeo kamba batalusanga litaba zefumaneha mwateñi ka nzila yetahisa kuli iingiwe kuli litaba zeibulela haliutwahali, halilumelelani ni sayansi kamba lifosahalile hahulu. Esi mwendi zebabulela batu ka za Bibele ki zona zefosahalile?
Hane munze mubala broshuwa ye, kana nemukomokile kulemuha kuli zeibulela Bibele zalumelelana ni sayansi? Batu babañata ni bona baikutwile cwalo. Bakomokile kulemuha kuli Bibele haiyemeli litaba zeñwi zebuluta bulapeli bobuñata bobuipapata kuli ki zona zeibulela. Ka mutala, batu babañwi bali Bibele ibulela kuli Mulimu naabupile lika kaufela ze mwa pupo ni lika kaufela zepila mwa mazazi a 6 a lihora ze 24. Mane Bibele hailwanisi zebabulela ba sayansi ka za nako yeibile teñi pupo kamba lifasi. *
Kutuha fo, batu banani kolo ya kunyakisisa kubona haiba litaba lisikai zeibulela Bibele ka za mwanaabupezi lika Mulimu fa lifasi zaswalisana ni sayansi. Bibele ibonisa kuli Mulimu naabupile lika kaufela zepila mi naaezize lika zepila “ka mifuta yazona.” (Genese 1:11, 21, 24) Zeibulela Bibele fa, likona kulwanisana ni lituto zeñwi za sayansi kono halilwanisani ni litaba zese bapakile ba sayansi. Kuzwa feela kwamulaho, ba sayansi balemuhile kuli lituto zeñwi zacincanga kono litaba zesepakilwe kuli ki za niti zona halicincangi.
Kono kunani batu babañwi babasa tabeli kunyakisisa zeibulela Bibele kabakala kuli habatabiswi ki zebueza bulapeli. Balemuhanga kuli batu mwa bulapeli banani buipi, buputeleli, mi babulayana. Kono kana kulukile kubulela maswe Bibele kabakala zebaeza batu babaipapata kuli bapila ka likuka zayona? Ba sayansi babañata babanani lipilu zende bakomokisizwe hahulu ki zebaeza batu babañwi ba mifilifili babaitusisize tuto ya kuipilaula kuli baketulule batu babañwi. Kana kulukile kubulela maswe tuto ya kuipilaula kabakala zebaeza batu babacwalo? Kusina kukakanya, neikaba hande kunyakisisa tuto yeo ni kubapanya litaba zeiluta kwa bupaki bobu liteñi.
Lumisusueza kueza nto yeswana ka za Bibele. Mwendi mukakomoka hahulu kulemuha kuli litaba zeiluta lishutanela kwahule ni zebueza bulapeli bobuñata. Bibele nikamuta haisusuezi batu kulwana kamba kulwanisa batu babañwi kabakala litalo labona, kono isusueza batanga ba Mulimu kutoya lindwa mane ni kuambuka sitoyo, ili sona sesitahisanga kuli batu balwanise batu babañwi. (Isaya 2:2-4; Mateu 5:43, 44; 26:52) Haisusuezi batu kueza lika ka nzila yetulile tikanyo kamba kulumela feela lika kusina bupaki, kono ibonisa kuli kuba ni tumelo ya niti kuitingile fa bupaki mi mutu utokwa kuitusisa maata ahae a kunahana kuli asebeleze Mulimu. (Maroma 12:1; Maheberu 11:1) Mi mane Bibele haihanisi batu kuba ni takazo ya kubata kuziba lika, kono ilususueza kueza lipatisiso kuli luutwisise lipuzo zeñwi za butokwa hahulu zebakile baba ni zona batu.
Ka mutala, kana mukile mwaipuza kuli: ‘Haiba Mulimu uteñi, ki kabakalañi hatuhelela lika zemaswe kuli liezahale?’ Bibele yaalaba puzo yeo ni lipuzo zeñwi zeñata ka nzila yekolwisa. * Lumisusueza kuzwelapili kubata niti. Mukafumana likalabo zende, zetabisa, ni zeutwahala, ili zetomile fa bupaki bobukolwisa. Mi Bibele ni yona neisika itahela feela.
Hape Mwendi Mwakona Kutabela Litaba Ze
MUZUHE!
Kana Bibele ki Buka Feela Yende?
Ki kabakalañi batu habakona kubeya bupilo bwa bona mwa lubeta ka kubala Bibele kamba kuba ni yona?
MUZUHE!
Bibele I Bulelañi ka za Pupo?
Bibele i bulela ka za mazazi a 6 ili mazazi ao Mulimu naa bupile lika ze pila. Kana ao, ne li mazazi a lihola ze 24?
LIKALABO KWA LIPUZO ZA BIBELE
Kana Litaba za Sayansi Zalumelelana ni Zeibulela Bibele?
Kana kunani mafosisa fa litaba za sayansi mwa Bibele?
MUZUHE!
Likande le li sa Zibahali ku ba Bañata la ku Bupiwa Kwa Lika
Kana likande la mwa Bibele la ku bupiwa kwa lika la lumelelana ni litaba za sayansi?
