Batu ba mwa Juda nebakuta-kutezi kufulalela Jehova ni kulapela milimu ya buhata. Ka lilimo zeñata, Jehova naazwezipili kubatusa. Naalumile bapolofita babañata kuyo balemusa, kono nebasika teeleza. Nebasheununanga bapolofita bane balumiwanga. Jehova naafelisize cwañi milimu yabona ya maswaniso?

Mulena wa Babilona, yena Nebukadenezare, naasweli kuhapa linaha zeñata. Hanaahapile Jerusalema lwapili, aswala Mulena Jojakini, manduna, lindwalume, ni bambuti, mi abaisa kaufelaa bona kwa Babilona. Hape naangile lika kaufela za butokwa za mwa tempele ya Jehova. Hasamulaho, Nebukadenezare aeza Zedekia kuba mulena wa Juda.

Kwa makalelo, Zedekia naalatelelanga lika kaufela zanaa mubulelelanga Nebukadenezare. Kono linaha zene lili bukaufi ni bapolofita ba buhata baeleza Zedekia kufetuhela Babilona. Jeremia naamulemusize kuli: ‘Haiba ufetuhela Babilona, batu bakashwa, kukaba ni tala yetuna, ni matuku mwa Juda.’

Hamulaho wa kubusa lilimo ze 8, Zedekia aikatulela kukwenuhela Babilona. Akupa mpi ya Maegepita kuli imutuse. Cwale Nebukadenezare aluma mpi yahae kuyo lwanisa Jerusalema, mi masole babeya mafulo abona kupotoloha muleneñi kaufela. Jeremia abulelela Zedekia kuli: ‘Jehova ubulela kuli haiba ukoza kwa Babilona, wena hamoho ni muleneñi mukapunyuha. Kono haiba hauna kueza cwalo,  Mababilona bakacisa Jerusalema ka mulilo mi bakakuisa inze uli lipantiti.’ Zedekia kihaa li: ‘Hanina kukoza!’

Hamulaho wa silimo ni licika, mpi ya Mababilona yapunya mamota a Jerusalema mi yacisa muleneñi ka mulilo. Bacisa tempele, babulaya batu babañata, mi baisa batu babañata mwa buhapiwa.

Zedekia abaleha kuzwa mwa Jerusalema, kono Mababilona bamumatisa. Bayo muswalela kwatuko ni Jeriko mi bamutisa ku Nebukadenezare. Mulena wa Babilona abulaya bana babashimani ba Zedekia inze aiponela. Mi Nebukadenezare apunya Zedekia meeto, mi amukenya mwa tolongo, hasamulaho ashwela mwateñi. Kono Jehova naasepisize batu ba Juda kuli: ‘Hamulaho wa lilimo ze 70, nika mikutiseza kwa Jerusalema habo mina.’

Ki lika mañi zeneka ezahala kwa banana bane baisizwe mwa Babilona sina mapantiti? Kana nebaka zwelapili kusepahala ku Jehova?